TITUS
Novum Testamentum graece
Part No. 150
Previous part

Chapter: 15 
Verse: 1    Γνωρίζω δὲ ὑμῖν, ἀδελϕοί, τὸ εὐαγγέλιον ὃ εὐηγγελισάμην ὑμῖν, ὃ καὶ παρελάβετε, ἐν ᾧ καὶ ἑστήκατε,
Verse: 2    δι' οὗ καὶ σῴζεσϑε, τίνι λόγῳ εὐηγγελισάμην ὑμῖν εἰ κατέχετε, ἐκτὸς εἰ μὴ εἰκῇ ἐπιστεύσατε.
Verse: 3    παρέδωκα γὰρ ὑμῖν ἐν πρώτοις, ὃ καὶ παρέλαβον, ὅτι Χριστὸς ἀπέϑανεν ὑπὲρ τῶν ἁμαρτιῶν ἡμῶν κατὰ τὰς γραϕάς,
Verse: 4    καὶ ὅτι ἐτάϕη, καὶ ὅτι ἐγήγερται τῇ ἡμέρᾳ τῇ τρίτῃ κατὰ τὰς γραϕάς,
Verse: 5    καὶ ὅτι ὤϕϑη Κηϕᾷ, εἶτα τοῖς δώδεκα·
Verse: 6    ἔπειτα ὤϕϑη ἐπάνω πεντακοσίοις ἀδελϕοῖς ἐϕάπαξ, ἐξ ὧν οἱ πλείονες μένουσιν ἕως ἄρτι, τινὲς δὲ ἐκοιμήϑησαν·
Verse: 7    ἔπειτα ὤϕϑη ᾽Ιακώβῳ, εἶτα τοῖς ἀποστόλοις πᾶσιν·
Verse: 8    ἔσχατον δὲ πάντων ὡσπερεὶ τῷ ἐκτρώματι ὤϕϑη κἀμοί.
Verse: 9    ᾽Εγὼ γάρ εἰμι ὁ ἐλάχιστος τῶν ἀποστόλων, ὃς οὐκ εἰμὶ ἱκανὸς καλεῖσϑαι ἀπόστολος, διότι ἐδίωξα τὴν ἐκκλησίαν τοῦ ϑεοῦ·
Verse: 10    χάριτι δὲ ϑεοῦ εἰμι ὅ εἰμι, καὶ ἡ χάρις αὐτοῦ ἡ εἰς ἐμὲ οὐ κενὴ ἐγενήϑη, ἀλλὰ περισσότερον αὐτῶν πάντων ἐκοπίασα, οὐκ ἐγὼ δὲ ἀλλὰ ἡ χάρις τοῦ ϑεοῦ [ἡ] σὺν ἐμοί.
Verse: 11    εἴτε οὖν ἐγὼ εἴτε ἐκεῖνοι, οὕτως κηρύσσομεν καὶ οὕτως ἐπιστεύσατε.
Verse: 12    Εἰ δὲ Χριστὸς κηρύσσεται ὅτι ἐκ νεκρῶν ἐγήγερται, πῶς λέγουσιν ἐν ὑμῖν τινες ὅτι ἀνάστασις νεκρῶν οὐκ ἔστιν;
Verse: 13    εἰ δὲ ἀνάστασις νεκρῶν οὐκ ἔστιν, οὐδὲ Χριστὸς ἐγήγερται·
Verse: 14    εἰ δὲ Χριστὸς οὐκ ἐγήγερται, κενὸν ἄρα [καὶ] τὸ κήρυγμα ἡμῶν, κενὴ καὶ ἡ πίστις ὑμῶν,
Verse: 15    εὑρισκόμεϑα δὲ καὶ ψευδομάρτυρες τοῦ ϑεοῦ, ὅτι ἐμαρτυρήσαμεν κατὰ τοῦ ϑεοῦ ὅτι ἤγειρεν τὸν Χριστόν, ὃν οὐκ ἤγειρεν εἴπερ ἄρα νεκροὶ οὐκ ἐγείρονται.
Verse: 16    εἰ γὰρ νεκροὶ οὐκ ἐγείρονται, οὐδὲ Χριστὸς ἐγήγερται·
Verse: 17    εἰ δὲ Χριστὸς οὐκ ἐγήγερται, ματαία ἡ πίστις ὑμῶν, ἔτι ἐστὲ ἐν ταῖς ἁμαρτίαις ὑμῶν.
Verse: 18    ἄρα καὶ οἱ κοιμηϑέντες ἐν Χριστῷ ἀπώλοντο.
Verse: 19    εἰ ἐν τῇ ζωῇ ταύτῃ ἐν Χριστῷ ἠλπικότες ἐσμὲν μόνον, ἐλεεινότεροι πάντων ἀνϑρώπων ἐσμέν.
Verse: 20    Νυνὶ δὲ Χριστὸς ἐγήγερται ἐκ νεκρῶν, ἀπαρχὴ τῶν κεκοιμημένων.
