TITUS
Avestan Corpus
Part No. 103
Previous part

Chapter: 9 
Paragraph: 1 
Verse: a    pərəsat̰. zaraϑuštrō. ahurəm. mazdąm:
Verse: b    ahura. mazda.
Verse: c       mainiiō.1 spə̄ništa.
Verse: d       dātarə. gaēϑanąm. astuuaitinąm. aṣ̌āum.
Verse: e    kuϑa. aētaδa. aŋhauua.2 astuuaiṇti.3 maš́iiāka. hąm.vaēnā̊ṇte.
Verse: f    tē. yōi. hąm.nasūm. paiti.iristəm. tanūm. yaoždaiϑiiąn.

Paragraph: 2 
Verse: a    āat̰. mraot̰. ahurō. mazdā̊:
Verse: b    narəm. aṣ̌auuanəm.
Verse: c          spitama. zaraϑuštra.
Verse: d       yō. aŋhat̰. vacō. arš.vacō.
Verse: e          mąϑrəm.1 pərəsō.2 aṣ̌auua.
Verse: f       yō. fraēštəm. apiuuatāite.3 daēnaiiā̊. māzdaiiasnōiš.
Verse: g          yaoždāϑriiāt̰. haca:
Verse: h    hō. pərəϑβe.4 aiŋ́hā̊.5 zəmō. upa.ϑβaršti.6 uruuaranąm.
Verse: i       nauua. vī.bāzuua. drājō.
Verse: j          kəmcit̰. paiti. caϑruṣ̌anąm.

Paragraph: 3  {~ Vd. 3,15}
Verse: a    yat̰. aŋhat̰. aiŋ́hā̊.1 zəmō.
Verse: b          vī.āpō.təməmca.
Verse: c          vī.uruuarō.təməmca.2
Verse: d          yaoždātō.zəmōtəməmca.
Verse: e          huš́ō.zəmōtəməmca.
Verse: f       kambištəmca. aēte. paϑā̊. fraiiąn.
Verse: g          pasuuasca. staorāca.
Verse: h          ātrəmca. ahurahe. mazdā̊.
Verse: i          barəsmaca. aṣ̌aiia. frastarətəm.
Verse: j          narəmca. yim. aṣ̌auuanəm.

Paragraph: 4  {= Vd. 3,16}
Verse: a    dātarə. gaēϑanąm. astuuaitinąm. aṣ̌āum.
Verse: b    cuuat̰. drājō. haca. āϑrat̰.
Verse: c    cuuat̰. drājō. haca. apat̰.
Verse: d    cuuat̰. drājō. haca. barəsmən. frastairiiāt̰.
Verse: e    cuuat̰. drājō. haca. nərəbiiō. aṣ̌auuabiiō.

Paragraph: 5  {= Vd. 3,17}
Verse: a    āat̰. mraot̰. ahurō. mazdā̊:
Verse: b       ϑrisata.gāim. haca. āϑrat̰.
Verse: c       ϑrisata.gāim. haca. apat̰.
Verse: d       ϑrisata.gāim. haca. barəsmən. frastairiiāt̰.
Verse: e       ϑrigāim. haca. nərəbiiō. aṣ̌auuabiiō.

Paragraph: 6 
Verse: a    paoirīm. upa. maγəm. niϑβərəsōiš.1
Verse: b       pasca. hamō. aiβi.gaitīm.2
Verse: c          duua. ərəzu. nismahe.3
Verse: d       pasca. zəmō.4 isaoš.5 aiβi.gaitīm.6
Verse: e          yaϑa. caϑβārō. ərəzuuō.7

Paragraph: 7 
Verse: a    bitīm. upa. maγəm. niϑβərəsōiš.
Verse: b       pasca. hamō. aiβi.gaitīm.
Verse: c          duua. ərəzu. nismahe.
Verse: d       pasca. zəmō. isaoš. aiβi.gaitīm.
Verse: e          yaϑa. caϑβārō. ərəzuuō.
Verse: f    ϑritīm. upa. maγəm. niϑβərəsōiš.
Verse: g       pasca. hamō. aiβi.gaitīm.
Verse: h          duua. ərəzu. nismahe.
Verse: i       pasca. zəmō. isaoš. aiβi.gaitīm.
Verse: j          yaϑa. caϑβārō. ərəzuuō.
Verse: k    tūirīm. upa. maγəm. niϑβərəsōiš.
Verse: l       pasca. hamō. aiβi.gaitīm.
Verse: m          duua. ərəzu. nismahe.
Verse: n       pasca. zəmō. isaoš. aiβi.gaitīm.
Verse: o          yaϑa. caϑβārō. ərəzuuō.
Verse: p    puxδəm. upa. maγəm. niϑβərəsōiš.
Verse: q       pasca. hamō. aiβi.gaitīm.
Verse: r          duua. ərəzu. nismahe.
Verse: s       pasca. zəmō. isaoš. aiβi.gaitīm.
Verse: t          yaϑa. caϑβārō. ərəzuuō.
Verse: u    xštūm. upa. maγəm. niϑβərəsōiš.
Verse: v       pasca. hamō. aiβi.gaitīm.
Verse: w          duua. ərəzu. nismahe.
Verse: x       pasca. zəmō. isaoš. aiβi.gaitīm.
Verse: y          yaϑa. caϑβārō. ərəzuuō.

Paragraph: 8 
Verse: a    cuuat̰. haca. aniiō.aniiaēibiiō:
Verse: b       yaϑa. aēuuō.gāim:
Verse: c    kaϑa.1 aēuuō.gāim:
Verse: d       yaϑa. ϑripaδəm.

Paragraph: 9 
Verse: a    ϑrāiiō. aniia. maγa. niϑβərəsōiš.
Verse: b       pasca. hamō. aiβi.gaitīm.1
Verse: c          duua. ərəzu. nismahe.
Verse: d       pasca. zəmō. isaoš.2 aiβi.gaitīm.1
Verse: e          yaϑa. caϑβārō. ərəzuuō:3
Verse: f    cuuat̰. haca. paouruuaēibiia:4
Verse: g       yaϑa. ϑrigāim:
Verse: h    kaϑa.5 ϑrigāim:
Verse: i       yaϑa. gāmąn.6 haṇcaiiata:7
Verse: j    kaϑa.8 gāmąn.8 haṇcaiiata:9
Verse: k       yaϑa. nauua.paδəm.

