Me äyitmoġo vä͑x nexzu ki, ef ve͑luġ nu aćane.
Vä͑x sinagogxoxun šäṗeġalṭun. Hamal ṭetär sa vädä eġale ki, vä͑x besṗalṭin Buxaʒ́uġo q̇ulluġbi baksuna fikirbale.
Šoṭoġon moṭo balṭun, šoṭaynaḳ ki, nä Bava teṭun čalxi, nä Za.
Ama moṭoġo vä͑x exlätezbi ki, ṭe vaxṭ eġaṭan Bez pi äyitmoġo ef eyex badanan.
Häysä isä Za Yaq̇abiṭay ṭo͑ġo͑lez taysa, ama vä͑xun šuḳḳalen Zaxun "mayan taysa?" pi tene xavar haq̇sa.
Šoṭaynaḳ ki, me Bezi piṭoġon vä͑x därdäne badi.
Ama Zu vä͑x serinaz nex: Bezi taysun ef xeyrinäne. Šoṭaynaḳ ki, nu taġayiz, *Kömäybal ef ṭo͑ġo͑l tene eġal, ama taġayiz, Šoṭo vä͑ynaḳ yaq̇aboz.
Šo eġaṭan günaxi, düzgünluġi saal divani barada fikiri düz nu baksuna avabakesṭale:
günaxi barada, šoṭaynaḳ ki, Za ve͑luġ tene bu;
düzgünluġi barada, šoṭaynaḳ ki, Zu Bavay ṭo͑ġo͑lez taysa, ene Za tenan aḳal;
divani barada, šoṭaynaḳ ki, me dünyäni kalaluġbaleynaḳ * ene q̇ärar tadecene.
Hälä vä͑x Bezi uḳala gele äyitzax bu, ama häysä korox ef haq̇əla tene ṗaq̇al.
Serina ćoyel č̣evḳala Uruf eġaṭan isä Šoṭin vä͑x hägigi seri bakala yaq̇en tašale. Axəri hiḳḳala Ičuxun tene exlätṗal, ama ḳä ibakenesa šoṭo uḳale saal oša bakala äšurxo avabakesṭale.
Šoṭin Bezi c̣iya alabale, šoṭaynaḳ ki, Zu pi äyitmoġo vä͑x avabakesṭale.
Bezi Bavay ḳä bunesa, Bezine. Koṭo göräz "Bezi äyitmoġo vä͑x avabakesṭale" pi.
Male mande, Za ene tenan aḳal, ama gele tene č̣ovakal ki, Za ṗurum \ aḳalnan". *
Ṭe vädä Isusi bäzi šagirdxon sun-suna piṭun: "Male mande, Za ene tenan aḳal, ama gele tene č̣ovakal ki, Za ṗurum aḳalnan" saal "šoṭaynaḳ ki, Bavay ṭo͑ġo͑lez taysa" pi me äyitmux ḳä upsuna?"
Šoṭoġon ičoġoy arane xavarṭun haq̇say: "Male mande", "gele tene č̣ovakal" ḳä upsuna? Yan moṭo teyan q̇amišaksa".
Isusen Ičuxun ḳä xavar haq̇alṭuniysa avabaki šoṭoġo pine: "Male mande, Za ene tenan aḳal, ama gele tene č̣ovakal ki, Za ṗurum aḳalnan" pi Bezi äyiti baradanan sun-sunaxun xavar haq̇sa?
Serina, serinaz vä͑x nex: vä͑n o͑no͑pi ziziḳalnan, dünyä isä mu͑q bakale. Vä͑n därde boš bakalnan, ama ef därd mu͑qluġa fərəḳale.
Čuġon äyel ečala vädine q̇ać̣e zaṗe, šoṭaynaḳ ki, iz vädä ṗaṗene. Ama äylä ečeriṭuxun oša dünyäne sa amdar ešṭuna görä iz mu͑qexun zapi q̇ać̣a eyexun č̣eveḳsa.
Vä͑nal häysä därdlunan. Ama Zu vä͑x ṗurum aḳoz, ṭe vädä vä͑n mu͑qbakalnan, šuḳḳalenal me mu͑qluġa vä͑xun haq̇es tene bakal.
Ṭe ġi Zaxun hiḳḳal tenan xavar haq̇al. Serina, serinaz vä͑x nex: Bezi c̣iyen * Bavaxun ḳä čureġaynan, Šoṭin vä͑x tadale.
Häysäṭinäl ciriḳ Bezi c̣iyen hiḳḳal \ tenan čurece. Čurekinan, tadeġale, ef mu͑qluġal bol bakale.
Vä͑x moṭoġo mäsäloġonez nexey. Ama ṭetär sa vädäne eysa ki, ene vä͑xun mäsäloġon tez exlätṗal, Bavay barada vä͑ynaḳ qay exlätṗoz.
Ṭe ġi vä͑n Bavaxun Bezi c̣iyen xaišbalnan. Zu Bezi ef gala Šoṭoxun sa šey xoyinśbsuna tez nex.
Axəri Bavan Ičin vä͑x čuresa, šoṭaynaḳ ki, vä͑n Za čurnanci, Buxaʒ́uġoy ṭo͑o͑xun Bezi eysunal ve͑nanbaki.
Bavay ṭo͑o͑xun me dünyänez hari, isääl me dünyänexun č̣eri ṗurum Bavay ṭo͑ġo͑lez taysa".
Ṭe vädä Iz šagirdxon piṭun: "Häysä Hun qayen exlätpsa, sal sa mäsäläl ten nex.
Isä q̇amišyanbaksa ki, Hun här šeya Vaxun xavar haq̇alṭuxun be͑śen ava. Koṭo göräl Vi Buxaʒ́uġoxun eysuna ve͑yan".
Isusen šoṭoġo pine: "Häysä hägigiyal ve͑nan?
Mone, Za savsa barti här soġo iz ḳoya careġala vaxṭ enesa, šo ene harene. Ama Zu savsa tezu, šoṭaynaḳ ki, Bava Zaxune.
Vä͑n Zasṭa serluġ bä͑ġä͑banan piz moṭoġo vä͑ynaḳ exlätṗi. Me dünyäne äzyäti bošnan, ama üḳlü bakanan! Zu me dünyäni šärä q̇alibez hari".
