Šamaṭi samǯi ġineh savaxṭan üšenen, čupuġon häzirbi adeġala oyurxo exṭi gärämzoġoy ṭo͑ġo͑lṭun taci. Bäzi q̇eräz amdarxoval šoṭoġoxun sagala harṭun. *
Gärämzoġoy ćomosṭa bakala źena fərəpiṭun aḳi.
Ama bona baci Q̣onʒ́ux Isusi meyidä teṭun bä͑ġä͑bi.
Šoṭoġoy me äšläxun čäšmišäki vaxṭesṭa c̣ä͑q̇ ḳinä c̣aldala paltar lapi ṗä͑ išq̇ar bürdän ičodoy be͑ś aḳeci.
Čupux kala q̇i͑ye boš ćooq̇a pasṭṭunci. Išq̇arxon xavarṭun haq̇i: "Heṭaynaḳ vä͑n Dirisṭṭu ṗuriṭoġoy aranenan qä͑vesa?
Šo memiya butene, Šo be͑yin bakene! Hälä Galileyina bakaṭan Šoṭin vä͑x piṭu ef eyex badanan.
Peney ki, "Insani Ġar günaxbala amdarxoy kiye tadeġalane, xače loxol suruḳ bakalane, xibimǯi ġineal be͑yin bakalaneǯ".
Čupuġonal Isusi äyitmoġo eyexṭun badi.
Gärämzinaxun qaybakala čupuġon moṭoġo bitova Sac̣c̣e šagirdä saal q̇eräz amdarxo bütümä xavarṭun tadi.
Aṗosṭolxo me xavara ṗaṗesṗalorox Magdalinaxun bakala Mariya, Yoxanna, Iaḳovi nana Mariya, saal šoṭoġoxun sagala bakala q̇eräz čupuxey.
Ama me äyitmux aṗosṭolxo mänasuze aḳeci, čupuġoval ve͑teṭunbaki.
P̣yoṭr isä hayzeri gärämzoġoy täräfe ṭiṭeri. Šoṭin koc̣baki täkč̣ä bäč̣ürpi parčoġone aḳi, me äšurxoval mat mandi iz ḳoyane qaybaki.
Haṭe ġi šagirdxoxun ṗo͑ġo͑ Yerusalimaxun alṭməš sṭadii ä͑xilluġa bakala Emmaus c̣ila ayzeṭun taysay. *
Šoṭoġon baki - č̣ovaki bito me äšurxoy barada ičoġoy arane exläṭṭunbsay.
Šoṭoġon exläṭbsun ičoġoy arane fikirä uḳaṭan, Isus Ič iśalainšaki šoṭoġoxun sagala yaq̇e taci.
Ṭetäre baki ki, šoṭoġon Isusa aṭunḳ, ama čalteṭunxi.
Isusen šoṭoġoxun xavare haq̇i: "Vä͑n yaq̇ taysun ef arane heṭay baradanan exläṭbsay? Heṭaynaḳ metär därdlunan?"
Šoṭoġoxun Ḳleoṗa c̣ila sa tanen Isusa ǯoġabe tadi: "Yerusalima mandi, me ġimxoval ṭeṭiya baki äšurxoxun xavar nu bakalo täkč̣ä hunnu?"
Isusen šoṭoġo pine: "Mani äšurxoxun?" Šoṭoġonal Iču piṭun:"Nazaretlu Isusi barada bakala äšurxoxun. Šo Buxaʒ́uġoyq̇a bito amdarxoy be͑ś ämälxosṭal äyitasṭal zorba sa xavartašaley".
Beši kala be͑inśen saal beši kalaṭoġon Šoṭ besbsuni ǯäzinä tasṭeynaḳ biq̇esṭi xača suruḳṗesṭundi.
Yanal umudyanbaksay ki, me Amdar gäläǯäye Israili Čarḳesṭale. Saal ki, me äšurxo xib ġi be͑śe bake.
Üstälik, beš čupuġoy bäziṭoġonal yax määṭṭäl efeṭun: šorox savaxṭan üšenen gärämzoġoṭun tacey.
Ama Šoṭay meyidä ṭeṭiya bä͑ġä͑bes teṭun bake. Čupuġon hari piṭun ki, šoṭoġon Šoṭay dirisṭ baksuna bayan bala angelxoṭyn aḳe.
Yaxun bakiṭoġoy bäziyo gärämzoġo taci ṭiyana čupuġon pi ḳinäḳṭun aḳe, ama Iču teṭun aḳe".
Ṭe vädä Isusen šoṭoġo pine: "Ay haq̇əlsuzxo saal xavartašalxoy süfṭinaxun xavar tasṭuna ve͑bakseynaḳ üḳe boš č̣äyi bakalxo!