Paragraph: 10 
Verse: a    karṣ̌ascit̰. frakāraiiōiš. tiγra.1 xṣ̌aϑra. vairiiō:2
Verse: b    cuuat̰. haca. maγaēibiia:3
Verse: c       yaϑa. ϑrigāim:
Verse: d    kaϑa. ϑrigāim:
Verse: e       yaϑa. gāmąn.4 haṇcaiiata:
Verse: f    kaϑa. gāmąn.4 haṇcaiiata:
Verse: g       yaϑa. nauua.paδəm.

Paragraph: 11 
Verse: a    āat̰. pasca. duua.dasa. karṣ̌a. frakāraiiōiš.
Verse: b    ϑrāiiō.
Verse: c       yim.1 aṇtarə. vīta.2 aṇtarə. ϑrāiiō. maγa. frakāraiiōiš.
Verse: d    ϑrāiiō.
Verse: e       yim. aṇtarə. vīta. aṇtarə. xṣ̌uuaš. maγa. frakāraiiōiš.
Verse: f    ϑrāiiō.
Verse: g       yim. aṇtarə. vīta.3 aṇtarə. nauua. maγa. frakāraiiōiš.
Verse: h    ϑrāiiō.4
Verse: i       aṇtarəca. auuaṇtarə.5 pārəṇtarə.6 maγa. frakāraiiōiš.
Verse: j    ϑrāiiō.
Verse: k       upa. nauua.paδəm. asānō. āiti.7 maγa. āiti.7 barōiš.
Verse: l          safəm. vā. dādrum.8 vā. zəm.varətəm.9 vā.
Verse: m          kąmcit̰. vā. xrūždismanąm.10

Paragraph: 12 
Verse: a    pascaēta. auua. tā. āiti.1 maγa. āiti.2 jasōit̰.3
Verse: b       aēṣ̌a. yā. paiti.irista:
Verse: c    āat̰.4 tūm. zaraϑuštra. auua.hištōiš.
Verse: d       auua. ništarəm. karṣ̌aiiā̊.5
Verse: e    aϑa. imą.6 vacō. drəṇjaiiōiš:


{= Y. 49,10c}
Verse: Q1a    nəmascā.7 yā.   ārmaitiš. īžācā:


Verse: f    paiti.ṣ̌ē. āδaiiōit̰.8
Verse: g       aēṣ̌a. yā. paiti.irista:


{= Y. 49,10c}
Verse: Q2a    nəmascā. yā.   ārmaitiš. īžācā.


Paragraph: 13 
Verse: a    āat̰. hā. druxš. auuāstriieite.1
Verse: b       kąmcit̰. vā. vacaŋhąm.
Verse: c          snaϑāi. aŋrahe. maniiə̄uš. druuatō.
Verse: d          snaϑāi. aēṣ̌mahe. xruuīm.draoš.2
Verse: e          snaϑāi. māzainiianąm. daēuuanąm.
Verse: f          snaϑāi. vīspanąm. daēuuanąm.

Paragraph: 14 
Verse: a    gaomaēzəm. pascaēta. upaŋhərəzəm.1
Verse: b       aiiaŋhaēnəm. vā. srum.2 vā:3
Verse: c    yezi.4 srum.2 paiti.hiṇcāi.5
Verse: d       graom.6 aiiasōiš.7
Verse: e             zaraϑuštra.
Verse: f          nauua.pixəm.8
Verse: g    ādrəṇjaiiōiš. aom.9 srum.2 pauruua.naēmāt̰. ahe. grauuahe.

Paragraph: 15 
Verse: a    1zasta. hē. paoirīm. frasnāδaiiən:
Verse: b    āat̰.
Verse: c       yat̰. hē. zasta. nōit̰. frasnāta.
Verse: d    āat̰. vīspąm. huuąm. tanūm. aiiaoždāta. kərənaoiti:2
Verse: e    āat̰.
Verse: f       yat̰. hē. zasta. frasnāta.
Verse: g    āϑritīm. pasca. frasnātaēibiia. zastaēibiia.
Verse: h       barṣ̌nūm. hē. vaγδanəm. paourum. paiti.hiṇcōiš.3
Verse: i    āat̰. hā. druxš. yā. nasuš.
Verse: j       paitiša.4 hē. hō.nā. aṇtarāt̰. naēmāt̰. bruuat̰.biiąm. upa.duuąsaiti.

Paragraph: 16 
Verse: a    paitiša.1 hē. hō.nā. aṇtarāt̰. naēmāt̰.2 bruuat̰.biiąm. paiti.hiṇcōiš.
Verse: b    āat̰. hā. druxš. yā. nasuš.
Verse: c       pasca. vaγδanəm. upa.duuąsaiti:
Verse: d    pasca. hē. vaγδanəm. paiti.hiṇcōiš.
Verse: e    āat̰. hā. druxš. yā. nasuš.
Verse: f       paitiša. paitišxvarənəm.3 upa.duuąsaiti:
Verse: g    paitiša. hē. paitiš.xvarənəm. paiti.hiṇcōiš.4
Verse: h    āat̰. hā. druxš. yā. nasuš.
Verse: i       daṣ̌inəm.5 gaoṣ̌əm. upa.duuąsaiti.

Paragraph: 17 
Verse: a    daṣ̌inəm. hē. gaoṣ̌əm. paiti.hiṇcōiš.
Verse: b    āat̰. hā. druxš. yā. nasuš.
Verse: c       hōiium.1 gaoṣ̌əm. upa.duuąsaiti:
Verse: d    hōiium.1 hē. gaoṣ̌əm. paiti.hiṇcōiš.
Verse: e    āat̰. hā. druxš. yā. nasuš.
Verse: f       daṣ̌inəm.2 suptīm. upa.duuąsaiti:
Verse: g    daṣ̌inəm.2 hē.3 suptīm. paiti.hiṇcōiš.
Verse: h    āat̰. hā. druxš. yā. nasuš.
Verse: i       haoiiąm.4 suptīm. upa.duuąsaiti:
Verse: j    haoiiąm.4 hē.3 suptīm. paiti.hiṇcōiš.
Verse: k    āat̰. hā. druxš. yā. nasuš.
Verse: l       daṣ̌inəm. kaṣ̌əm. upa.duuąsaiti.

