TITUS
Tetraevangelium (redactio mcxetica defectiva)
Part No. 56
Previous part

Chapter: 13 
Verse: 1  Link to ntkpl   მო-ვინმე-სრულ იყუნეს მას ჟამსა ოდენ და უთხრეს მას გალილეველთა მათთჳს, რომელთა-იგი სისხლი პილატე შეჰრია მსხუერპლთა მათთა.

Verse: 2  Link to ntkpl   მიუგო იესო და ჰრქვა მათ: ეგრე გგონიეს, ვითარმედ გალილეველნი ესე უფროს ყოველთა გალილეველთა იყვნეს ცოდვილ, რამეთუ ესევითარი ევნო მათ?

Verse: 3  Link to ntkpl   გეტყჳ თქვენ: არა; არამედ უკუეთუ არა შეინანოთ, ეგრევე სახედ ყოველნი წარსწყმდეთ.

Verse: 4  Link to ntkpl   ანუ იგი, რომელ ათვრამეტთა ზედა სილოამს გოდოლი დაეცა და მოსწყჳდნა იგინი, ჰგონებთ, ვითარმედ იგინი ხოლო თანა-მდებ იყვნეს უფროს ყოველთა კაცთა, რომელნი მკჳდრ არიან იერუსალიმს?

Verse: 5  Link to ntkpl   გეტყჳ თქუენ: არა; არამედ უკეთუ არა შეინანოთ, ყოველნივე ეგრეთ წარწყმდეთ.

Verse: 6  Link to ntkpl   და ეტყოდა მათ იგავსა ამას: ლეღჳ ვისმე ედგა ნერგი სავენაჴესა თჳსსა, მოვიდა და ეძიებდა ნაყოფსა მისგან და არა პოვა.

Verse: 7  Link to ntkpl   და ჰრქუა ვენაჴისა მოქმედსა მას: აჰა ესერა სამი წელი არს, ვინათგან მოვალ და ვეძიებ ნაყოფსა ლეღუსა ამას შინა და არა ვპოებ. მოჰკუეთე ეგე, რაჲსათჳს ქუეყანაცა დაუპყრიეს უქმად?

Verse: 8  Link to ntkpl   ხოლო მან მიუგო და ჰრქუა: უფალო, უტევე ეგე ამასცა წელსა, ვიდრემდე მოუთოჴნო მას გარემო და სკორე დაუდვა,

Verse: 9  Link to ntkpl   ყოს ხოლო თუ ნაყოფი; უკუეთუ არა, მერმე მოჰკუეთე იგი.

Verse: 10  Link to ntkpl   და ასწავებდა მათ იესო შესაკრებელსა ერთსა შაბათსა შინა.

Verse: 11  Link to ntkpl   და აჰა ესერა დვდაკაცი იყო, რომლისა თანა იყო სული უძლურებისა ათვრამეტ წლითგან; და იყო იგი დაღონებულ და ვერ ეძლო ზე ახილვად ყოვლითურთ.

Verse: 12  Link to ntkpl   იხილა იგი იესო, მოუწოდა და ჰრქვა მას: დედაკაცო, განტევებულ ხარ უძლურებისაგან შენისა.

Verse: 13  Link to ntkpl   და დაასხნა მას ზედა ჴელნი, და მეყსეულად აღემართა და ვიდოდა, და ადიდებდა ღმერთსა.

Verse: 14  Link to ntkpl   მიუგო შესაკრებელის მთავარმან მან რისხვით, რამეთუ შაბათსა განკურნა იგი იესო, და ეტყოდა ერსა მას: ექუსნი დღენი არიან, რომელთა შინა ჯერ-არს საქმედ; მათ შინა მომავალნი განიკურნებოდენ და ნუ დღესა შაბათსა.

Verse: 15  Link to ntkpl   მიუგო მას იესო და ჰრქუა: ორგულო, კაცად კაცადმან თქვენმან არა აჰჴსნისა შაბათსა შინა ჴარი გინა ვირი ბაგათაგან მათთა და წარიბის და ასვის მას წყალი?

Verse: 16  Link to ntkpl   ხოლო ესე ასული აბრაჰამისი იყო, რომელი შეეკრა ეშმაკსა, აჰა ესერა ათვრამეტი წელი არს; არა ჯერ იყოა განჴსნად საკრველთაგან მისთა დღესა შაბათსა?

Verse: 17  Link to ntkpl   და ამას რა იტყოდა თავადი, ჰრცხვენოდა ყოველთა წინააღმდგომთა მისთა; და ყოველსა მას ერსა უხაროდა ყოველთა მათ ზედა დიდებულებათა მისთა, რომელნი იქმნებოდეს მის მიერ.

