Լուարո́ւք զայս քահանայք, եւ անսացէ́ք տունդ ի(սրայէ)լի. եւ տուն թագաւորիդ ունկնդի́ր լերուք։ քանզի ընդ ձե́զ է դատաստան. զի որոգայթ եղերուք գիտանոցին, եւ իբրեւ զվա́րմ ձգեալ ՛ի գլո́ւխ գահաւանդի՝
զոր որսորդք յո́րս հաստատեցին։ Ե́ս եմ խրատիչ ձեր։
եւս ծանեայ զեփրեմ, եւ ի(սրայ)էլ ո́չ է ՛ի բացեայ յինէն. քանզի այժմ պոռնկեցա́ւ եփրեմ, եւ պղծեցա́ւ ի(սրայ)էլ։
Ո́չ ետուն զխորհուրդս իւրեանց դառնալ առ ա(ստուա)ծ իւրեանց. զի ա́յս պոռնկութե(ան) է ՛ի ն(ո)ս(ա). եւ զտ(է)ր ո́չ ծանեան։
եւ խոնարհեսցի հպարտութի(ւն) ի(սրայէ)լի յերե́սս ն(ո)ր(ա). եւ ի(սրայ)էլ եւ եփրեմ տկարասցին յանօրէնութի(ւն)ս իւրեանց. տկարասցի եւ յուդայ ընդ ն(ո)ս(ա)։
Յորձիւք եւ պատարագօք երթիցեն խնդրել զտ(է)ր, եւ մի́ գտցեն զնա. զի խո́յս ետ ՛ի նոցանէ։
զի զտ(է)ր թողին. քանզի որդիք օտա́րք ծնան ն(ո)ց(ա). արդ՝ այժմ կերիցէ́ զն(ո)ս(ա) երեւիլ, եւ զվիճակս ն(ո)ց(ա)։
Փո́ղ հարէք ՛ի վ(ե)ր(այ) բլրոց. գոչեցէ́ք ՛ի վ(ե)ր(այ) բարձանց. քարո́զ կարդացէք ՛ի տուն ովնայ. թէ յիմարեցաւ բենիամին,
եւ եփրեմ եղեւ յապականու(թ)ի(ւն)։ յաւուրս յանդիմանութե(ան) ՛ի մէջ ազգաց ի(սրայէ)լի ցուցի́ զհաւատարմութի(ւն)ս։
Եղեն իշխանք յուդայ՝ ո(ր)պ(էս) որ փոփոխեն զսահմանս. ՛ի վ(ե)ր(այ) նոցա հեղից իբրեւ զջո́ւր զասպատակ իմ։
Զրկեաց եփրեմ զոսոխ իւր, եւ կոխեաց զիրաւունս. զի սկսաւ երթա́լ զհետ սնոտեաց։
եւ ես իբրեւ զխռո́վ եղէց եփրեմի, եւ իբրեւ զխայթո́ց տանն յուդայ։
Ետես եփրեմ զա́խտ իւր, եւ յուդա զցաւս իւր. եւ գնաց եփրեմ առ ասորեստանեայս, եւ առաքեաց հրեշտակս առ արքայն յարիմայ. եւ նա ո́չ կարաց փրկել զձեզ, եւ ո́չ հանգուցանել զձեզ ՛ի ցաւուց։
Զի ե́ս եմ իբրեւ յաւազ ՛ի վ(ե)ր(այ) եփրեմի, եւ իբրեւ զառեւծ ՛ի վ(ե)ր(այ) տանն յուդայ. եւ յարձակեցայց եւ յափշտակեցից զն(ո)ս(ա). առից, եւ ո́չոք իցէ որ փրկիցէ։
գնացից եւ դարձա́յց ՛ի տեղի իմ, մինչեւ ապականեսցին։ Եւ խնդրեսցեն զերեսս իմ։