Paragraph: 18 
Verse: a    daṣ̌inəm. hē. kaṣ̌əm. paiti.hiṇcōiš.
Verse: b    āat̰. hā. druxš. yā. nasuš.
Verse: c       hōiium.1 kaṣ̌əm. upa.duuąsaiti:
Verse: d    hōiium.1 hē. kaṣ̌əm. paiti.hiṇcōiš.
Verse: e    āat̰. hā. druxš. yā. nasuš.
Verse: f       paitiša. paitiuuarəm. upa.duuąsaiti:
Verse: g    paitiša. hē. paitiuuarəm. paiti.hiṇcōiš.
Verse: h    āat̰. hā. druxš. yā. nasuš.
Verse: i       paršti.2 upa.duuąsaiti.

Paragraph: 19 
Verse: a    paršti. hē. paiti.hiṇcōiš.
Verse: b    āat̰. hā. druxš. yā. nasuš.
Verse: c       daṣ̌inəm. fštānəm. upa.duuąsaiti:
Verse: d    daṣ̌inəm. hē. fštānəm. paiti.hiṇcōiš.
Verse: e    āat̰. hā. druxš. yā. nasuš.
Verse: f       hōiium.1 fštānəm. upa.duuąsaiti:
Verse: g       hōiium.1 hē. fštānəm. paiti.hiṇcōiš.
Verse: h    āat̰. hā. druxš. yā. nasuš.
Verse: i       daṣ̌inəm. pərəsāum. upa.duuąsaiti.

Paragraph: 20 
Verse: a    daṣ̌inəm. hē. pərəsāum. paiti.hiṇcōiš.
Verse: b    āat̰. hā. druxš. yā. nasuš.
Verse: c       hōiium. pərəsāum. upa.duuąsaiti:
Verse: d    hōiium. hē. pərəsāum. paiti.hiṇcōiš.
Verse: e    āat̰. hā. druxš. yā. nasuš.
Verse: f       daṣ̌inəm.1 sraonīm. upa.duuąsaiti:
Verse: g    daṣ̌inəm.1 hē. sraonīm. paiti.hiṇcōiš.
Verse: h    āat̰. hā. druxš. yā. nasuš.
Verse: i       haoiiąm.2 sraonīm. upa.duuąsaiti.

Paragraph: 21 
Verse: a    haoiiąm. hē. sraonīm. paiti.hiṇcōiš.
Verse: b    āat̰. hā. druxš. yā. nasuš.
Verse: c       haxti. upa.duuąsaiti:
Verse: d    haxti.1 hē. paiti.hiṇcōiš.
Verse: e    yezi. nairiiō. aŋhat̰.
Verse: f       pasca. hē. pourum.2 paiti.hiṇcōiš.
Verse: g          paitiša. aparəm.
Verse: h    yezi. strī.3 aŋhat̰.
Verse: i       paitiša.4 hē. pourum.2 paiti.hiṇcōiš.
Verse: j       5pasca. aparəm.5
Verse: k    āat̰. hā. druxš. yā. nasuš.
Verse: l       daṣ̌inəm. rānəm. upa.duuąsaiti.

Paragraph: 22 
Verse: a    daṣ̌inəm. hē. rānəm. paiti.hiṇcōiš.
Verse: b    āat̰. hā. druxš. yā. nasuš.
Verse: c       hōiium.1 rānəm. upa.duuąsaiti:
Verse: d    hōiium. hē. rānəm. paiti.hiṇcōiš.
Verse: e    āat̰. hā. druxš. yā. nasuš.
Verse: f       daṣ̌inəm. žnūm. upa.duuąsaiti:
Verse: g    daṣ̌inəm. hē.2 žnūm. paiti.hiṇcōiš.
Verse: h    āat̰. hā. druxš. yā. nasuš.
Verse: i       hōiium. žnūm. upa.duuąsaiti.

Paragraph: 23 
Verse: a    hōiium. hē. žnūm. paiti.hiṇcōiš.
Verse: b    āat̰. hā. druxš. yā. nasuš.
Verse: c       daṣ̌inəm. ascūm. upa.duuąsaiti:
Verse: d    daṣ̌inəm. hē. ascūm. paiti.hiṇcōiš.
Verse: e    āat̰. hā. druxš. yā. nasuš.
Verse: f       hōiium. ascūm. upa.duuąsaiti:
Verse: g    hōiium. hē.1 ascūm. paiti.hiṇcōiš.
Verse: h    āat̰. hā. druxš. yā. nasuš.
Verse: i       daṣ̌inəm. zaṇgəm.2 upa.duuąsaiti:
Verse: j    daṣ̌inəm. hē. zaṇgəm. paiti.hiṇcōiš.
Verse: k    āat̰. hā. druxš. yā. nasuš.
Verse: l       hōiium. zaṇgəm. upa.duuąsaiti.

Paragraph: 24 
Verse: a    hōiium. hē. zaṇgəm. paiti.hiṇcōiš.
Verse: b    āat̰. hā. druxš. yā. nasuš.
Verse: c       daṣ̌inəm. frabdəm. upa.duuąsaiti:
Verse: d    daṣ̌inəm. hē. frabdəm. paiti.hiṇcōiš.
Verse: e    āat̰. hā. druxš. yā. nasuš.
Verse: f       hōiium. frabdəm. upa.duuąsaiti.
Verse: g    hōiium. hē. frabdəm. paiti.hiṇcōiš.
Verse: h    āat̰. hā. druxš. yā. nasuš.
Verse: i       aδairi. haxəm. niuuōiriiete.1
Verse: j          mąnaiiən. ahe.
Verse: k             yaϑa. maxṣ̌iiā̊.2 parənəm.3

Paragraph: 25 
Verse: a    hakat̰. nigərəptaēibiia. aṇguštaēibiia.
Verse: b       uzgərəptaēibiia. pāṣ̌naēibiia.1
Verse: c          daṣ̌inəm. hē. haxəm. paiti.hiṇcōiš.
Verse: d    āat̰. hā. druxš. yā. nasuš.
Verse: e       hōiium. haxəm. upa.duuąsaiti:
Verse: f    hōiium. hē. haxəm. paiti.hiṇcōiš.
Verse: g    āat̰. hā. druxš. yā. nasuš.
Verse: h       aδairi. aṇgušta. niuuōiriiete.2
Verse: i          mąnaiiən. ahe.
Verse: j             yaϑa. maxṣ̌iiā̊. parənəm.3

Paragraph: 26 
Verse: a    hakat̰. nigərəptaēibiia. pāṣ̌naēibiia.
Verse: b       uzgərəptaēibiia. aṇguštaēibiia.
Verse: c          daṣ̌inąm. hē. aṇguštąm. paiti.hiṇcōiš.
Verse: d    āat̰. hā. druxš. yā. nasuš.
Verse: e       haoiiąm.2 aṇguštąm.1 upa.duuąsaiti.
Verse: f    haoiiąm.2 hē. aṇguštąm.1 paiti.hiṇcōiš.
Verse: g    āat̰. hā. druxš. yā. nasuš. niuuōiriieite.3
Verse: h       apāxəδraēibiiō. naēmaēibiiō.
Verse: i       maxṣ̌i.4 kəhrpa. ərəγaitiia. fraṣ̌naoš.5
Verse: j       apa.zaδaŋhō.6 akaranəm. driβiiā̊.
Verse: k          yaϑa. zōiždištāiš. xrafstrāiš.

