Page of ms. E: 85R და დაასრულნა მოსე ყოველნი იგი სიტყუანი, რომელთა ეტყოდა ძეთა ისრაელისათა
და ჰრქუა მათ: ასოცის წლისა ვარ მე დღეს და ვერ მიძლავს მე შემოსლვად და განსლვად თქუენ წინაშე, რამეთუ უფალმანცა მრქუა მე, ვითარმედ. არა წიაღ-ჰჴდე შენ იორდანესა ამას.
უფალი ღმერთი წინა გიძდოდის შენ და მან მოსპნეს ყოველნი მტერნი შენნი წინაშე პირსა შენსა და დაგიმკჳდროს შენ ქუეყანა იგი, რამეთუ ისო წარგიძდუეს წინაშე პირსა თქუენსა, ვითარცა ეტყოდა უფალი.
ეგრეცა უყოს უფალმან ღმერთმან თქუენმან, რაცა-იგი უყო სეონს და ოგს -- ორთა მათ მეფეთა ამორეველთა, რომელნი-იგი იყვნეს წიაღ იორდანესა ქუეყანასა მათსა, რამეთუ მოს\რნა Page of ms. E: 85V იგინი.
და მოგცნა უფალმან ღმერთმან თქუენმან ჴელთა თქუენთა და უყავთ მათ, ვითარ-იგი გამცენ თქუენ.
მჴნე იყავ და განძლიერდი, ნუ გეშინინ, ნუცა შესძრწუნდები, ნუცა დაბრკოლდები პირისაგან მათისა, რამეთუ უფალი ღმერთი შენი თანა გივალს, არ დაგაგდოს შენ, არცა უგულებელს-გყოს შენ.
მერმე სიტყუად იწყო მოსე ისოსა და ჰრქუა წინაშე ყოვლისა მის ერისა ისრაელისა: მჴნე იყავ და განძლიერდი, რამეთუ შენ წარუძღუე ერსა ამას და შეხჳდე ქუეყანასა მას, რომლისათჳს ეფუცა უფალი ღმერთი მამათა ჩუენთა მიცემად მაგათ, და შენ დაუმკჳდრო იგი მაგათ.
და უფალი ღმერთი თანაგივიდოდეს შენ, არა დაგაგდოს შენ, არცა უ\გულებელს-გყოს Page of ms. E: 86R შენ. ნუ გეშინინ, ნუცა შესძრწუნდები.
დაწერნა მოსე სიტყუანი ესე ამის სჯულისანი წიგნსა და მატიანესა და მისცა იგი ძეთა ლევისთა, მღდელთა, რომელთა აქუნდა კიდობანი სჯულისა მის უფლისა, და ყოველთა მათ მოხუცებულთა ერისა მის ისრაელისათა.
მერმე ამცნებდა მათ მოსე მას დღესა შინა და ჰრქუა: მეშჳდესა მას წელსა, ჟამსა მას წელიწადისა მის მიტევებისასა და დღესასწაულსა მას ტალავრობისასა,
რაჟამს შეკრბებოდიან ყოველნი ძენი ისრაელისანი წარდგომად წინაშე უფლისა ღმრთისა შენისა ადგილსა მას, რომელი-იგი გამოირჩია უფალმან ღმერთმან შენმან, აღმოიკითხო წიგნი ესე სჯულისა ყოველთა წინაშე ძეთა ისრაელისათა, ყურთა მათთა,
ყოვლისა კრებული\სა Page of ms. E: 86V ერისათა, მამებისა და დედებისა მათთასა, რომელ იყოს ქალაქთა შენთა შინა, რაჲთა ესმოდის და შეისწაონ შიში იგი უფლისა ღმრთისა თქუენისა, ისმინონ და ყონ ყოველი იგი სიტყუა, რომელ წერილ არს წიგნსა მას სჯულისასა.
და შვილთა მათთა, რომელთა არა იცოდიან, ისმინონ და შეისწაონ შიში უფლისა ღმრთისა თქუენისა ყოველთა დღეთა ცხორებისა მათისათა, რავდენ ცხოვნდენ ქუეყანასა მას ზედა, რომლისათჳს თქუენ წიაღ-ხუალთ იორდანესა დამკჳდრებად მისა.
მერმე სიტყუად იწყო უფალმან მოსესა და ჰრქუა: ესერა, მოახლებულ არიან დღენი სიკუდილისა შენისანი, მოუწოდე ისოს და დაადგინე იგი კართა ზედა კარვისა მის საწამებელისათა და ვამცნებდე მას. მივიდეს მოსე და Page of ms. E: 87R ისო კარავსა მას საწამებელისასა.
და გარდამოჴდა უფალი სუეტითა ღრუბლისათა წინაშე კართა კარვისა მის საწამებელისათა.
და ეტყოდა უფალი მოსეს და ჰრქუა: აწ, ეგერა, დაიძინო მამათა შენთა თანა. აღდგეს ერი იგი და ისიძვიდეს სამსახურებელთა მიმართ უცხოთა მაგის ქუეყანისათა, რომელსა შევლენან მაგას, დამიტეონ მე და გარდაჰჴდენ სჯულსა და მცნებასა ჩემსა, რომელ ვამცენ მათ.
