TITUS Texts: Vetus Testamentum graece iuxta LXX interpretes

Chapter: 11
Verse: 1 ῾Υπολαβὼν δὲ Σωϕαρ ὁ Μιναῖος λέγει
Verse: 2 ῾Ο τὰ πολλὰ λέγων καὶ ἀντακούσεται·
ἢ καὶ ὁ εὔλαλος οἴεται εἶναι δίκαιος;
εὐλογημένος γεννητὸς γυναικὸς ὀλιγόβιος.
Verse: 3 μὴ πολὺς ἐν ῥήμασιν γίνου,
οὐ γάρ ἐστιν ὁ ἀντικρινόμενός σοι.
Verse: 4 μὴ γὰρ λέγε ὅτι Καϑαρός εἰμι τοῖς ἔργοις
καὶ ἄμεμπτος ἐναντίον αὐτοῦ.
Verse: 5 ἀλλὰ πῶς ἂν ὁ κύριος λαλήσαι πρὸς σέ;
καὶ ἀνοίξει χείλη αὐτοῦ μετὰ σοῦ .S
Verse: 6 εἶτα ἀναγγελεῖ σοι δύναμιν σοϕίας,
ὅτι διπλοῦς ἔσται τῶν κατὰ σέ·
καὶ τότε γνώσῃ ὅτι ἄξιά σοι ἀπέβη ἀπὸ κυρίου ὧν ἡμάρτηκας.
Verse: 7 ἦ ἴχνος κυρίου εὑρήσεις
ἢ εἰς τὰ ἔσχατα ἀϕίκου, ἃ ἐποίησεν ὁ παντοκράτωρ;
Verse: 8 ὑψηλὸς ὁ οὐρανός, καὶ τί ποιήσεις;
βαϑύτερα δὲ τῶν ἐν ᾅδου τί οἶδας;
Verse: 9 ἢ μακρότερα μέτρου γῆς
ἢ εὔρους ϑαλάσσης;
Verse: 10 ἐὰν δὲ καταστρέψῃ τὰ πάντα, τίς ἐρεῖ αὐτῷ Τί ἐποίησας;
Verse: 11 αὐτὸς γὰρ οἶδεν ἔργα ἀνόμων,
ἰδὼν δὲ ἄτοπα οὐ παρόψεται.
Verse: 12 ἄνϑρωπος δὲ ἄλλως νήχεται λόγοις,
βροτὸς δὲ γεννητὸς γυναικὸς ἴσα ὄνῳ ἐρημίτῃ.
Verse: 13 εἰ γὰρ σὺ καϑαρὰν ἔϑου τὴν καρδίαν σου,
ὑπτιάζεις δὲ χεῖρας πρὸς αὐτόν,
Verse: 14 εἰ ἄνομόν τί ἐστιν ἐν χερσίν σου,
πόρρω ποίησον αὐτὸ ἀπὸ σοῦ,
ἀδικία δὲ ἐν διαίτῃ σου μὴ αὐλισϑήτω.
Verse: 15 οὕτως γὰρ ἀναλάμψει σου τὸ πρόσωπον ὥσπερ ὕδωρ καϑαρόν,
ἐκδύσῃ δὲ ῥύπον καὶ οὐ μὴ ϕοβηϑῇς·
Verse: 16 καὶ τὸν κόπον ἐπιλήσῃ
ὥσπερ κῦμα παρελϑὸν καὶ οὐ πτοηϑήσῃ·
Verse: 17 ἡ δὲ εὐχή σου ὥσπερ ἑωσϕόρος,
ἐκ δὲ μεσημβρίας ἀνατελεῖ σοι ζωή·
Verse: 18 πεποιϑώς τε ἔσῃ ὅτι ἔστιν σοι ἐλπίς,
ἐκ δὲ μερίμνης καὶ ϕροντίδος ἀναϕανεῖταί σοι εἰρήνη.
Verse: 19 ἡσυχάσεις γάρ, καὶ οὐκ ἔσται ὁ πολεμῶν σε·
μεταβαλόμενοι δὲ πολλοί σου δεηϑήσονται.
Verse: 20 σωτηρία δὲ αὐτοὺς ἀπολείψει·
ἡ γὰρ ἐλπὶς αὐτῶν ἀπώλεια,
ὀϕϑαλμοὶ δὲ ἀσεβῶν τακήσονται.

This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.