Paragraph: 27 
Verse: a    aϑa. imą.1 vacō. drəṇjaiiōiš.
Verse: b       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q1a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q2a    kə̄m.nā. mazdā.   mauuaitē. pāiiūm. dadāt̰.
Verse: Q2b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q2c    aniiə̄m. ϑβahmāt̰.   āϑrascā. manaŋhascā.
Verse: Q2d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q2e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q3b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q3c    ciϑrā. mōi. dąm.   ahīmbiš. ratūm. cīždī.
Verse: Q3d    at̰. hōi. vohū.   səraoṣ̌ō. jaṇtū. manaŋhā.
Verse: Q3e    mazdā. ahmāi.   yahmāi. vaṣ̌ī. kahmāicīt̰.


{~ Vd. 8,21}
Verse: Q4a    pāta. nō. t̰biṣ̌iiaṇtat̰. pairi.
Verse: Q4d       mazdā̊sca. ārmaitišca. spəṇtasca:
Verse: Q4b    nase. daēuuī. druxš.
Verse: Q4c    nase. daēuuō.ciϑre.
Verse: Q4c    nase. daēuuō.frakaršte.
Verse: Q4d    nase. daēuuō.fradāiti.
Verse: Q4e    apa. druxš. nase.
Verse: Q4d    apa. druxš. duuāra.
Verse: Q4d    apa. druxš. vīnase.
Verse: Q4f    apāxəδre. apa.nasiiehe.
Verse: Q4g       māmərəṇcainīš.11 gaēϑā̊. astuuaitīš. aṣ̌ahe.

Paragraph: 28 
Verse: a    paoirīm.1 upa. maγəm. frā.nasuš.2 narəm. bauuaiti.3
Verse: b    aϑa. imą.4 vacō. drəṇjaiiōiš.5
Verse: c       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q1a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q2a    kə̄m.nā. mazdā.   mauuaitē. pāiiūm. dadāt̰.
Verse: Q2b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q2c    aniiə̄m. ϑβahmāt̰.   āϑrascā. manaŋhascā.
Verse: Q2d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q2e    tąm.mōi. dąstuuąm.   daēnaiiāi. frāuuaocā.


{~ Y. 44,16}
Verse: Q3b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q3c    ciϑrā. mōi. dąm.   ahīmbiš. ratūm. cīždī.
Verse: Q3d    at̰. hōi. vohū.   səraoṣ̌ō. jaṇtū. manaŋhā.
Verse: Q3e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q4a    pāta. nō. t̰biṣ̌iiaṇtat̰. pairi.
Verse: Q4d       mazdā̊sca. ārmaitišca. spəṇtasca:
Verse: Q4b    nase. daēuuī. druxš.
Verse: Q4c    nase. daēuuō.ciϑre.
Verse: Q4c    nase. daēuuō.frakaršte.
Verse: Q4d    nase. daēuuō.fradāiti.
Verse: Q4e    apa. druxš. nase.
Verse: Q4d    apa. druxš. duuāra.
Verse: Q4d    apa. druxš. vīnase.
Verse: Q4f    apāxəδre. apa.nasiiehe.
Verse: Q4g       māmərəṇcainīš. gaēϑā̊. astuuaitīš. aṣ̌ahe.

Verse: d    bitīm. upa. maγəm. frā.nasuš. narəm. bauuaiti.
Verse: e    aϑa. imą. vacō. drəṇjaiiōiš.
Verse: f       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q5a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q5b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q5c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q6a    kə̄m.nā. mazdā.   mauuaitē. pāiiūm. dadāt̰.
Verse: Q6b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q6c    aniiə̄m. ϑβahmāt̰.   āϑrascā. manaŋhascā.
Verse: Q6d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q6e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q7b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q7c    ciϑrā. mōi. dąm.   ahīmbiš. ratūm. cīždī.
Verse: Q7d    at̰. hōi. vohū.   səraoṣ̌ō. jaṇtū. manaŋhā.
Verse: Q7e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q8a    pāta. nō. t̰biṣ̌iiaṇtat̰. pairi.
Verse: Q8d       mazdā̊sca. ārmaitišca. spəṇtasca:
Verse: Q8b    nase. daēuuī. druxš.
Verse: Q8c    nase. daēuuō.ciϑre.
Verse: Q8c    nase. daēuuō.frakaršte.
Verse: Q8d    nase. daēuuō.fradāiti.
Verse: Q8e    apa. druxš. nase.
Verse: Q8d    apa. druxš. duuāra.
Verse: Q8d    apa. druxš. vīnase.
Verse: Q8f    apāxəδre. apa.nasiiehe.
Verse: Q8g       māmərəṇcainīš. gaēϑā̊. astuuaitīš. aṣ̌ahe.

Verse: g    ϑritīm. upa. maγəm. frā.nasuš. narəm. bauuaiti.
Verse: h    aϑa. imą. vacō. drəṇjaiiōiš.
Verse: i       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q9a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q9b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q9c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q10a    kə̄m.nā. mazdā.   mauuaitē. pāiiūm. dadāt̰.
Verse: Q10b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q10c    aniiə̄m. ϑβahmāt̰.   āϑrascā. manaŋhascā.
Verse: Q10d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q10e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q11b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q11c    ciϑrā. mōi. dąm.   ahīmbiš. ratūm. cīždī.
Verse: Q11d    at̰. hōi. vohū.   səraoṣ̌ō. jaṇtū. manaŋhā.
Verse: Q11e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q12a    pāta. nō. t̰biṣ̌iiaṇtat̰. pairi.
Verse: Q12d       mazdā̊sca. ārmaitišca. spəṇtasca:
Verse: Q12b    nase. daēuuī. druxš.
Verse: Q12c    nase. daēuuō.ciϑre.
Verse: Q12c    nase. daēuuō.frakaršte.
Verse: Q12d    nase. daēuuō.fradāiti.
Verse: Q12e    apa. druxš. nase.
Verse: Q12d    apa. druxš. duuāra.
Verse: Q12d    apa. druxš. vīnase.
Verse: Q12f    apāxəδre. apa.nasiiehe.
Verse: Q12g       māmərəṇcainīš. gaēϑā̊. astuuaitīš. aṣ̌ahe.

