TITUS
Atharva-Veda-Samhita (Saunaka)
Part No. 480
Previous part

Hymn: 2 
Verse: 1 
Halfverse: a    úd asya ketávo diví śukrā́ bʰrā́janta īrate /
Halfverse: c    ādityásya nr̥cákṣaso máhivratasya mīḍʰúṣaḥ //1//

Verse: 2 
Halfverse: a    diśā́ṃ prajñā́nāṃ svaráyantam arcíṣā supakṣám āśúṃ patáyantam arṇavé /
Halfverse: c    stávāma sū́ryaṃ bʰúvanasya gopā́ṃ yó raśmíbʰir díśa ābʰā́ti sárvāḥ //2//

Verse: 3 
Halfverse: a    yát prā́ṅ pratyáṅ svadʰáyā yā́si śī́bʰaṃ nā́nārūpe áhanī kárṣi māyáyā /
Halfverse: c    tád āditya máhi tát te máhi śrávo yád éko víśvaṃ pári bʰū́ma jā́yase //3//

Verse: 4 
Halfverse: a    vipaścítaṃ taráṇiṃ bʰrā́jamānaṃ váhanti yáṃ harítaḥ saptá bahvī́ḥ /
Halfverse: c    srutā́d yám áttrir dívam unninā́ya táṃ tvā paśyanti pariyā́ntam ājím //4//

Verse: 5 
Halfverse: a    mā́ tvā dabʰan pariyā́ntam ājíṃ svastí durgā́m̐ áti yāhi śī́bʰam /
Halfverse: c    dívaṃ ca sūrya pr̥tʰivī́ṃ ca devī́m ahorātré vimímāno yád éṣi //5//

Verse: 6 
Halfverse: a    svastí te sūrya caráse rátʰāya yénobʰā́v ántau pariyā́si sadyáḥ /
Halfverse: c    yáṃ te váhanti haríto váhiṣṭʰāḥ śatám áśvā yádi vā saptá bahvī́ḥ //6//

Verse: 7 
Halfverse: a    sukʰáṃ sūrya rátʰam aṃśumántaṃ syonáṃ suváhnim ádʰi tiṣṭʰa vājínam /
Halfverse: c    yáṃ te váhanti haríto váhiṣṭʰāḥ śatám áśvā yádi vā saptá bahvī́ḥ //7//

Verse: 8 
Halfverse: a    saptá sū́ryo haríto yā́tave rátʰe híraṇyatvacaso br̥hatī́r ayukta /
Halfverse: c    ámoci śukró rájasaḥ parástād vidʰū́ya devás támo dívam ā́ruhat //8//

Verse: 9 
Halfverse: a    út ketúnā br̥hatā́ devá ā́gann ápāvr̥k támo 'bʰí jyótir aśrait /
Halfverse: c    divyáḥ suparṇáḥ sá vīró vy àkʰyad áditeḥ putró bʰúvanāni víśvā //9//

Verse: 10 
Halfverse: a    udyán raśmī́n ā́ tanuṣe víśvā rupā́ṇi puṣyasi /
Halfverse: c    ubʰā́ samudraú krátunā ví bʰāsi sárvāṃl lokā́n paribʰū́r bʰrā́jamānaḥ //10// {7}

Verse: 11 
Halfverse: a    pūrvāparáṃ carato māyáyaitaú śíśū krī́ḍantau pári yāto 'rṇavám /
Halfverse: c    víśvānyó bʰúvanā vicáṣṭe hairaṇyaír anyáṃ haríto vahanti //11//

Verse: 12 
Halfverse: a    diví tvā́ttrir adʰārayat sū́ryā mā́sāya kártave /
Halfverse: c    sá eṣi súdʰr̥tas tápan víśvā bʰūtā́vacā́kaśat //12//

Verse: 13 
Halfverse: a    ubʰā́v ántau sám arṣasi vatsáḥ saṃmātárāv iva /
Halfverse: c    nanv è3tád itáḥ purā́ bráhma devā́ amī́ viduḥ //13//

Verse: 14 
Halfverse: a    yát samudrám ánu śritáṃ tát siṣāsati sū́ryaḥ /
Halfverse: c    ádʰvāsya vítato mahā́n pū́rvaś cā́paraś ca yáḥ //14//

