და მოსეს ჰრქუა: აღმოვედ შენ და აჰრონ და ნაბად და აბიუდ უფლისა და სამეოც და ათნი მოხუცებულნი ისრაჱლისანი და თაყუანის-სცენ შორით უფალსა.
და შეეახლოს მოსე ხოლო ღმერთსა, ხოლო იგინი არა მიეახლნენ და ერი ნუ აღმოვალნ მათ თანა.
შევიდა მოსე და უთხრნა ერსა მას ყოველნი სიტყუანი ღმრთისანი და სამართალნი მისნი. მიუგო ერმან მან ჴმითა დიდითა და ჰრქუეს: ყოველთავე სიტყუათა რომელთა იტყოდა უფალი, ვყოთ და ვისმინოთ.
და დაწერნა მოსე ყოველნი ესე სიტყუანი უფლისანი. აღიმსთო მოსე განთიად და აღაშჱნა საკურთხეველი მთასა მას ქუეშე ათორმეტითა ქვითა მსგავსად ათორმეტთა ტომთა ისრაჱლისათა.
და წარავლინა მოსე ჭაბუკები იგი ძეთა ისრაჱლისათაჲ და შეწირეს მსხუერპლები და შესაწირავი იგი ცხორებისაჲ ღმრთისა ზუარაკები.
და მოიღო მოსე ზოგი იგი სისხლისაჲ მის და შთაასხა ტაკუკსა, ხოლო ზოგი იგი სისხლისაჲ მის მოაპკურა გარემოჲს საკურთხეველსა შორს.
და მოიღო წიგნი იგი შჯულისაჲ და აღმო/უკითხა Page of ms. O: 105r ყურთა მიმართ ერისათა და თქუეს: ყოველივე, რომელი თქუა უფალმან, ვყოთ და ვისმინოთ.
მოიღო მოსე სისხლი იგი, აპკურა ერსა მას და თქუა: ესე არს სისხლი აღთქუმისაჲ, რომელი აღუთქუა უფალმან ყოველთათჳს სიტყუათა ამათ.
და აღვიდა მოსე და აჰრონ და ნაბად და აბიუდ და სამეოც და ათნი მოხუცებულნი ისრაჱლისანი
და იხილეს, სადა-იგი დგა მუნ ღმერთი ისრაჱლისაჲ და ქუეშე ფერჴთა მისთა ვითარცა ქმნულებაჲ ალიზისაჲ ანთრაკი საფირონი ვითარცა სამყაროჲ ცისაჲ სიწმიდით.
და რჩეულთაგანი ისრაჱლისათა არავინ მოკუდა არცა ერთი; და იხილეს ადგილი იგი ღმრთისაჲ და ჭამეს და სუეს.
და ჰრქუა უფალმან მოსეს: აღმოვედ ჩემდა მთად და იყავ მუნ და მოგცნე შენ ფიცარნი ქვისანი, შჯული და მცნებანი ჩემნი, რომელი დავწერე შჯულის დებად მათა.
აღდგა მოსე და ისო წინაშე მდგომელი მისი, აღვიდეს მთასა მას ღმრთისასა.
და მოხუცბულთა მათ ჰრქუა: დადუმენით თქუენ მანდა, ვიდრემდე მოვიდე თქუენდა, და აჰა-ესერა აჰრონ და ორ თქუენ თანა. უკუეთუ ვისმე ედვას საშჯელი, მივედინ მათა.
და აღვიდეს მოსე და ისო მთასა მას და დაფარა ღრუბელმან მთაჲ იგი.
... და უწოდა უფალი მოსეს მეშჳდესა დღესა ღრუბლით გამო.
ხოლო ხილვაჲ იგი დიდებისა ღმრთისაჲ ვითარცა ცეცხლი აღატყდებოდა Page of ms. O: 105v თხემსა ზედა მის მთისასა წინაშე ძეთა ისრაჱლისათა.
და შევიდა მოსე შოვრის ღრუბელსა მას და აღვიდა მთასა მას და იყო მუნ მთასა მას ზედა ორმეოც დღე და ორმეოც ღამე.