Verse: 18  Link to ntkpl   და იტყოდა: რასა ვამსგავსო სასუფეველი ღმრთისაჲ და ვისა მსგავს არს იგი?

Verse: 19  Link to ntkpl   მსგავს არს იგი მარცვალსა მდგოგჳსასა, რომელი მოიღო კაცმან და დასთესა იგი მტილსა თჳსსა, და აღორძინდა და იქმნა იგი ხე დიდი, და მფრინველთა ცისათა დაიმკჳდრეს რტოთა მისთა.

Verse: 20  Link to ntkpl   მერმე კუალად თქუა: რასა ვამსგავსო სასუფეველი ღმრთისაჲ?

Verse: 21  Link to ntkpl   ვამსგავსო იგი ცომსა, რომელი მოიღო დედაკაცმან და შეჰრთო იგი ფქჳლსა სამსა საწყაულსა, ვიდრემდე აღფუვნოს ყოველი.

Verse: 22  Link to ntkpl   და მიმოვიდოდა ქალაქებსა და დაბნებსა და ასწავებდა და წარიგზავნებოდა იერუსალჱმად.

Verse: 23  Link to ntkpl   და ჰრქუა ვინმე მას: უფალო, უკეთუ მცირედ არიან ცხოვრებულნი? ხოლო თავადმან ჰრქუა მათ:

Verse: 24  Link to ntkpl   იღუაწეთ შესლვად იწროსა მისგან კარისა, ხოლო გეტყჳ თქუენ: მრავალნი ეძიებდენ შესლვად და ვერ უძლონ.

Verse: 25  Link to ntkpl   ვინათგან აღდგეს სახლისა უფალი და დაჰჴშას კარი, და გარეშე სდგეთ და იწყოთ რეკად კარსა და ეტყოდით: უფალო, უფალო, განგჳღე ჩუენ! მოგიგოს და გრქუას თქუენ: არა გიცნი თქუენ, ვინანი ხართ.

Verse: 26  Link to ntkpl   მაშინ იწყოთ სიტყვად: ვჭამდით წინაშე შენსა და ვსვემდით და უბანთა ჩუენთა ზედა გუასწავებდ.

Verse: 27  Link to ntkpl   და გრქვას: არა გიცნი, ვინანი ხართ; განმეშორენით ჩემგან ყოველნი მოქმედნი უშჯულოებისანი.

Verse: 28  Link to ntkpl   მუნ იყოს ტირილი და ღრჭენი კბილთა, რაჟამს იხილოთ აბრაჰამი, ისაკი და იაკობი და ყოველნი წინაწარმეტყუელნი სასუფეველსა ღმრთისასა და თქუენ განსხმულნი გარეშე.

Verse: 29  Link to ntkpl   და მოვიდოდიან მზისა აღმოსავალით და მზისა დასავალით, ჩრდილოთ და სამხრით და ინაჴ-იდგმიდენ სასუფეველსა ღმრთისასა.

Verse: 30  Link to ntkpl   და აჰა ესერა არიან უკანასკნელნი, რომელნი იყვნენ პირველ, და არიან პირველნი, რომელნი იყვნენ უკანასკნელ.

Verse: 31  Link to ntkpl   მას დღესა შინა მო-ვინმე-ვიდეს იესოსა ფარისეველნი და ეტყოდეს მას: განვედ და წარვედ ამიერ, რამეთუ ჰეროდე გეძიებს შენ მოკლვად.

Verse: 32  Link to ntkpl   ხოლო თავადმან მიუგო და ჰრქვა მათ: მივედით და არქუთ მელსა მას: აჰა ესერა განვასხამ ეშმაკთა და კურნებათა აღვასრულებ დღეს და ხვალე, და ზეგე აღვესრულები.

Verse: 33  Link to ntkpl   რამეთუ ჯერ-არს ჩემდა დღესა და ხვალე და ზეგე წარსლვად, რამეთუ ვერ ეგების წინაწარმეტყუელი გარეშე იერუსალჱმსა წარწყმედად.

Verse: 34  Link to ntkpl   იერუსალიმ, იერუსალიმ, რომელმან მოსწყჳდენ წინაწარმეტყუელნი და ქვა დაჰკრიბე მოვლინებულთა შენდა, რავდენ გზის მინდა შეკრება შვილთა შენთა, ვითარცა სახედ მფრინველმან თჳსნი მართუენი ფრთეთა ქუეშე, და არა ინებეთ!

Verse: 35  Link to ntkpl   აჰა ესერა დაუტევნეთ თქუენ სახლნი თქუენნი ოჴრად. გეტყჳ თქუენ: არღარა მიხილოთ მე ამიერითგან, ვიდრემდე სთქუათ: კურთხეულ არს მომავალი სახელითა უფლისაჲთა!

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.