TITUS
Vetus Testamentum graece iuxta LXX interpretes
Part No. 807
Previous part

Chapter: 18 
Verse: 1  ῾Υπολαβὼν δὲ Βαλδαδ ὁ Σαυχίτης λέγει
Verse: 2  Μέχρι τίνος οὐ παύσῃ;
ἐπίσχες, ἵνα καὶ αὐτοὶ λαλήσωμεν.
Verse: 3  διὰ τί ὥσπερ τετράποδα σεσιωπήκαμεν ἐναντίον σου;
Verse: 4  κέχρηταί σοι ὀργή.
τί γάρ; ἐὰν σὺ ἀποϑάνῃς, ἀοίκητος ἡ ὑπ' οὐρανόν;
ἢ καταστραϕήσεται ὄρη ἐκ ϑεμελίων;
Verse: 5  καὶ ϕῶς ἀσεβῶν σβεσϑήσεται,
καὶ οὐκ ἀποβήσεται αὐτῶν ἡ ϕλόξ·
Verse: 6  τὸ ϕῶς αὐτοῦ σκότος ἐν διαίτῃ,
ὁ δὲ λύχνος ἐπ' αὐτῷ σβεσϑήσεται.
Verse: 7  ϑηρεύσαισαν ἐλάχιστοι τὰ ὑπάρχοντα αὐτοῦ,
σϕάλαι δὲ αὐτοῦ ἡ βουλή.
Verse: 8  ἐμβέβληται δὲ ὁ ποὺς αὐτοῦ ἐν παγίδι·
ἐν δικτύῳ ἑλιχϑείη.
Verse: 9  ἔλϑοισαν δὲ ἐπ' αὐτὸν παγίδες·
κατισχύσει ἐπ' αὐτὸν διψῶντας.
Verse: 10  κέκρυπται ἐν τῇ γῇ σχοινίον αὐτοῦ
καὶ ἡ σύλλημψις αὐτοῦ ἐπὶ τρίβων.S
Verse: 11  κύκλῳ ὀλέσαισαν αὐτὸν ὀδύναι,
πολλοὶ δὲ περὶ πόδας αὐτοῦ ἔλϑοισαν ἐν λιμῷ στενῷ.
Verse: 12  πτῶμα δὲ αὐτῷ ἡτοίμασται ἐξαίσιον.
Verse: 13  βρωϑείησαν αὐτοῦ κλῶνες ποδῶν,
κατέδεται δὲ τὰ ὡραῖα αὐτοῦ ϑάνατος.
Verse: 14  ἐκραγείη δὲ ἐκ διαίτης αὐτοῦ ἴασις,
σχοίη δὲ αὐτὸν ἀνάγκη αἰτίᾳ βασιλικῇ.
Verse: 15  κατασκηνώσει ἐν τῇ σκηνῇ αὐτοῦ ἐν νυκτὶ αὐτοῦ,
κατασπαρήσονται τὰ εὐπρεπῆ αὐτοῦ ϑείῳ.
Verse: 16  ὑποκάτωϑεν αἱ ῥίζαι αὐτοῦ ξηρανϑήσονται,
καὶ ἐπάνωϑεν ἐπιπεσεῖται ϑερισμὸς αὐτοῦ.S
Verse: 17  τὸ μνημόσυνον αὐτοῦ ἀπόλοιτο ἐκ γῆς,
καὶ ὑπάρχει ὄνομα αὐτῷ ἐπὶ πρόσωπον ἐξωτέρω.S
Verse: 18  ἀπώσειεν αὐτὸν ἐκ ϕωτὸς εἰς σκότος.
Verse: 19  οὐκ ἔσται ἐπίγνωστος ἐν λαῷ αὐτοῦ,
οὐδὲ σεσῳσμένος ἐν τῇ ὑπ' οὐρανὸν ὁ οἶκος αὐτοῦ,
ἀλλ' ἐν τοῖς αὐτοῦ ζήσονται ἕτεροι.
Verse: 20  ἐπ' αὐτῷ ἐστέναξαν ἔσχατοι,
πρώτους δὲ ἔσχεν ϑαῦμα.
Verse: 21  οὗτοί εἰσιν οἶκοι ἀδίκων,
οὗτος δὲ ὁ τόπος τῶν μὴ εἰδότων τὸν κύριον.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.