Verse: j    tūirīm. upa. maγəm. frā.nasuš. narəm. bauuaiti.
Verse: k    aϑa. imą. vacō. drəṇjaiiōiš.
Verse: l       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q13a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q13b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q13c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q14a    kə̄m.nā. mazdā.   mauuaitē. pāiiūm. dadāt̰.
Verse: Q14b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q14c    aniiə̄m. ϑβahmāt̰.   āϑrascā. manaŋhascā.
Verse: Q14d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q14e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q15b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q15c    ciϑrā. mōi. dąm.   ahīmbiš. ratūm. cīždī.
Verse: Q15d    at̰. hōi. vohū.   səraoṣ̌ō. jaṇtū. manaŋhā.
Verse: Q15e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q16a    pāta. nō. t̰biṣ̌iiaṇtat̰. pairi.
Verse: Q16d       mazdā̊sca. ārmaitišca. spəṇtasca:
Verse: Q16b    nase. daēuuī. druxš.
Verse: Q16c    nase. daēuuō.ciϑre.
Verse: Q16c    nase. daēuuō.frakaršte.
Verse: Q16d    nase. daēuuō.fradāiti.
Verse: Q16e    apa. druxš. nase.
Verse: Q16d    apa. druxš. duuāra.
Verse: Q16d    apa. druxš. vīnase.
Verse: Q16f    apāxəδre. apa.nasiiehe.
Verse: Q16g       māmərəṇcainīš. gaēϑā̊. astuuaitīš. aṣ̌ahe.

Verse: m    puxδəm. upa. maγəm. frā.nasuš. narəm. bauuaiti.
Verse: n    aϑa. imą. vacō. drəṇjaiiōiš.
Verse: o       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q17a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q17b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q17c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q18a    kə̄m.nā. mazdā.   mauuaitē. pāiiūm. dadāt̰.
Verse: Q18b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q18c    aniiə̄m. ϑβahmāt̰.   āϑrascā. manaŋhascā.
Verse: Q18d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q18e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q19b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q19c    ciϑrā. mōi. dąm.   ahīmbiš. ratūm. cīždī.
Verse: Q19d    at̰. hōi. vohū.   səraoṣ̌ō. jaṇtū. manaŋhā.
Verse: Q19e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q20a    pāta. nō. t̰biṣ̌iiaṇtat̰. pairi.
Verse: Q20d       mazdā̊sca. ārmaitišca. spəṇtasca:
Verse: Q20b    nase. daēuuī. druxš.
Verse: Q20c    nase. daēuuō.ciϑre.
Verse: Q20c    nase. daēuuō.frakaršte.
Verse: Q20d    nase. daēuuō.fradāiti.
Verse: Q20e    apa. druxš. nase.
Verse: Q20d    apa. druxš. duuāra.
Verse: Q20d    apa. druxš. vīnase.
Verse: Q20f    apāxəδre. apa.nasiiehe.
Verse: Q20g       māmərəṇcainīš. gaēϑā̊. astuuaitīš. aṣ̌ahe.

Verse: p    xštūm. upa. maγəm. frā.nasuš. narəm. bauuaiti.
Verse: q    aϑa. imą. vacō. drəṇjaiiōiš.
Verse: r       yōi. aŋhən. vārəϑraγniiōtəməmca. baēṣ̌aziiōtəməmca:


Verse: Q21a    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q21b    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q21c    xšaϑrəmcā. ahurāi.ā.   yim. drigubiiō. dadat̰. vāstārəm.::

{= Y. 46,7}
Verse: Q22a    kə̄m.nā. mazdā.   mauuaitē. pāiiūm. dadāt̰.
Verse: Q22b    hiiat̰. mā. drəguuā̊.   dīdarəṣ̌atā. aēnaŋhē.
Verse: Q22c    aniiə̄m. ϑβahmāt̰.   āϑrascā. manaŋhascā.
Verse: Q22d    yaiiā̊. š́iiaoϑanāiš.   aṣ̌əm. ϑraoštā. ahurā.
Verse: Q22e    tąm.mōi. dąstuuąm.   daēnaiiāi. frāuuaocā.

{~ Y. 44,16}
Verse: Q23b    kə̄. vərəϑrəm.jā.   ϑβā. pōi. sə̄ṇghā. yōi. həṇtī.
Verse: Q23c    ciϑrā. mōi. dąm.   ahīmbiš. ratūm. cīždī.
Verse: Q23d    at̰. hōi. vohū.   səraoṣ̌ō. jaṇtū. manaŋhā.
Verse: Q23e    mazdā. ahmāi.   yahmāi. vaṣ̌ī. kahmāicīt̰.


{~ Y. 44,16}
Verse: Q24a    pāta. nō. t̰biṣ̌iiaṇtat̰. pairi.
Verse: Q24d       mazdā̊sca. ārmaitišca. spəṇtasca:
Verse: Q24b    nase. daēuuī. druxš.
Verse: Q24c    nase. daēuuō.ciϑre.
Verse: Q24c    nase. daēuuō.frakaršte.
Verse: Q24d    nase. daēuuō.fradāiti.
Verse: Q24e    apa. druxš. nase.
Verse: Q24d    apa. druxš. duuāra.
Verse: Q24d    apa. druxš. vīnase.
Verse: Q24f    apāxəδre. apa.nasiiehe.
Verse: Q24g       māmərəṇcainīš. gaēϑā̊. astuuaitīš. aṣ̌ahe.

Paragraph: 29 
Verse: a    pascaēta. auua. tā.1 nišhiδōit̰.2
Verse: b       aēṣ̌a. yā. paiti.irista.
Verse: c          aṇtarə.3 arəδəm. maγahe.
Verse: d          pārəṇtarə.4 haca. aniiaēibiiō. maγaēibiiō.
Verse: e             auuauuat̰.5 taδa.6
Verse: f                yaϑa. caϑβārō. ərəzauuō.7
Verse: g       aētaēṣ̌ąmca. zəmō. pərəϑu.frauuāiš.8 fraδauuata.9

Paragraph: 30 
Verse: a    paṇca.dasa. zəmō. haṇkanaiiən.
Verse: b       1vīspəm. ā. ahmāt̰. upa.mąnaiiən.2
Verse: c          yat̰. hē. upəməm.3 paiti. vaγδanahe. upəmāt̰.4
Verse: d             varsa.5 hiku.6 bauuāt̰.