Verse: 21    ἐπειδὴ γὰρ δι' ἀνϑρώπου ϑάνατος, καὶ δι' ἀνϑρώπου ἀνάστασις νεκρῶν·
Verse: 22    ὥσπερ γὰρ ἐν τῷ ᾽Αδὰμ πάντες ἀποϑνῄσκουσιν, οὕτως καὶ ἐν τῷ Χριστῷ πάντες ζῳοποιηϑήσονται.
Verse: 23    ἕκαστος δὲ ἐν τῷ ἰδίῳ τάγματι· ἀπαρχὴ Χριστός, ἔπειτα οἱ τοῦ Χριστοῦ ἐν τῇ παρουσίᾳ αὐτοῦ·
Verse: 24    εἶτα τὸ τέλος, ὅταν παραδιδῷ τὴν βασιλείαν τῷ ϑεῷ καὶ πατρί, ὅταν καταργήσῃ πᾶσαν ἀρχὴν καὶ πᾶσαν ἐξουσίαν καὶ δύναμιν.
Verse: 25    δεῖ γὰρ αὐτὸν βασιλεύειν ἄχρι οὗ ϑῇ πάντας τοὺς ἐχϑροὺς ὑπὸ τοὺς πόδας αὐτοῦ.
Verse: 26    ἔσχατος ἐχϑρὸς καταργεῖται ὁ ϑάνατος·
Verse: 27    πάνταγὰρ ὑπέταξεν ὑπὸ τοὺς πόδας αὐτοῦ. ὅταν δὲ εἴπῃ ὅτι πάντα ὑποτέτακται, δῆλον ὅτι ἐκτὸς τοῦ ὑποτάξαντος αὐτῷ τὰ πάντα.
Verse: 28    ὅταν δὲ ὑποταγῇ αὐτῷ τὰ πάντα, τότε [καὶ] αὐτὸς ὁ υἱὸς ὑποταγήσεται τῷ ὑποτάξαντι αὐτῷ τὰ πάντα, ἵνα ᾖ ὁ ϑεὸς [τὰ] πάντα ἐν πᾶσιν.
Verse: 29    ᾽Επεὶ τί ποιήσουσιν οἱ βαπτιζόμενοι ὑπὲρ τῶν νεκρῶν; εἰ ὅλως νεκροὶ οὐκ ἐγείρονται, τί καὶ βαπτίζονται ὑπὲρ αὐτῶν;
Verse: 30    τί καὶ ἡμεῖς κινδυνεύομεν πᾶσαν ὥραν;
Verse: 31    καϑ' ἡμέραν ἀποϑνῄσκω, νὴ τὴν ὑμετέραν καύχησιν, [ἀδελϕοί,] ἣν ἔχω ἐν Χριστῷ ᾽Ιησοῦ τῷ κυρίῳ ἡμῶν.
Verse: 32    εἰ κατὰ ἄνϑρωπον ἐϑηριομάχησα ἐν ᾽Εϕέσῳ, τί μοι τὸ ὄϕελος; εἰ νεκροὶ οὐκ ἐγείρονται, Φάγωμεν καὶ πίωμεν, αὔριον γὰρ ἀποϑνῄσκομεν.
Verse: 33    μὴ πλανᾶσϑε· Φϑείρουσιν ἤϑη χρηστὰ ὁμιλίαι κακαί.
Verse: 34    ἐκνήψατε δικαίως καὶ μὴ ἁμαρτάνετε, ἀγνωσίαν γὰρ ϑεοῦ τινες ἔχουσιν· πρὸς ἐντροπὴν ὑμῖν λαλῶ.
Verse: 35    ᾽Αλλὰ ἐρεῖ τις, Πῶς ἐγείρονται οἱ νεκροί; ποίῳ δὲ σώματι ἔρχονται;
Verse: 36    ἄϕρων, σὺ ὃ σπείρεις οὐ ζῳοποιεῖται ἐὰν μὴ ἀποϑάνῃ·
Verse: 37    καὶ ὃ σπείρεις, οὐ τὸ σῶμα τὸ γενησόμενον σπείρεις ἀλλὰ γυμνὸν κόκκον εἰ τύχοι σίτου ἤ τινος τῶν λοιπῶν·
Verse: 38    ὁ δὲ ϑεὸς δίδωσιν αὐτῷ σῶμα καϑὼς ἠϑέλησεν, καὶ ἑκάστῳ τῶν σπερμάτων ἴδιον σῶμα.
Verse: 39    οὐ πᾶσα σὰρξ ἡ αὐτὴ σάρξ, ἀλλὰ ἄλλη μὲν ἀνϑρώπων, ἄλλη δὲ σὰρξ κτηνῶν, ἄλλη δὲ σὰρξ πτηνῶν, ἄλλη δὲ ἰχϑύων.