განვრისხნე გულისწყრომით მათ ზედა მას დღესა შინა, დავსთხინე იგინი და გარე-მივაქციო პირი ჩემი მათგან. იყვნენ იგინი საჭმლად მჴეცთა ქუეყანისათა, პოვნენ იგინი ძჳრთა პირად-პირადთა და ჭირთა, და თქუან მას დღესა შინა: არა ვიდრემე ჩუენ თანა არს Page of ms. E: 87V უფალი ღმერთი ჩუენი, ამისთჳს მპოვნეს ჩუენ ძჳრთა ამათ პირად-პირადთა და ჭირთა.
და მე გარე-მივიქციო პირი ჩემი მათგან მას დღესა შინა უკეთურებათა მათთათჳს, რომელსა-იგი იქმოდეს, რამეთუ მიიქცეს სამსახურებელთა უცხოთა.
აწ დაწერენით სიტყუანი ესე ამის გალობისანი და ასწავენით ძეთა ისრაელისათა და შეასწავენით იგინი პირსა მათსა, რაჲთა იყოს გალობა იგი საწამებელად ძეთა მაგათ შორის ისრაელისათა.
რაჟამს შევიყვანენ იგინი ქუეყანასა მას კეთილსა, რომელ-იგი ვეფუცე მამათა თქუენთა, რომელსა გამოსდის სძე იგი და თაფლი, ჭამონ, განძღენ და მიიქცენ კერპთა მათ მიმართ უცხოთა და ჰმსახურებდენ მათ. განმარისხონ მე და გარდავიდ\ენ Page of ms. E: 88R მცნებათა მათ სჯულისა ჩემისათა.
და იყოს, რაჟამს პოვნენ იგინი ჭირთა ბოროტთა და ძჳრთა და აღუდგეს წინაშე პირსა მათსა გალობა ესე საწამებელად ჩემდა, არა დავიწყებულ იყოს ესე პირისაგან ნათესავისა მათისა, რამეთუ მე უწყი უკეთურება იგი მათი. რომელსაეგე იქმან დღეს, ვიდრე არდა შემიყვანებიან იგი[ნი] ქუეყანასა მას კეთილსა, რომელ-იგი ვეფუცე მამათა მათთა.
დაწერა მოსე გალობა ესე მას დღესა შინა და ასწავებდა ძეთა ისრაელისათა.
და ამცნებდა მოსე ისოს. ძესა ნავესსა, და ჰრქუა მას: მჴნე იყავ, განძლიერდი, რამეთუ შენ შეიყვანნე ძენი ეგე ისრაელისანი ქუეყანასა მას, რომლისათჳს ეფუცა უფალი მათ, რამეთუ იგი თავადი წინა გიძღოდეს თქუენ.
Page of ms. E: 88V იყო, რაჟამს დაასრულნა მოსე შთაწერად სიტყუანი ესე ამის სჯულისანი წიგნთა მატიანეთასა,
ამცნებდა ლევიტელთა მათ, რომელთა აქუნდა კიდობანი იგი სჯულისა მის უფლისა, და ჰრქუა:
აღიღე წიგნი ეგე მცნებათა ამათ სჯულისა მის უფლისათა და შთადევ ეგე გუერდით კერძო კიდობნისა მის სჯულისა უფლისა და იყავნ იგი თქუენ შორის საწამებელად.
რამეთუ მე უწყი ზრზინება ეგე თქუენი და ქედფიცხელობა, რამეთუ მე ესე ვიდრე ცხოველდა ვარ, დღეს განამწარებთ უფალსა ღმერთსა თქუენსა, რავდენდა უფროს შემდგომად სიკუდილისა ჩემისა ჰყოთ თქუენ.
აწ შემოკრიბეთ ჩემ წინაშე მთავრები იგი თქუენი და მღდელნი თქუენნი, მსა\ჯულნი, Page of ms. E: 89R მწიგნობარნი და განმგებელნი თქუენნი, რაჲთა ვეტყოდი ყურთა მათთა სიტყუათა ამათ, დავდვა აღთქუმა ჩემი მათ თანა და მოწამე-ვიყო მათ წინაშე ცა და ქუეყანა.
უწყი მე, რამეთუ შემდგომად სიკუდილისა ჩემისა უსჯულოებით უსჯულოებდეთ და გარდააქციოთ გზისა მისგან, რომელიესე მე გამცენ თქუენ. შეგემთხჳოს თქუენ ბოროტი შემდგომად მათ დღეთა, რამეთუ ბოროტსა იქმოდით წინაშე უფლისა ღმრთისა თქუენისა, განარისხოთ საქმითა მით ჴელთა თქუენთათა.
და ეტყოდა მოსე სიტყუათა ამათ გალობისათა ყურთა ყოვლისა მის ერისა ისრაელისათა მიაღსრულებადმდე.
