TITUS
Novum Testamentum graece
Part No. 236
Previous part

Chapter: 4 
Verse: 1    ᾽Αγαπητοί, μὴ παντὶ πνεύματι πιστεύετε, ἀλλὰ δοκιμάζετε τὰ πνεύματα εἰ ἐκ τοῦ ϑεοῦ ἐστιν, ὅτι πολλοὶ ψευδοπροϕῆται ἐξεληλύϑασιν εἰς τὸν κόσμον.
Verse: 2    ἐν τούτῳ γινώσκετε τὸ πνεῦμα τοῦ ϑεοῦ· πᾶν πνεῦμα ὃ ὁμολογεῖ ᾽Ιησοῦν Χριστὸν ἐν σαρκὶ ἐληλυϑότα ἐκ τοῦ ϑεοῦ ἐστιν,
Verse: 3    καὶ πᾶν πνεῦμα ὃ μὴ ὁμολογεῖ τὸν ᾽Ιησοῦν ἐκ τοῦ ϑεοῦ οὐκ ἔστιν· καὶ τοῦτό ἐστιν τὸ τοῦ ἀντιχρίστου, ὃ ἀκηκόατε ὅτι ἔρχεται, καὶ νῦν ἐν τῷ κόσμῳ ἐστὶν ἤδη.
Verse: 4    ὑμεῖς ἐκ τοῦ ϑεοῦ ἐστε, τεκνία, καὶ νενικήκατε αὐτούς, ὅτι μείζων ἐστὶν ὁ ἐν ὑμῖν ἢ ὁ ἐν τῷ κόσμῳ.
Verse: 5    αὐτοὶ ἐκ τοῦ κόσμου εἰσίν· διὰ τοῦτο ἐκ τοῦ κόσμου λαλοῦσιν καὶ ὁ κόσμος αὐτῶν ἀκούει.
Verse: 6    ἡμεῖς ἐκ τοῦ ϑεοῦ ἐσμεν· ὁ γινώσκων τὸν ϑεὸν ἀκούει ἡμῶν, ὃς οὐκ ἔστιν ἐκ τοῦ ϑεοῦ οὐκ ἀκούει ἡμῶν. ἐκ τούτου γινώσκομεν τὸ πνεῦμα τῆς ἀληϑείας καὶ τὸ πνεῦμα τῆς πλάνης.
Verse: 7    ᾽Αγαπητοί, ἀγαπῶμεν ἀλλήλους, ὅτι ἡ ἀγάπη ἐκ τοῦ ϑεοῦ ἐστιν, καὶ πᾶς ὁ ἀγαπῶν ἐκ τοῦ ϑεοῦ γεγέννηται καὶ γινώσκει τὸν ϑεόν.
Verse: 8    ὁ μὴ ἀγαπῶν οὐκ ἔγνω τὸν ϑεόν, ὅτι ὁ ϑεὸς ἀγάπη ἐστίν.
Verse: 9    ἐν τούτῳ ἐϕανερώϑη ἡ ἀγάπη τοῦ ϑεοῦ ἐν ἡμῖν, ὅτι τὸν υἱὸν αὐτοῦ τὸν μονογενῆ ἀπέσταλκεν ὁ ϑεὸς εἰς τὸν κόσμον ἵνα ζήσωμεν δι' αὐτοῦ.
Verse: 10    ἐν τούτῳ ἐστὶν ἡ ἀγάπη, οὐχ ὅτι ἡμεῖς ἠγαπήκαμεν τὸν ϑεόν, ἀλλ' ὅτι αὐτὸς ἠγάπησεν ἡμᾶς καὶ ἀπέστειλεν τὸν υἱὸν αὐτοῦ ἱλασμὸν περὶ τῶν ἁμαρτιῶν ἡμῶν.
Verse: 11    ᾽Αγαπητοί, εἰ οὕτως ὁ ϑεὸς ἠγάπησεν ἡμᾶς, καὶ ἡμεῖς ὀϕείλομεν ἀλλήλους ἀγαπᾶν.
Verse: 12    ϑεὸν οὐδεὶς πώποτε τεϑέαται· ἐὰν ἀγαπῶμεν ἀλλήλους, ὁ ϑεὸς ἐν ἡμῖν μένει καὶ ἡ ἀγάπη αὐτοῦ τετελειωμένη ἐν ἡμῖν ἐστιν.
Verse: 13    ᾽Εν τούτῳ γινώσκομεν ὅτι ἐν αὐτῷ μένομεν καὶ αὐτὸς ἐν ἡμῖν, ὅτι ἐκ τοῦ πνεύματος αὐτοῦ δέδωκεν ἡμῖν.
Verse: 14    καὶ ἡμεῖς τεϑεάμεϑα καὶ μαρτυροῦμεν ὅτι ὁ πατὴρ ἀπέσταλκεν τὸν υἱὸν σωτῆρα τοῦ κόσμου.
Verse: 15    ὃς ἐὰν ὁμολογήσῃ ὅτι ᾽Ιησοῦς ἐστιν ὁ υἱὸς τοῦ ϑεοῦ, ὁ ϑεὸς ἐν αὐτῷ μένει καὶ αὐτὸς ἐν τῷ ϑεῷ.
Verse: 16    καὶ ἡμεῖς ἐγνώκαμεν καὶ πεπιστεύκαμεν τὴν ἀγάπην ἣν ἔχει ὁ ϑεὸς ἐν ἡμῖν. ῾Ο ϑεὸς ἀγάπη ἐστίν, καὶ ὁ μένων ἐν τῇ ἀγάπῃ ἐν τῷ ϑεῷ μένει καὶ ὁ ϑεὸς ἐν αὐτῷ μένει.
Verse: 17    ἐν τούτῳ τετελείωται ἡ ἀγάπη μεϑ' ἡμῶν, ἵνα παρρησίαν ἔχωμεν ἐν τῇ ἡμέρᾳ τῆς κρίσεως, ὅτι καϑὼς ἐκεῖνός ἐστιν καὶ ἡμεῖς ἐσμεν ἐν τῷ κόσμῳ τούτῳ.
Verse: 18    ϕόβος οὐκ ἔστιν ἐν τῇ ἀγάπῃ, ἀλλ' ἡ τελεία ἀγάπη ἔξω βάλλει τὸν ϕόβον, ὅτι ὁ ϕόβος κόλασιν ἔχει, ὁ δὲ ϕοβούμενος οὐ τετελείωται ἐν τῇ ἀγάπῃ.
Verse: 19    ἡμεῖς ἀγαπῶμεν, ὅτι αὐτὸς πρῶτος ἠγάπησεν ἡμᾶς.
Verse: 20    ἐάν τις εἴπῃ ὅτι ᾽Αγαπῶ τὸν ϑεόν, καὶ τὸν ἀδελϕὸν αὐτοῦ μισῇ, ψεύστης ἐστίν· ὁ γὰρ μὴ ἀγαπῶν τὸν ἀδελϕὸν αὐτοῦ ὃν ἑώρακεν, τὸν ϑεὸν ὃν οὐχ ἑώρακεν οὐ δύναται ἀγαπᾶν.
Verse: 21    καὶ ταύτην τὴν ἐντολὴν ἔχομεν ἀπ' αὐτοῦ, ἵνα ὁ ἀγαπῶν τὸν ϑεὸν ἀγαπᾷ καὶ τὸν ἀδελϕὸν αὐτοῦ.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.