Verse: 15 
Halfverse: a    táṃ sám āpnoti jūtíbʰis táto nā́pa cikitsati /
Halfverse: c    ténāmŕ̥tasya bʰakṣáṃ devā́nāṃ nā́va rundʰate //15//

Verse: 16 
Halfverse: a    úd u tyáṃ jātávedasaṃ deváṃ vahanti ketávaḥ /
Halfverse: c    dŕ̥śé víśvāya sū́ryam //16//

Verse: 17 
Halfverse: a    ápa tyé tāyávo yatʰā nákṣatrā yanty aktúbʰiḥ /
Halfverse: c    sū́rāya viśvácakṣase //17//

Verse: 18 
Halfverse: a    ádr̥śrann asya ketávo ví raśmáyo jánām̐ ánu /
Halfverse: c    bʰrā́janto agnáyo yatʰā //18//

Verse: 19 
Halfverse: a    taráṇir viśvádarśato jyotiṣkŕ̥d asi sūrya /
Halfverse: c    víśvam ā́ bʰāsi rocana //19//

Verse: 20 
Halfverse: a    pratyáṅ devā́nāṃ víśaḥ pratyáṅṅ úd eṣi mā́nuṣīḥ /
Halfverse: c    pratyáṅ víśvaṃ svàr dr̥śé //20// {8}

Verse: 21 
Halfverse: a    yénā pāvaka cákṣasā bʰuraṇyántaṃ jánām̐ ánu /
Halfverse: c    tváṃ varuṇa páśyasi //21//

Verse: 22 
Halfverse: a    ví dyā́m eṣi rájas pr̥tʰv áhar mímāno aktúbʰiḥ /
Halfverse: c    páśyan jánmāni sūrya //22//

Verse: 23 
Halfverse: a    saptá tvā haríto rátʰe váhanti deva sūrya /
Halfverse: c    śocíṣkeśaṃ vicakṣaṇám //23//

Verse: 24 
Halfverse: a    áyukta saptá śundʰyúvaḥ sū́ro rátʰasya naptyàḥ /
Halfverse: c    tā́bʰir yāti sváyuktibʰiḥ //24//

Verse: 25 
Halfverse: a    róhito divam ā́ruhat tápasā tapasvī́ /
Halfverse: c    sá yónim aíti sá u jāyate púnaḥ sá devā́nām ádʰipatir babʰūva //25//

Verse: 26 
Halfverse: a    yó viśvácarṣaṇir utá viśvátomukʰo yó viśvátaspāṇir utá viśvátaspr̥tʰaḥ /
Halfverse: c    sáṃ bāhúbʰyāṃ bʰarati sáṃ pátatrair dyā́vāpr̥tʰivī́ janáyan devá ékaḥ //26//

Verse: 27 
Halfverse: a    ékapād dvípado bʰū́yo ví cakramé dvípāt trípādam abʰy èti paścā́t /
Halfverse: c    dvípād dʰa ṣáṭpado bʰū́yo ví cakrame tá ékapadas tanvà1ṃ sám āsate //27//

Verse: 28 
Halfverse: a    átandro yāsyán haríto yád ā́stʰād dvé rūpé kr̥ṇute rócamānaḥ /
Halfverse: c    ketumā́n udyánt sáhamāno rájāṃsi víśvā āditya praváto ví bʰāsi //28//

Verse: 29 
Halfverse: a    báṇ mahā́m̐ asi sūrya báḍ āditya mahā́m̐ asi /
Halfverse: c    mahā́ṃs te maható mahimā́ tvám āditya mahā́m̐ asi //29//

Verse: 30 
Halfverse: a    rócase diví rócase antárikṣe pátaṅga pr̥tʰivyā́ṃ rocase rócase apsv à1ntáḥ /
Halfverse: c    ubʰā́ samudraú rúcyā vy ā̀pitʰa devó devāsi mahiṣáḥ svarjít //30// {9}

Verse: 31 
Halfverse: a    arvā́ṅ parástāt práyato vyadʰvá āśúr vipaścít patáyan pataṅgáḥ /
Halfverse: c    víṣṇur vícittaḥ śávasādʰitíṣṭʰan prá ketúnā sahate víśvam éjat //31//

Verse: 32 
Halfverse: a    citrā́ś cikitvā́n mahiṣáḥ suparṇá ārocáyan ródasī antárikṣam /
Halfverse: c    ahorātré pári sū́ryaṃ vásāne prā́sya víśvā tirato vīryā̀ṇi //32//

