Me äšurxoxun oša Q̣onʒ́uġon q̇eräz yetmiš tane č̣äkṗi, šoṭoġoval pä͑ tan-pä͑ tan Ič taġala här šähäre, här ayize Ičuxun be͑ś yaq̇anebi.
Šoṭoġo pine: "Mähsul gelene, äšṗal isä mal, šoṭaynaḳal mähsuli Q̣onǯuġo xoinśbanan ki, Iz mähsula girbseynaḳ äšṗalxoq̇an yaq̇abi.
Takinan! Zu vä͑x ulurxoy boš q̇uziyox ḳinäḳez yaq̇absa.
Nä toray, nä zämbül, nä toroḳal exmadanan, yaq̇a šuḳḳala savaxeyr - aabatxeyir mabanan.
Mani ḳoya baġaynan süfṭä upanan: "Me ḳoya hämišä ämin-amanluġq̇an baki!"
Ägär ṭeṭiya ämin-amanluġ baksuna laiġ sa amdar bunesa, ef čureci ämin-amanluġ šoṭaynaḳ bakale. Tärsina bakayin-qaybakale vä͑ynaḳ.
Ef baci ḳoya mandanan, vä͑x ḳä tadayṭun ukanan-u͑ġänan, šoṭaynaḳ ki, äšṗala amdari iz äšlägöräne haqq. Ḳoyaxun ḳoya ma č̣ovakanan.
He vaxṭ sa šähäre baci vä͑x q̇abulbeṭunsa, ef be͑š laxalṭu ukanan.
Ṭiya bakala azariṭoġoval q̇olaybanan, upanan: "Buxaʒ́uġoy Padčaġluġ vä͑x iśanebaksa."
Ama ägär maninesa šähäre vä͑x teṭun q̇abul bi, ṭe šähäri küčämoġo č̣ekinan, metär upanan:
Ef šähäre beš turmo͑ġo läčäq̇eci tozal vä͑ynaḳyan capsṭa, ama moṭoval avabakanan ki, Buxaʒ́uġoy Padčaġluġ vä͑x iśabakene."
Vä͑x nexsu ki, axərənǯi ġine ṭe šähäri hal Sidonaxun betär bakale.
Vay vi hala, ay Ḳorazin, vay vi hala, Beṭ-Sayda! šoṭaynaḳ ki, vä͑sṭa baki möǯüzox Tirq̇a Sidona bakiniy šoṭoġon gele vaxṭaxun čul lapi žeq̇e boš arci tooba beṭuniy.
Ama axərənǯi ġine ef hal Surq̇a Sidonaxun betär bakale.
Hun, ay Ḳaṗernaum, göye ćoyel ciriḳ alabakalnu? Tää, ǯähännämä boseġalnu.
Vä͑x u͑mu͑x laxalo Za u͑mu͑x laxine baksa, vä͑x ṭo͑o͑x balo za ṭo͑o͑x bine baksa. Za ṭo͑o͑x balo isä Za Yaq̇abiṭune ṭo͑o͑x bi baksa".
Oša yetmiš šagird mu͑q-mu͑q qaybaki, piṭun: "Ay Q̣onʒ́ux! Vi cien ǯinurxoval yax tabiṭun baksa!"
Isusen šoṭoġo metäre ǯoġab tadi: "Zu Šeytani c̣äq ḳinä göynuxun bisṭuna aḳezuy.
Beġanan, vä͑x diziḳxo, ägräbxo saal du͑šmäni bito zora ef turnoq̇a ćaxćuxṗsuni exṭiyäräz tasṭa, hiḳḳalenal vä͑x zäräl tene tadal.
Ama urufxoy vä͑x tabi baksuna ma mu͑q bakanan, efi c̣i ġöynul camesuna mu͑q bakanan".
Isus ṭe vädä ω͑vel Urufen mu͑q baki pine: "Ay göyeq̇a oćali Q̣onʒ́ux Bava! Vaxun iräzizu ki, moṭoġo haq̇ullu, kamallu amdarxoxun č̣aṗbi xuri äyloġoynaḳen qaypi! Hoo, ay Bava! Šoṭaynaḳ ki, mo Vi čureġala niyätey.
