TITUS
Vetus Testamentum iberice: codd. Oshki & Jerusalem
Part No. 270
Previous part

Chapter: 21  
Verse: 1   Link to mcat Link to sept   ხილვაჲ უდაბნოჲსაჲ. ვითარცა ნიავქარი უდაბნოჲთ გამოვიდის, უდაბნოჲთ მომავალი, ქუეყანისაგან საშინელისა.

Verse: 2   Link to mcat Link to sept   საშინელ არს, ხილვაჲ ახალი მომეთხრა მე, რომელი შეურაცხ-ჰყოფს შეურაცხ-ჰყოფდინ და რომელი უშჯულოებს უშჯულოებდინ: ჩემდა მომართ ელამიტელნი, და მოციქულნი სპარსთანი ჩემდა მოვლენ: აწ სულთ-ვითქუნე და ნუგეშინის-ვსცე თავსა ჩემსა.

Verse: 3   Link to mcat Link to sept   ამისთჳს აღივსნეს წელნი ჩემნი დაჴსნითა, და სალმობათა შემიპყრეს მე ვითარცა შობადი: ვცოდე არა სმენად, ვისწრაფე არა ხილვად.

Verse: 4   Link to mcat Link to sept   გული ჩემი სცთების, და უშჯულოებაჲ დამფარავს მე: სული ჩემი მიიწია შიშსა.

Verse: 5   Link to mcat Link to sept   განჰმზადეთ ტაბლაჲ, ჭამეთ და სუთ: აღდეგით მთავარნო, განმზადეთ ფარები.

Verse: 6   Link to mcat Link to sept   რამეთუ ესრეთ მრქუა მე უფალმან, წარვედ და დაადგინე თავისა შენისა მსტუარი და რაჲცა იხილო მითხარ მე.

Verse: 7   Link to mcat Link to sept   და ვიხილენ მჴედარნი ორნი მჴედარი ვირსა და მჴედარი აქლემსა: ისმინე ჰამბავი <მრავალი>.

Verse: 8   Link to mcat Link to sept   და მოუწოდე ურიას სამსტოვროსა, უფალი იტყოდა: დავდეგ საცოსა ჩემსა დღჱ ყოველ და ბანაკსა ჩემსა ზედა მე დავდეგ ღამჱ ყოველ.

Verse: 9   Link to mcat Link to sept   და აჰა ესერა მოვიდოდა მჴედრები კრებულთაჲ: მომიგო და მრქუა: დაეცა ბაბილონი და ყოველნი საკერპონი მისნი, და ყოველი ჴელით-ქმნული მისი შეიმუსრა ქუეყანასა ზედა.

Verse: 10   Link to mcat Link to sept   ისმინეთ დაშთომილთა მაგათ და ლმობიერთა: ისმინეთ რაჲ იგი მესმა უფლისაგან საბაოთისა, რომელი იგი ღმერთმან ისრაჱლისამან გითხრა თქუენ./ Page of ms. J: A53r 

Verse: 11   Link to mcat Link to sept   სიტყუაჲ იდუმიაჲსათჳს. ჩემდა მოჰხადის სეირისგან, დაიცვენ არდაბაგნი,

Verse: 12   Link to mcat Link to sept   რაჲსა ჰღაღადებ მცველისა მიმართ ღამითგან ესრეთ, თქუა მცველი: მოვიდა განთიად და ღამჱ: უკუეთუ ეძიებთ ეძიებდით. და ჩემ თანა დაადგერით მაღნარსა შინა.

Verse: 13   Link to mcat Link to sept   სიტყუაჲ არაბიაჲსაჲ. მაღნარსა მწუხრი დაიძინან გზასა დედანიმისასა,

Verse: 14   Link to mcat Link to sept   მიგებად წყურიელთა, მოიღეთ წყალი, მკჳდრთა სოფლისა თემანისათა. პურითა მიეგებვოდეთ მეოტთა

Verse: 15   Link to mcat Link to sept   სიმრავლისათჳს მეოტთაჲსა, და სიმრავლისათჳს შეცთომილთაჲსა, და სიმრავლისათჳს მახჳლისა, და სიმრავლისათჳს მბრძოლთაჲსა, და სიმრავლისათჳს ისართა მორთხმულთა, და სიმრავლისათჳს დაცემულთა ბრძოლასა შინა.

Verse: 16   Link to mcat Link to sept   რამეთუ ესრე მრქუა მე უფალმან ვითარმედ წელიწადი <ვითარცა> მორეწისაჲ, და მოაკლდეს დიდებაჲ ძეთა კედარისათაჲ.

Verse: 17   Link to mcat Link to sept   და ნეშტნი იგი მეისართაჲ, ძეთა კედარისათაჲ რიცხჳთ ძლიერთაჲ იყვნენ მცირედ, რამეთუ უფალი ღმერთი ისრაჱლისაჲ ესრეთ იტყოდა.

Next part


This text is part of the TITUS edition of Vetus Testamentum iberice: codd. Oshki & Jerusalem.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.