Verse: 33 
Halfverse: a    tigmó vibʰrā́jan tanvà1ṃ śíśāno 'raṃgamā́saḥ praváto rárāṇaḥ /
Halfverse: c    jyótiṣmān pakṣī́ mahiṣó vayodʰā́ víśvā ā́stʰāt pradíśaḥ kálpamānaḥ //33//

Verse: 34 
Halfverse: a    citráṃ devā́nām ketúr ánīkaṃ jyótiṣmān pradíśaḥ sū́rya udyán /
Halfverse: c    divākaró 'ti dyumnaís támāṃsi víśvātārīd duritā́ni śukráḥ //34//

Verse: 35 
Halfverse: a    citráṃ devā́nām úd agād ánīkaṃ cákṣur mitrásya váruṇasyāgnéḥ /
Halfverse: c    ā́prād dyā́vāpr̥tʰivī́ antárikṣaṃ sū́rya ātmā́ jágatas tastʰúṣaś ca //35//

Verse: 36 
Halfverse: a    uccā́ pátantam aruṇáṃ suparṇáṃ mádʰye divás taráṇiṃ bʰrā́jamānam /
Halfverse: c    páśyama tvā savitā́raṃ yám āhúr ájasraṃ jyótir yád avindad áttriḥ //36//

Verse: 37 
Halfverse: a    divás pr̥ṣṭʰé dʰā́vamānaṃ suparṇám ádityāḥ putráṃ nātʰákāma úpa yāmi bʰītáḥ /
Halfverse: c    sá naḥ sūrya prá tira dīrgʰám ā́yur mā́ riṣāma sumataú te syāma //37//

Verse: 38 
Halfverse: a    sahasrāhṇyáṃ víyatāv asya pakṣaú hárer haṃsásya pátataḥ svargám /
Halfverse: c    sá devā́nt sárvān úrasy upadádya saṃpáśyan yāti bʰúvanāni víśvā //38//

Verse: 39 
Halfverse: a    róhitaḥ kāló abʰavad róhitó 'gre prajā́patiḥ /
Halfverse: c    róhito yajñā́nāṃ múkʰaṃ róhitaḥ svà1r ā́bʰarat //39//

Verse: 40 
Halfverse: a    róhito lokó abʰavad róhitó 'ty atapad dívam /
Halfverse: c    róhito raśmíbʰir bʰū́miṃ samudrám ánu sáṃ carat //40// {10}

Verse: 41 
Halfverse: a    sárvā díśaḥ sám acarad róhitó 'dʰipatir diváḥ /
Halfverse: c    dívaṃ samudrám ā́d bʰū́miṃ sárvaṃ bʰūtáṃ ví rakṣati //41//

Verse: 42 
Halfverse: a    āróhan cʰukró br̥hatī́r átandro dvé rūpé kr̥ṇute rócamānaḥ /
Halfverse: c    citráś cikitvā́n mahiṣó vā́tamāyā yā́vato lokā́n abʰí yád vibʰā́ti //42//

Verse: 43 
Halfverse: a    abʰy à1nyád eti páry anyád asyate 'horātrā́bʰyāṃ mahiṣáḥ kálpamānaḥ /
Halfverse: c    sū́ryaṃ vayáṃ rájasi kṣiyántaṃ gātuvídaṃ havāmahe nā́dʰamānāḥ //43//

Verse: 44 
Halfverse: a    pr̥tʰivīpró mahiṣó nā́dʰamānasya gātúr ádabdʰacakṣuḥ pári víśvaṃ babʰūva /
Halfverse: c    víśvaṃ saṃpáśyant suvidátro yájatra idáṃ śr̥ṇotu yád aháṃ brávīmi //44//

Verse: 45 
Halfverse: a    páry asya mahimā́ pr̥tʰivī́ṃ samudráṃ jyótiṣā vibʰrā́jan pári dyā́m antárikṣam /
Halfverse: c    sárvaṃ saṃpáśyant suvidátro yájatra idáṃ śr̥ṇotu yád aháṃ brávīmi //45//

Verse: 46 
Halfverse: a    ábodʰy agníḥ samídʰā jánānāṃ práti dʰenúm ivāyatī́m uṣásam /
Halfverse: c    yahvā́ iva prá vayā́m ujjíhānāḥ prá bʰānávaḥ sisrate nā́kam ácʰa //46// {11}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.