Paragraph: 31 
Verse: a    yat̰.1 hē. tanuš. hiš́uui.2 hiγnuui.3 pąsnu. bauuāt̰.4
Verse: b       pascaēta. auua. tā. aniia. maγa. āiti.5 jasōit̰.
Verse: c          aēṣ̌a. yā. paiti.irista:
Verse: d    paoirīm. upa. maγəm. hakərət̰. āpō.
Verse: e       āat̰. huuąm.6 tanūm. pairi.yaoždaiϑīta.7
Verse: f    bitīm. upa. maγəm. bižuuat̰.8 āpō.
Verse: g       āat̰. huuąm. tanūm. pairi.yaoždaiϑīta.
Verse: h    ϑritīm. upa. maγəm. ϑrižuuat̰.8 āpō.
Verse: i       āat̰. huuąm. tanūm. pairi.yaoždaiϑīta.

Paragraph: 32 
Verse: a    pascaēta.1 dim. ā.baoδaiiaēta.
Verse: b       uruuāsnaiiā̊. vā. vohu.gaonahe. vā.
Verse: c       vohu.kərətōiš. vā. haδānaēpataiiā̊. vā.
Verse: d       kąmcit̰. vā. hubaoiδitəmanąm. uruuaranąm.
Verse: e    vastrā̊.2 pascaēta. aiβiiā̊ŋhaiiaēta.
Verse: f    pascaēta. auua. tā. āiti.3 nmāna. āiti. jasōit̰.4
Verse: g       aēṣ̌a. yā. paiti.irista.

Paragraph: 33 
Verse: a    airime. gātūm. hē. nišhiδaēta.1
Verse: b       aṇtarə.2 arəδəm. nmānahe.
Verse: c       pārəṇtarə.3 haca. aniiaēibiiō. mazdaiiasnaēibiiō.
Verse: d    mā. xṣ̌aiiamna. jasōit̰.
Verse: e       ātrəm. mā. āpəm.
Verse: f       mā. ząm. mā. gąm. mā. uruuarąm.
Verse: g       mā. narəm. aṣ̌auuanəm. mā. nāirikąm. aṣ̌aonīm.
Verse: h          vīspəm. ā. ahmāt̰.
Verse: i             yat̰. hē. ϑrāiiō. xṣ̌afna. sacā̊ṇte.4:
Verse: j    āat̰. pasca. ϑrixṣ̌aparāt̰.5
Verse: k       us. tanūm. snaiiaēta.
Verse: l       us. vastrāt̰.
Verse: m          gə̄uš. maēsmana.
Verse: n          apāca. paiti.
Verse: o    auuaϑa. yaoždaiiąn.

Paragraph: 34 
Verse: a    airime. gātūm. hē. nišhiδaēta.1
Verse: b       aṇtarə.2 arəδəm.6 nmānahe.
Verse: c       pārəṇtarə. haca. aniiaēibiiō. mazdaiiasnaēibiiō.
Verse: d    mā. xṣ̌aiiamna. jasōit̰.
Verse: e       ātrəm. mā. āpəm.
Verse: f       mā. ząm.7 mā. gąm. mā. uruuarąm.
Verse: g       mā. narəm. aṣ̌auuanəm. mā. nāirikąm. aṣ̌aonīm.
Verse: h          vīspəm. ā. ahmāt̰.
Verse: i             yat̰. hē. xṣ̌uuaš. xṣ̌afna. sacā̊ṇte:4
Verse: j    8āat̰. pasca. xṣ̌uuaš.xṣ̌aparāt̰.8
Verse: k       us. tanūm. snaiiaēta.
Verse: l       us. vastrāt̰.
Verse: m          gə̄uš. maēsmana.
Verse: n          apāca. paiti.
Verse: o    auuaϑa. yaoždaiiąn.

Paragraph: 35 
Verse: a    airime. gātūm. hē. nišhiδaēta.1
Verse: b       aṇtarə.9 arəδəm. nmānahe.
Verse: c       pārəṇtarə. haca. aniiaēibiiō. mazdaiiasnaēibiiō.
Verse: d    mā. xṣ̌aiiamna. jasōit̰.
Verse: e       ātrəm. mā. āpəm.
Verse: f       mā. ząm. mā. gąm. mā. uruuarąm.
Verse: g       mā. narəm. aṣ̌auuanəm. mā. nāirikąm. aṣ̌aonīm.
Verse: h          vīspəm. ā. ahmāt̰.
Verse: i             yat̰. hē. nauua. xṣ̌afna. sacā̊ṇte:4
Verse: j    āat. pasca. nauua.xṣ̌aparāt̰.
Verse: k       us. tanūm. snaiiaēta.
Verse: l       us. vastrāt̰.
Verse: m          gə̄uš. maēsmana.
Verse: n          apāca. paiti.
Verse: o    auuaϑa. yaoždaiiąn.

Paragraph: 36 
Verse: a    pascaēta. xṣ̌aiiamna. jasōit̰.
Verse: b       auui. ātrəm. auui. āpəm.
Verse: c       auui. ząm. auui. gąm. auui. uruuarąm.
Verse: d       auui. narəm. aṣ̌auuanəm. auui. nāirikąm. aṣ̌aonīm.

Paragraph: 37 
Verse: a    āϑrauuanəm. yaoždaϑō.
Verse: b       dahmaiiāt̰.1 parō. āfritōit̰.
Verse: c    daiŋ́hə̄uš.2 daiŋ́hu.paitīm.3 yaoždaϑō.
Verse: d       uštrahe. paiti. arṣ̌nō. aγriiehe.
Verse: e    zaṇtə̄uš. zaṇtu.paitīm. yaoždaϑō.
Verse: f       aspahe. paiti. arṣ̌nō. aγriiehe.
Verse: g    vīsō. vīspaitīm.4 yaoždaϑō.
Verse: h       gə̄uš. paiti. uxṣ̌nō.5 aγriiehe.
Verse: i    nmānahe. nmānō.paitīm. yaoždaϑō.
Verse: j       gə̄uš. paiti. aziiā̊.6

Paragraph: 38 
Verse: a    nmānahe. nmānō.paitīm. nāirikąm.1 yaoždaϑō.
Verse: b       gə̄uš. paiti. frauuaitiiā̊.
Verse: c    vaēsə̄sca.2 pairiiaētrə̄šca.3 yaoždaϑō.
Verse: d       gə̄uš. paiti. vaziiā̊.4
Verse: e    nitəməmcit̰. apərənāiiūkəm. yaoždaϑō.
Verse: f       pasə̄uš. garəbuš.5 anumaiiehe.

