TITUS
Vetus Testamentum graece iuxta LXX interpretes
Part No. 804
Previous part

Chapter: 15 
Verse: 1  ῾Υπολαβὼν δὲ Ελιϕας ὁ Θαιμανίτης λέγει
Verse: 2  Πότερον σοϕὸς ἀπόκρισιν δώσει συνέσεως πνεύματος
καὶ ἐνέπλησεν πόνον γαστρὸς
Verse: 3  ἐλέγχων ἐν ῥήμασιν, οἷς οὐ δεῖ,
ἐν λόγοις, οἷς οὐδὲν ὄϕελος;
Verse: 4  οὐ καὶ σὺ ἀπεποιήσω ϕόβον,
συνετελέσω δὲ ῥήματα τοιαῦτα ἔναντι τοῦ κυρίου;
Verse: 5  ἔνοχος εἶ ῥήμασιν στόματός σου
οὐδὲ διέκρινας ῥήματα δυναστῶν·
Verse: 6  ἐλέγξαι σε τὸ σὸν στόμα καὶ μὴ ἐγώ,
τὰ δὲ χείλη σου καταμαρτυρήσουσίν σου.
Verse: 7  τί γάρ; μὴ πρῶτος ἀνϑρώπων ἐγενήϑης;
ἢ πρὸ ϑινῶν ἐπάγης;
Verse: 8  ἦ σύνταγμα κυρίου ἀκήκοας,
εἰς δὲ σὲ ἀϕίκετο σοϕία;
Verse: 9  τί γὰρ οἶδας, ὃ οὐκ οἴδαμεν;
ἢ τί συνίεις, ὃ οὐχὶ καὶ ἡμεῖς;
Verse: 10  καί γε πρεσβύτης καί γε παλαιὸς ἐν ἡμῖν
βαρύτερος τοῦ πατρός σου ἡμέραις.S
Verse: 11  ὀλίγα ὧν ἡμάρτηκας μεμαστίγωσαι,
μεγάλως ὑπερβαλλόντως λελάληκας.
Verse: 12  τί ἐτόλμησεν ἡ καρδία σου,
ἢ τί ἐπήνεγκαν οἱ ὀϕϑαλμοί σου,
Verse: 13  ὅτι ϑυμὸν ἔρρηξας ἔναντι κυρίου,
ἐξήγαγες δὲ ἐκ στόματος ῥήματα τοιαῦτα;
Verse: 14  τίς γὰρ ὢν βροτός, ὅτι ἔσται ἄμεμπτος,
ἢ ὡς ἐσόμενος δίκαιος γεννητὸς γυναικός;
Verse: 15  εἰ κατὰ ἁγίων οὐ πιστεύει,
οὐρανὸς δὲ οὐ καϑαρὸς ἐναντίον αὐτοῦ.
Verse: 16  ἔα δὲ ἐβδελυγμένος καὶ ἀκάϑαρτος,
ἀνὴρ πίνων ἀδικίας ἴσα ποτῷ.
Verse: 17  ἀναγγελῶ δέ σοι, ἄκουέ μου·
ἃ δὴ ἑώρακα, ἀναγγελῶ σοι,
Verse: 18  ἃ σοϕοὶ ἐροῦσιν καὶ οὐκ ἔκρυψαν πατέρας αὐτῶν·
Verse: 19  αὐτοῖς μόνοις ἐδόϑη ἡ γῆ,
καὶ οὐκ ἐπῆλϑεν ἀλλογενὴς ἐπ' αὐτούς.
Verse: 20  πᾶς ὁ βίος ἀσεβοῦς ἐν ϕροντίδι,
ἔτη δὲ ἀριϑμητὰ δεδομένα δυνάστῃ,
Verse: 21  ὁ δὲ ϕόβος αὐτοῦ ἐν ὠσὶν αὐτοῦ·
ὅταν δοκῇ ἤδη εἰρηνεύειν,
ἥξει αὐτοῦ ἡ καταστροϕή.
Verse: 22  μὴ πιστευέτω ἀποστραϕῆναι ἀπὸ σκότους·
ἐντέταλται γὰρ ἤδη εἰς χεῖρας σιδήρου,
Verse: 23  κατατέτακται δὲ εἰς σῖτα γυψίν·
οἶδεν δὲ ἐν ἑαυτῷ ὅτι μένει εἰς πτῶμα.
ἡμέρα δὲ αὐτὸν σκοτεινὴ στροβήσει,
Verse: 24  ἀνάγκη δὲ καὶ ϑλῖψις αὐτὸν καϑέξει
ὥσπερ στρατηγὸς πρωτοστάτης πίπτων.
Verse: 25  ὅτι ἦρκεν χεῖρας ἐναντίον τοῦ κυρίου,
ἔναντι δὲ κυρίου παντοκράτορος ἐτραχηλίασεν,
Verse: 26  ἔδραμεν δὲ ἐναντίον αὐτοῦ ὕβρει
ἐν πάχει νώτου ἀσπίδος αὐτοῦ,
Verse: 27  ὅτι ἐκάλυψεν τὸ πρόσωπον αὐτοῦ ἐν στέατι αὐτοῦ
καὶ ἐποίησεν περιστόμιον ἐπὶ τῶν μηρίων.S
Verse: 28  αὐλισϑείη δὲ πόλεις ἐρήμους,
εἰσέλϑοι δὲ εἰς οἴκους ἀοικήτους·
ἃ δὲ ἐκεῖνοι ἡτοίμασαν, ἄλλοι ἀποίσονται.
Verse: 29  οὔτε μὴ πλουτισϑῇ, οὔτε μὴ μείνῃ αὐτοῦ τὰ ὑπάρχοντα·
οὐ μὴ βάλῃ ἐπὶ τὴν γῆν σκιὰν
Verse: 30  οὐδὲ μὴ ἐκϕύγῃ τὸ σκότος·
τὸν βλαστὸν αὐτοῦ μαράναι ἄνεμος,
ἐκπέσοι δὲ αὐτοῦ τὸ ἄνϑος.
Verse: 31  μὴ πιστευέτω ὅτι ὑπομενεῖ,
κενὰ γὰρ ἀποβήσεται αὐτῷ·
Verse: 32  ἡ τομὴ αὐτοῦ πρὸ ὥρας ϕϑαρήσεται,
καὶ ὁ ῥάδαμνος αὐτοῦ οὐ μὴ πυκάσῃ·
Verse: 33  τρυγηϑείη δὲ ὥσπερ ὄμϕαξ πρὸ ὥρας,
ἐκπέσοι δὲ ὡς ἄνϑος ἐλαίας.
Verse: 34  μαρτύριον γὰρ ἀσεβοῦς ϑάνατος,
πῦρ δὲ καύσει οἴκους δωροδεκτῶν.
Verse: 35  ἐν γαστρὶ δὲ λήμψεται ὀδύνας,
ἀποβήσεται δὲ αὐτῷ κενά,
ἡ δὲ κοιλία αὐτοῦ ὑποίσει δόλον.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.