Verse: 40    καὶ σώματα ἐπουράνια, καὶ σώματα ἐπίγεια· ἀλλὰ ἑτέρα μὲν ἡ τῶν ἐπουρανίων δόξα, ἑτέρα δὲ ἡ τῶν ἐπιγείων.
Verse: 41    ἄλλη δόξα ἡλίου, καὶ ἄλλη δόξα σελήνης, καὶ ἄλλη δόξα ἀστέρων· ἀστὴρ γὰρ ἀστέρος διαϕέρει ἐν δόξῃ.
Verse: 42    Οὕτως καὶ ἡ ἀνάστασις τῶν νεκρῶν. σπείρεται ἐν ϕϑορᾷ, ἐγείρεται ἐν ἀϕϑαρσίᾳ·
Verse: 43    σπείρεται ἐν ἀτιμίᾳ, ἐγείρεται ἐν δόξῃ· σπείρεται ἐν ἀσϑενείᾳ, ἐγείρεται ἐν δυνάμει·
Verse: 44    σπείρεται σῶμα ψυχικόν, ἐγείρεται σῶμα πνευματικόν. εἰ ἔστιν σῶμα ψυχικόν, ἔστιν καὶ πνευματικόν.
Verse: 45    οὕτως καὶ γέγραπται, ᾽Εγένετο ὁ πρῶτος ἄνϑρωπος ᾽Αδὰμ εἰς ψυχὴν ζῶσαν· ὁ ἔσχατος ᾽Αδὰμ εἰς πνεῦμα ζῳοποιοῦν.
Verse: 46    ἀλλ' οὐ πρῶτον τὸ πνευματικὸν ἀλλὰ τὸ ψυχικόν, ἔπειτα τὸ πνευματικόν.
Verse: 47    ὁ πρῶτος ἄνϑρωπος ἐκ γῆς χοϊκός, ὁ δεύτερος ἄνϑρωπος ἐξ οὐρανοῦ.
Verse: 48    οἷος ὁ χοϊκός, τοιοῦτοι καὶ οἱ χοϊκοί, καὶ οἷος ὁ ἐπουράνιος, τοιοῦτοι καὶ οἱ ἐπουράνιοι·
Verse: 49    καὶ καϑὼς ἐϕορέσαμεν τὴν εἰκόνα τοῦ χοϊκοῦ, ϕορέσομεν καὶ τὴν εἰκόνα τοῦ ἐπουρανίου.
Verse: 50    Τοῦτο δέ ϕημι, ἀδελϕοί, ὅτι σὰρξ καὶ αἷμα βασιλείαν ϑεοῦ κληρονομῆσαι οὐ δύναται, οὐδὲ ἡ ϕϑορὰ τὴν ἀϕϑαρσίαν κληρονομεῖ.
Verse: 51    ἰδοὺ μυστήριον ὑμῖν λέγω· πάντες οὐ κοιμηϑησόμεϑα, πάντες δὲ ἀλλαγησόμεϑα,
Verse: 52    ἐν ἀτόμῳ, ἐν ῥιπῇ ὀϕϑαλμοῦ, ἐν τῇ ἐσχάτῃ σάλπιγγι· σαλπίσει γάρ, καὶ οἱ νεκροὶ ἐγερϑήσονται ἄϕϑαρτοι, καὶ ἡμεῖς ἀλλαγησόμεϑα.
Verse: 53    δεῖ γὰρ τὸ ϕϑαρτὸν τοῦτο ἐνδύσασϑαι ἀϕϑαρσίαν καὶ τὸ ϑνητὸν τοῦτο ἐνδύσασϑαι ἀϑανασίαν.
Verse: 54    ὅταν δὲ τὸ ϕϑαρτὸν τοῦτο ἐνδύσηται ἀϕϑαρσίαν καὶ τὸ ϑνητὸν τοῦτο ἐνδύσηται ἀϑανασίαν, τότε γενήσεται ὁ λόγος ὁ γεγραμμένος, Κατεπόϑη ὁ ϑάνατος εἰς νῖκος.
Verse: 55    ποῦ σου, ϑάνατε, τὸ νῖκος; ποῦ σου, ϑάνατε, τὸ κέντρον;
Verse: 56    τὸ δὲ κέντρον τοῦ ϑανάτου ἡ ἁμαρτία, ἡ δὲ δύναμις τῆς ἁμαρτίας ὁ νόμος·
Verse: 57    τῷ δὲ ϑεῷ χάρις τῷ διδόντι ἡμῖν τὸ νῖκος διὰ τοῦ κυρίου ἡμῶν ᾽Ιησοῦ Χριστοῦ.
Verse: 58    ῞Ωστε, ἀδελϕοί μου ἀγαπητοί, ἑδραῖοι γίνεσϑε, ἀμετακίνητοι, περισσεύοντες ἐν τῷ ἔργῳ τοῦ κυρίου πάντοτε, εἰδότες ὅτι ὁ κόπος ὑμῶν οὐκ ἔστιν κενὸς ἐν κυρίῳ.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.