Յամին տասներորդի՝ յամսեանն տասներորդի՝ որ օր մի էր ամսոյն, եղեւ բա́ն տ(եառ)ն առ իս՝ եւ ասէ։
Որդի մարդոյ՝ հաստատեա́ զերեսս քո ՛ի վ(ե)ր(այ) փարաւովնի արքային եգիպտացւոց. մարգարէա́ց ՛ի վ(ե)ր(այ) ն(ո)ր(ա)՝ եւ ՛ի վ(ե)ր(այ) ա(մենայ)ն եգիպտոսի,
խօսեա́ց՝ եւ ասասցես։ Ա́յսպէս ասէ տ(է)ր տ(է)ր, ահաւասիկ ես ՛ի վ(ե)ր(այ) քո փարաւովն արքայ եգիպտացւոց վիշա́պ մեծ՝ որ նստիս ՛ի մէջ գետոց. որ ասես թէ ի́մ են գետքս՝ եւ ե́ս արարի զսոսա։
Եւ ե́ս արկից գանդանաւանդ ՛ի կզակս քո, եւ մածուցից զձկունս գետոյդ ՛ի թեւս քո, եւ հանից ՛ի միջոյ քումմէ զգետսդ քո. եւ ա(մենայ)ն ձկունք գետոյդ կցեսցին ՛ի թեւս քո։
եւ կործանեցից զքեզ արագ արա́գ, եւ զա(մենայ)ն ձկունս գետոյդ քոյ։ ընդ երեսս դաշտին անկանիցիս, եւ մի́ ժողովեսցիս, եւ մի́ եւս աւաքեսցիս. զի գազանա́ց երկրի՝ եւ թռչնոց երկնից ետո́ւ զքեզ ՛ի կերակուր։
Եւ ծանիցեն ա(մենայ)ն բնակչքդ եգիպտացւոց թէ ե́ս եմ տ(է)ր. փոխանակ զի եղեր գաւազան եղեգնեայ տանդ ի(սրայէ)լի.
եւ յորժամ յենուին ՛ի քեզ՝ ելանէիր ընդ ձեռս ն(ո)ց(ա), եւ յորժամ բուռն հարկանէր զքէն ա(մենայ)ն ձեռն, եւ յորժ2ամ յենուին ՛ի քեզ՝ խորտակէիր եւ բեկաննակէիր զամ(ենայն) մէջս ն(ո)ց(ա)։
Վ(ա)ս(ն) այնորիկ ա́յսպէս ասէ տ(է)ր տ(է)ր. ահաւադիկ ե́ս ածեմ ՛ի վ(ե)ր(այ) քո սուր, եւ կորուսից ՛ի քէն զմարդ եւ զանասուն։
եւ եղիցի երկիրդ եգիպտացւոց ՛ի կորուստ՝ եւ յաւերակ. եւ ծանիցես թէ ե́ս եմ տ(է)ր։ փոխանակ զի ասէիր՝ թէ գետքս ի́մ են, եւ ես արարի զնոսա.
վ(ա)ս(ն) այդորիկ ահաւադիկ ես ՛ի վ(ե)ր(այ) քո՝ եւ ՛ի վ(ե)ր(այ) ա(մենայ)ն գետոցդ քոց, եւ տաց զերկիրդ եգիպտացւոց յաւերակ՝ եւ ՛ի սուր, եւ ՛ի կորուստ, ՛ի մակդովղայ՝ եւ ՛ի սուհենայ մինչեւ ՛ի սահմանս եթւովպացւոց։
Եւ մի́ անցցէ ընդ նա ոտն մարդոյ. եւ կճղակ անասնոյ մի́ գնասցէ ընդ նա. եւ մի́ բնակսեսցէ ամս քառասուն։
եւ տաց զերկիրն նորա ՛ի կորուստ ՛ի մէջ աւերակ երկրին. եւ քաղաքք նոցա ՛ի մէջ աւերեալ քաղաքաց. եւ եղիցին յապականու(թ)ի(ւն) ամս քառասուն։ եւ ցրուեցից զեգիպտոս ՛ի մէջ ազգաց. եւ հոսեցից զնոսա ընդ գաւառս։
Զի ա́յսպէս ասէ տ(է)ր տ(է)ր, յետ ամացն քառասնից ժողովեցից զեգիպտացիս յազգաց ուր ցրուեցան ՛ի ն(ո)ս(ա)։
եւ դարձուցից զգերութի(ւն) եգիպտացւոցն, եւ բնակեցուցից զն(ո)ս(ա) յերկրին պաթուրէս՝ յերկրին ուստի առան։ եւ եղիցի անդ իշխանու(թ)ի(ւն) մի՝ տառապեալք քան զա(մենայ)ն իշխանու(թ)ի(ւն)ս։
Եւ եղիցի խոնարհագոյն, եւ մի եւս բարձրասցի ՛ի վ(ե)ր(այ) ազգաց։ եւ սակաւաւո́րս արարից զն(ո)ս(ա), զի մի́ բազմասցին ՛ի մէջ ազգաց։
եւ մի́ եւս եղիցին տանն ի(սրայէ)լի յոյս յիշատակի անօրէնու(թ)ե(ան), երթալ զհետ սրտից ն(ո)ց(ա)։ եւ ծանիցեն թէ ե́ս եմ ադոնայի տ(է)ր։
Դարձեալ ՛Ի վերայ Եգիպտոսի։
Եւ եղեւ ՛ի քսաներորդի եւ յեւթներորդի ամին, որ օր մի էր ամսոյն առաջնոյ. եղեւ բան տ(եառ)ն առ իս՝ եւ ասէ։
Որդի մարդոյ, նաբուքոդոնոսոր արքայ բաբելացւոց աշխատեցո́յց զզօրս իւր աշխատութ(եամ)բ մեծաւ ՛ի վ(ե)ր(այ) տիւրոսի։ Ա(մենայ)ն գլուխք կնգացեալք՝ եւ ա(մենայ)ն ուսք գերծեալք. եւ վարձք նմա եւ զօրաց ն(ո)ր(ա) ո́չ եղեն առ ՛ի տիւրոսէ ծառայութե(ան)ն՝ զոր ծառայեցին ինձ ՛ի նմա։
Վ(ա)ս(ն) այնորիկ ա́յսպէս ասէ տ(է)ր տ(է)ր, ահաւասիկ տաց նաբուքոդոնոսորայ արքայի բաբելացւոց զերկիրն եգիպտացւոց։ եւ առցէ զբազմու(թ)ի(ւն) ն(ո)ր(ա), եւ աւարեսցէ զաւար ն(ո)ր(ա), եւ կողոպտեսցէ զկապուտ ն(ո)ր(ա), եւ եղիցի վա́րձ զօրաց ն(ո)ր(ա)։
փոխանակ հարկին յորում ծառայեաց ինձ ՛ի տիւրոս, ետու նմա զերկիրն եգիպտացւոց ընդ ա(մենայ)նի զոր արարին ինձ։ Ա́յսպէս ասէ տ(է)ր տ(է)ր։
յաւուր յայնմիկ ծագեսցէ եղջիւր յա(մենայ)ն տանն ի(սրայէ)լի. եւ քեզ տաց բերան բա́ց ՛ի մէջ ն(ո)ց(ա). եւ ծանիցեն թէ ե́ս եմ տ(է)ր։