Paragraph: 39 
Verse: a    yezi. tauuąn. aēte.1 mazdaiiasna.
Verse: b       aēte. pasuuō.2 staorāca.
Verse: c          aētahmāi. naire. frabāraiiən:
Verse: d    yezi. nōit̰. tauuąn. aēte. mazdaiiasna.
Verse: e       aēte. 3pasuuō.2 staorāca.
Verse: f          aniiąm.4 hē. auuarətąm.5 aētahmāi.3 naire.6 frabāraiiən.
Verse: g             vīspəm. ā. ahmāt̰.
Verse: h                yat̰.7 aēṣ̌ō. nā. yō. yaoždāϑriiō.
Verse: i                   haca. aēibiiō. nmānaēibiiō.
Verse: j                      xṣ̌nūtō. aδbištō.8 pāraiiāt̰.

Paragraph: 40 
Verse: a    yezica. aēṣ̌ō. nā. yō. yaoždāϑriiō.
Verse: b       haca. aēibiiō. nmānaēibiiō.
Verse: c          t̰bištō. axṣ̌nūtō. parāiti.
Verse: d    apa. hē. paskāt̰. fraoirisaite.1
Verse: e             spitama. zaraϑuštra.
Verse: f       aēṣ̌a. druxš. yā. nasuš.
Verse: g          nā̊ŋhanat̰. haca.
Verse: h          caṣ̌manat̰. haca.
Verse: i          hizumat̰.2 haca. paitišxvarənāδa.3
Verse: j          frauuāxṣ̌at̰. haca.
Verse: k          fraṣ̌umakat̰.4 haca. tē:5

Paragraph: 41 
Verse: a    aēṣ̌ąm. paiti. sraoe.1
Verse: b       aēṣ̌a. druxš. yā. nasuš. upa.duuąsaiti.
Verse: c    aiiaoždiia. pascaēta. bauuaiṇti.2
Verse: d       yauuaēca. yauuaētātaēca:
Verse: e    anusō.3 zī. spitama. zaraϑuštra.
Verse: f       aēṣ̌a. yā. paiti.irista.
Verse: g          auuat̰.4 huuarə. ā.tāpaite.5
Verse: h          anusō. hāu.6 mā̊.
Verse: i          anusō. auue.7 stārō.

Paragraph: 42 
Verse: a    xṣ̌nāuuaiieiti.1 zī. spitama. zaraϑuštra.
Verse: b       aēṣ̌ō. nā. yō. yaoždāϑriiō.
Verse: c          yat̰. aētəm. paiti.iristəm. frā.nasūm. kərənaoiti.
Verse: d    xṣ̌nāuuaiieiti. ātrəm. xṣ̌nāuuaiieiti. āpəm.
Verse: e    xṣ̌nāuuaiieiti. ząm. xṣ̌nāuuaiieiti. gąm. xṣ̌nāuuaiieiti. uruuarąm.
Verse: f    xṣ̌nāuuaiieiti. narəm. aṣ̌auuanəm.
Verse: g       xṣ̌nāuuaiieiti. nāirikąm. aṣ̌aonīm.

Paragraph: 43 
Verse: a    paiti. dim. pərəsata.1 zaraϑuštrō:2
Verse: b       dātarə. gaēϑanąm. astuuaitinąm. aṣ̌āum.
Verse: c    cuuat̰. ahmāi. naire. miždəm.3 aŋhat̰.
Verse: d       pasca. astasca. baoδaŋhasca. vī.uruuīštīm.4
Verse: e          yat̰. aētəm. paiti.iristəm.5 frā.nasūm.6 kərənaoiti.

Paragraph: 44 
Verse: a    āat̰. mraot̰. ahurō. mazdā̊:
Verse: b    disiiāt̰.1 ahmāi. naire. auuat̰. miždəm.2
Verse: c       parō.asnāi. aŋuhe.3
Verse: d          vazduuarə. vahištahe. aŋhə̄uš.

Paragraph: 45 
Verse: a    paiti. dim. pərəsata. zaraϑuštrō:
Verse: b       dātarə. gaēϑanąm. astuuaitinąm. aṣ̌āum.
Verse: c    kuϑa. aētat̰.1 druxš. pərənāne.
Verse: d       yā. haca. irista. upa. juuaṇtəm. upa.duuąsaiti.
Verse: e    kuϑa. aētat̰.1 nasu.2 pərənāne.
Verse: f       yā. haca. irista. upa. juuaṇtəm. upa.raēϑβaiieiti.3

Paragraph: 46 
Verse: a    āat̰. mraot̰. ahurō. mazdā̊:
Verse: b    ime. vaca. framruua.1
Verse: c       yōi. həṇti. gāϑāhuua. bišāmrūta.
Verse: d    ime. vaca. framruua.
Verse: e       yōi. həṇti. gāϑāhuua. ϑrišāmrūta.
Verse: f    ime. vaca.2 framruua.3
Verse: g       yōi. həṇti. gāϑāhuua. caϑrušāmrūta:
Verse: h    mąnaiiən. bā.
Verse: i          spitama. zaraϑuštra.
Verse: j       aipi. tā. nasuš. zgaϑaite.4
Verse: k          yaϑa. iṣ̌uš. xvāϑaxtō.5
Verse: l          6yaϑa. vā. nəmatō. tarō. yārə.7
Verse: m          yaϑa. vā. raϑβiia. varəna.

Paragraph: 47 
Verse: a    dātarə. gaēϑanąm. astuuaitinąm. aṣ̌āum.
Verse: b    yezica. hō. nā. paiti.hiṇcōit̰.1
Verse: c       yō. nōit̰. apiuuatāite.2
Verse: d          daēnaiiā̊. māzdaiiasnōiš. yaoždāϑriiāt̰. haca.
Verse: e    kuϑa. aētat̰.3 druxš. pərənāite.4
Verse: f       yā. haca. irista. upa. juuaṇtəm. upa.duuąsaiti.
Verse: g    kuϑa. aētat̰.3 nasu.5 pərənāite.6
Verse: h       yā. haca. irista. upa. juuaṇtəm. upa.raēϑβaiieiti.7

Paragraph: 48 
Verse: a    āat̰. mraot̰. ahurō. mazdā̊:
Verse: b    mąnaiiən. bā.
Verse: c          spitama. zaraϑuštra.
Verse: d       aēṣ̌a. druxš. yā. nasuš.
Verse: e          aš.aojastara.1 varəδaiiete.2
Verse: f             yaϑa. para. ahmāt̰. as:3
Verse: g    hā. aēte. yaska.
Verse: h    hā. aēte. mahrka.
Verse: i    hā. aēte. paitiiāra.
Verse: j       hamaϑa.4 yaϑa. paracit̰.

