და არა იყოს მღდელთა მათ ძეთა ლევიტელთა, სხუათა მათ ნათესავთა ნაწილ და სამკჳდრებელ შორის ისრაელისა, არამედ შესაწირავნი იგი უფლისანი იყვნენ ნაწილად მათდა და მას ჭამდედ.
ხოლო სხუა ნაწილი არა აქუნდეს ძმათა შორის თჳსთა, არამედ უფალი ნაწილ იყავნ.
მღდელთა მათ ერისა მისგან, რომელნი შესწირვიდეს მსხუერპლთა მათ, გინათუ ზუარაკსა, გინა ცხოვარსა, მიეცინ მღდელსა ნაწილად აღსაბმელი და ღაწუნი კოჭანითურთ,
და პირველი იფქლისა და ღჳნისა და ზეთისა, პირველი ნარისუავი ცხოვართა შენთა მისცე მას.
რამეთუ იგი გამოირჩია უფალმან ღმერთმან შენმან თავისა თჳსისა ყოველთაგან ნათესავთა დადგინებად მისა მსახურებად უფლისა, იგი და ძენი მისნი ძეთაგან ისრაელისათა ყოველთა დღეთა ცხორებისა მისისათა.
მო-თუ-ვინმე-ვიდეს ლევიტელი ერთი Page of ms. E: 50V რომლისავე ქალაქისა ძეთა მათ ისრაელისათა, სადაცა ვინ დამკჳდრებულ იყოს, რამეთუ გულმან ჰრქუა მას მოსლვად და მსახურებად ადგილსა მას, რომელი გამოირჩია უფალმან,
სამსახურებელად უფლისა ღმრთისა, ვითარცა ყოველთა ამათ ძმათა ლევიტელთა, რომელნი დგენ წინაშე უფლისა,
ეგრეცა მას მიეც ნაწილი საჭმლად, გარნა სასყიდელისა მისგან ნათესავთასა არა სცე მას.
და ოდეს შეხჳდე ქუეყანასა მას, რომელ მოგცა უფალმან ღმერთმან შენ, ნუ ისწავებ შენ საქმედ მსგავსად ბიწებისა მის მათ წარმართთასა.
ნუვინ იპოების შენ შორის, რომელი შესწვიდეს ძესა თჳსსა, გინა ასულსა ცეცხლითა, ანუთუ მისნობდეს მისნობითა, ანუ ჰავს იზმნიდეს ჰავითა ზმნითა, ანუ წამლებდეს წამლითა,
ანუ გრძნეულ იყოს, ანუ ულუკთმკითხველი, ანუთუ სასწაულით მკუდართა მკითხველი.
რამეთუ ბილწ არს წინაშე უფლისა, რომელი იქმოდის ამას ყოველსა, რამეთუ ამის ყოვლი\სა Page of ms. E: 51R ბილწებისათჳს მოსრნა იგინი უფალმან ღმერთმან შენმან პირისაგან შენისა.
არამედ სრულ იყავ შენ წინაშე უფლისა ღმრთისა შენისა.
ხოლო წარმართნი ესე, რომელ შენ დაიმკჳდრენ, ჰავისზმნათა და მისნობათა აღრეულ იყვნეს. ხოლო შენ არა ეგრე გამცნო უფალმან ღმერთმან შენმან.
რამეთუ წინაწარმეტყუელი ერთი აღგიდგინოს შენ უფალმან ღმერთმან შენმან ძმათა შენთაგანივე, ვითარცა-ესე მე, მისი ისმინოთ
მსგავსად (16S) ყოვლისა მის, რომელი-იგი ითხოვე უფლისა ღმრთისა შენისაგან ქორებს ჟამსა მას შეკრებისასა, რამეთუ სთქუათ: არდარა შევსძინოთ ჩუენ სმენად ჴმისა მის უფლისა ღმრთისა შენისა, და ცეცხლი ესე დიდი არდარა ვიხილოთ მერმე, რაჲთა არღარა მოვსწყდეთ.
და მომიგო უფალმან და მრქუა მე: მართლიად მოგიგიეს სიტყუა ეგე, რომელსა იტყოდეს.
წინაწარმეტყუელი აღუდგინო მათ ძმათაგანვე თჳსთა, ვითარცა-ეგე შენ. და მივსცნე მე სიტყუანი ესე ჩემნი პირსა მისსა და ეტყოდის მათ ყოველთავე მცნება\თა Page of ms. E: 51V მათ ჩემთა.
და იყოს კაცი იგი, რომელმან არა ისმინნეს ყოველნი იგი სიტყუანი მის წინაწარმეტყუელისანი. რომელსა-იგი ეტყოდის სახელითა ჩემითა, (20S) მე შური ვიძიო მისგან.
და წინაწარმეტყუელი, რომელი უსჯულოებდეს და იტყოდის სახელითა ჩემითა სიტყუასა, რომელსა მე არა უბრძანე მას სიტყუად, ანუ ეტყოდის სახელითა ღმერთთა უცხოთათა, სიკუდილით მოკუდეს იგი წინაწარმეტყუელი.
უკუეთუ სთქუა გულსა შენსა, ვითარ-მე უწყოდით სიტყუა იგი უფლისა, (22S) რომელსა უფალი არა ეტყოდის წინაწარმეტყუელსა, მას სიტყუასა?
რომელსა-იგი იტყოდის წინაწარმეტყუელი იგი სახელითა უფლისათა. და სიტყუა იგი არა იყოს მსგავს წინაწარმეტყუელისა მის, რომელსა-იგი ეტყოდა მას უფალი ღმერთი, ნუ შეუდგებით, რამეთუ უსჯულოებითა მით თავისა თჳსისათა იტყოდა ცრუ წინაწარმეტყუელი იგი.