Bez Bavay täräfäxun här šey Za tedeci. Ġare šu baksuna Iz Bavaxun bašq̇al šuḳḳalen tene avabakon. Bavay šu baksunal Iz Ġaraxun saal Iz Ġaren avabakesṭun čureci amdarxoxun bašq̇al šuḳḳalen tene čalxo".
Oša Isusen šagirdxoč furupi šoṭoġo ǯöyǯä pine: "He bäxṭäväre ṭe pulmux ki, ef aḳiṭoġone aḳsa!
Vä͑x nexsu: xavartašalxoy saal padčaġxoy geleṭin ef aḳiṭoġo aḳsun čurṭunci, ama teṭun aḳi, ef ibakiṭoġo ibaksunṭun čureci, ama teṭun ibaki".
Sa ḳanun camḳalen Isusa sinäynšbseynaḳ hayzeri pine: "Määlim, hämišäluġ yäšäinšä miras ḳinä haqseynaḳ zu ḳä bizbuq̇o?"
Isusenal šoṭoxun xavare haq̇i: "Ḳanuni boš ḳä camece? Hetären ḳale?"
Šoṭin ǯoġabe tadi: "Vi Q̣onʒ́ux Buxaʒ́uġo vi bütüm üḳen, bütüm urufen, bütüm zoren, saal bütüm haqəlen čureki". Saal "Vi q̇onšinal va čureġala ḳinäḳ čureki"".
Isusen šoṭo pine: "Hun düz ǯoġaben tadi. Haketäräl ba-yäšäyinšalnu".
Šoṭin isä iču tämizluġa č̣evḳseynaḳ Isusaxun xavare haq̇i: "P̣oy bez iśoo šuva?"
Isusen metäre ǯoġab tadi: "Sa amdar Yerusalimaxun Yerixoya taġala yaq̇a fu͑q̇ḳalxoy kiyene kofṭi. Fu͑q̇ḳalxon šoṭay paltara č̣eq̇i, yaralainši, elmoġoy loxol barti taṭunci.
Ṭetäre baki ki, ṭe yaq̇en sa be͑inśe č̣ovaki, me amdara aḳi yaq̇e ṭe täräfen č̣ovaki taneci.
Sa Levilial ṭeṭiya iśalainšaki, ṭe amdara aḳi yaq̇e ṭe täräfene č̣ovaki taci.
Ṭe yaq̇axun taġala sa Samariyalunen isä me amdara aḳaṭan šoṭo iz goroxe hari.
Iśalainšaki šoṭay yaroġo č̣äyinenq̇a finen oc̣ḳi ġaćepi. Oša me amdara iz elema arcevḳi, q̇onaġxoy ḳoya ečeri, šoṭay q̇ulluġe čurepi.
Äyč̣indäri šoṭin ṗä͑ dinar č̣evḳi q̇onaġxoy ḳožin kalaṭu tadi pine: "Koṭo šaaṭ be͑ġa, ägär moṭoxunal gele vi xarǯ č̣eġain, zu qoš qaybakaṭan tadoz va."
Vi zänden, me xib tanaxun manu fu͑q̇ḳalxoy kiyel bafṭi amdari iśone?"
Ḳanun camḳalen ǯoġabe tadi: "Šoṭo üḳ boḳospalo". Isusenal šoṭo pine: "Taki hunal ketär ba".
Isus Iz šagirdxoxun sagala yaq̇ taysun sa ayizene baci. Memiya Marṭa c̣ila sa čuġon Iču iz ḳoyane ḳalpi.
Šoṭay Mariya c̣ila sa xunčinoy. Šo Q̣onʒ́uġoy turmoġosṭa arci Šoṭay äyitmoġo umu͑xe laxsay.
Marṭa isä äšlin geleluġaxun čäšmišäkeney. Šo Isusa iśalainšaki pine: "Ay Qo͑nʒ́ux! Ten aḳsa ki, bez xunčen äšurxo täk bez loxole bose? Koṭo upa ki, za kömäybeq̇an".
Q̣onʒ́uġon isä šoṭo metäre ǯoġab tadi: "Marṭa! Marṭa! Hun gele šeyaxun naraat baki, täšvišän bafsṭa.
Täk sa šeye lazəm. Mariyan šaaṭṭune č̣äḳṗe. Moval iz kiyexun tene haq̇eġal".