Paragraph: 49 
Verse: a    dātarə. gaēϑanąm. astuuaitinąm. aṣ̌āum.
Verse: b    kā. hē. asti. ciϑa:
Verse: c    āat̰. mraot̰. ahurō. mazdā̊:
Verse: d    haṇdarəzacit̰. haṇdarəzaiiən.1 aēte. yōi.2 mazdaiiasna.
Verse: e    zasta. hē. paoirīm. haṇdarəzaiiaṇta.
Verse: f    apa. hē. vastrā̊.3 baraiiən.
Verse: g    pąstōfraϑaŋhəm. hē. kamərəδəm. vīnāϑaiiən.4
Verse: h       aš.xvarətəmaēibiiō. spəṇtō.mainiiauuanąm. dāmanąm. kərəfš.xvārąm.5
Verse: i          kərəfš. paiti.nisirinuiiāt̰.
Verse: j       vaiiąm. kahrkāsąm.6
Verse: k             uitiiaojanō:
Verse: l    auuā̊. hīm.7 paiti.miϑnāiti.8
Verse: m       vīspəm. dušmatəmca. dužūxtəmca. dužuuarštəmca.

Paragraph: 50 
Verse: a    yezica. hē. aniia. aγa. š́iiaoϑna. frauuaršta.
Verse: b       patita.1 hē. ciϑa:
Verse: c    āat̰. yezi.ṣ̌ē. aniia. aγa. š́iiaoϑna. nōit̰. frauuaršta.
Verse: d       patitəm.2 ahe.3 narš.
Verse: e          yauuaēca. yauuaētātaēca.

Paragraph: 51 
Verse: a    ciš. hāu.1 as.2 ahura. mazda.
Verse: b       yō. mē. asadaiiat̰.3 fradaϑəm. apa.barat̰.
Verse: c       varədaϑəm. apa.barat̰.
Verse: d       yaskəm. upa.barat̰.
Verse: e       mahrkəm. upa.barat̰.

Paragraph: 52 
Verse: a    āat̰. mraot̰. ahurō. mazdā̊:
Verse: b    hō. bā. aēṣ̌ō. ās.
Verse: c          aṣ̌āum. zaraϑuštra.
Verse: d       aṣ̌əmaoγō. anaṣ̌auua.
Verse: e          yō.1 aētahmi. aŋhuuō.2 yat̰. astuuaiṇti. paiti.hiṇcaiti.3
Verse: f    ā. dim.4 nōit̰. apiuuatāite.5
Verse: g       daēnaiiā̊. māzdaiiasnōiš. yaoždāϑriiāt̰. haca.

Paragraph: 53 
Verse: a    1para. nū. ahmāt̰. haca.2 asaŋhat̰ca.3 ṣ̌ōiϑrāat̰ca.3 axštat̰.4
Verse: b             spitama. zaraϑuštra.
Verse: c          ižāca.5 āzūitišca.
Verse: d       para. dasuuarəca. baēṣ̌azəmca.
Verse: e       para. fradaϑəmca. varədaϑəmca. vaxṣ̌aϑəmca.
Verse: f       para. yauuanąmca. vāstranąmca. uruϑəm.6

Paragraph: 54 
Verse: a    dātarə. gaēϑanąm. astuuaitinąm. aṣ̌āum.
Verse: b    kaδa.1 nō. ahmāi. asaŋhaēca. ṣ̌ōiϑraēca. paiti.jasātō.
Verse: c          ižāca.2 āzūitišca.
Verse: d       kaδa. dasuuarəca. baēṣ̌azəmca.
Verse: e       kaδa. fradaϑəmca. varədaϑəmca. vaxṣ̌aϑəmca.
Verse: f       kaδa. yauuanąmca. vāstranąmca. uruϑəm.3

Paragraph: 55 
Verse: a    āat̰. mraot̰. ahurō. mazdā̊:
Verse: b    nōit̰. nū.1 para. ahmāt̰.
Verse: c          spitama. zaraϑuštra.
Verse: d       asaŋhaēca. ṣ̌ōiϑraēca. paiti.jasātō.
Verse: e          ižāca.2 āzūitišca.
Verse: f       nōit̰. dasuuarəca. baēṣ̌azəmca.
Verse: g       nōit̰. fradaϑəmca. varədaϑəmca. vaxṣ̌aϑəmca.
Verse: h       nōit̰. yauuanąmca. vāstranąmca. uruϑəm.3

Paragraph: 56 
Verse: a    1para. ahmāt̰. yat̰. iδa. aṣ̌əmaoγō. anaṣ̌auua. haϑra. jatō.2 nijanāite.3
Verse: b       yat̰. vā. aētaŋhā̊.4 daiŋhə̄uš.5 sraoṣ̌ō. aṣ̌aiiō. frāiiazā̊ṇte.6
Verse: c          ϑri.aiiarəm.7 ϑri.xṣ̌aparəm.
Verse: d          saociṇtat̰.8 paiti. āϑrat̰.9
Verse: e          frastərətāt̰.10 paiti. barəsmən.11
Verse: f          uzdātāt̰. paiti. haomāt̰.

Paragraph: 57 
Verse: a    pascaēta. ahmāi. asaŋhaēca. ṣ̌ōiϑraēca. paiti.jasātō.
Verse: b          ižāca.1 āzūitišca.
Verse: c       pascaēta. dasuuarəca. baēṣ̌azəmca.
Verse: d       pascaēta. fradaϑəmca. varədaϑəmca. vaxṣ̌aϑəmca.
Verse: e       pascaēta. yauuanąmca. vāstranąmca. uruϑəm.2

Verse: Q1a    aṣ̌əm. vohū. vahištəm. astī::
Verse: Q1b    uštā. astī. uštā. ahmāi.
Verse: Q1c    hiiat̰. aṣ̌āi. vahištāi. aṣ̌əm.::


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.