Xrisṭos me koruġxo portbsunen me kala hörmätä nu ṗaṗalaney?"
Oša Moiseyaxun burqi bito xavartašalxoy ω͑vel Camurxoy bitoṭusṭa Iz barada bakalṭoġo šoṭoġo q̇andərišebi.
Šorox ičoġoy taġala ayiza iśalainšṭunbaki. Isusen Iču iz yaq̇a davam bala amdar ḳinäḳe tašeri.
Ama šoṭoġon Isusaxun ćo duġi xaišbi piṭun: "Yaxun manda, šoṭaynaḳ ki, biyäne baksa, be͑ġal batksaxe". Šoval šoṭoġoxun mansṭeynaḳ bonane baci
Isusen šoṭoġoxun sulfin bać̣ane arcaṭan, śuma exṭi šükürbala afərənane pi, ǯöybi šoṭoġone tadi.
Me vaxṭ šoṭogoy pulmux qayeci, šoṭoġon Isusa čalṭunxi. Ama Isus šoṭoġoy piyexun aneći.
Šoṭoġon sun-suna piṭun: "Šoṭin yaq̇a yaxun exläṭbi, ω͑vel Camurxo yax q̇andərišaṭan beš üḳ bäč̣üḳeci boteneḳsay ki?"
Šorox haṭe saad hayzeri Yerusalimaṭun qaybaki, Sac̣c̣e šagirdä saal šoṭoġoxun sagala bakalṭoġo gireciṭun aḳi.
Moṭoġon nexṭuniy: "Q̣onʒ́ux serinaxunal be͑yin bakene, Simoni piyesal aḳecene".
Moṭoġonal yaq̇a baki äšurxo, śum ǯöybala vaxṭesṭa Šoṭo hetär čalxsuna exläṭṭunbi.
Moṭoġon me barada exlätbaṭan, Isus Ič šoṭoġoy arane čurpi pine: "Vä͑ynaḳ xeyirq̇an baki!"
Moṭoġon isä čäšmišäki gele q̇i͑ṭunbi, uruf aḳsunaṭun zändbi.
Ama Isusen šoṭoġo pine: "Heṭaynaḳ q̇i͑yanan bafsṭa? Heṭu görä ef üḳe metär fikirxova eysa?
Bez kulmoġoq̇a turmoġo be͑ġanan. Mo Zu Ičzu! Za kuldanan be͑ġanan, šoṭaynaḳ ki, Zasṭa baksuna aḳi ḳinäḳ, urufasṭa yeq̇ saal üq̇en bateneḳsa".
Isusen moṭo pi šoṭoġo Iz kulmoġoq̇a turmoġo aḳesedi.
Šoṭoġon häläl ičoġoy mu͑qexun nu ve͑baki mat mandaṭan Isusen šoṭoġo pine: "Memiya ukala sa šey bune?"
Šoṭoġon sa tikä aṗesṗi čäli saal sa koṭor uć̣e šamṭun tadi.
Isusenal ukuna exṭi šoṭoġoy piin be͑ś käye.
Oša Isusen šoṭoġo pine: "Vä͑xun sagala bakaṭan Bez pi äyitmux moroxe: Moiseyi Ḳanunasṭa, xavartašalxoy girkurxosṭa saal Zaburasṭa Bez barada cameciṭoġo bex ṗaṗesbsune lazəm".
Moṭoxun oša ω͑vel Camurxo q̇amišaḳseynaḳ šoṭoġoy beyinäne qaypi.
Isusen šoṭoġo pine: "Metäre camece: Xrisṭos koruġ zapi xib ġi oša ṗuriṭoġoy aranexun be͑yin bakalane.
Yerusalimaxun burq̇i bito millätxoynaḳ ičoġoy günaxxo baġəšlainšaḳseynaḳ toobabsun Šoṭay c̣iyen karooz bakalane.
Vä͑n me äšurxoy šaidxonan.
Mone, Zu Bez Bavan äyit tadiṭu vä͑ynaḳ yaq̇aboz. Vä͑n isä, göynuxun eġala zora haq̇amin, Yerusalim šähäre mandanan".
Isusen šoṭoġo šähärexun č̣evḳi Beṭ-Anyayal ciriḳ enečeri, Iz kula alabi šoṭoġo xeyir-bäräkäṭe tadi.
Xeyir-bäräkät tadi šoṭoġoxun ä͑xilebaki, göynule e͑qeci.
Iz šagirdxon Šoṭo bulṭun ḳoc̣bi, kala mu͑qluġenal Yerusalimaṭun qaybaki.
Šorox hämišä Buxaʒ́uġo alxəšbsun Buxaʒ́uġoy ḳoyaṭun baksay.
