Me vädä hazarxon amdar sun-suna səxəšṭərišsun ṭeṭiyane gireci. Isusen süfṭä šagirdxone exlätbsa burqi: "Fariseyxoy ä͑yinaxun, yäni ṗäćolaluġaxun vä͑x be͑ganan.
Ṭetär č̣aṗ sa šey teno ki, äšḳärä nu č̣eġane, saal ṭetär č̣äṗḳin sa šey teno ki, nu avabakaṭun.
Moṭo göräl bayinq̇una vä͑n piṭu ġene išiġa ibakalṭun, kilit ćomoy bać̣ane u͑mu͑ġoy koć̣e pi här äyit u͑ġu͑lxun bayan bakale.
Ay dosṭurxo, vä͑x nexsu: bädänä besṗi šoṭoxun oša q̇eräz hiḳḳal nu bes bakalṭoġoxun ma q̇i͑banan.
Ama Šuxun q̇i͑bsun lazəm baksuna vä͑x uḳaz: amdara besṗiṭuxun oša ǯähännämä bosala exṭiyär bakala Buxaʒ́uġoxun q̇i͑banan. Hoo, vä͑x nexsu: Šoṭoxun q̇i͑banan.
Qo čoval ṗä͑ xuri tänginal tene toyesa? Šoṭoġoy säyǯoo Buxaʒ́uġoy ṭo͑ġo͑l eyexun tene č̣eysa.
Ef bel bakala popurxoval bo͑q̇älecene. Ma q̇i͑banan, vä͑n bo͑q̇älpi čarḳes nu bakala čovalxoxun ef toy gelene.
Zu vä͑x moṭoz nex: šin Za amdarxoy be͑ś tämiz üḳen čalxain, Insani Ġarenal šoṭo Buxaʒ́uġoy angelxoy be͑ś tämiz üḳen čalxale.
Ama šin Za amdarxoy be͑ś nu q̇abulbain, šoval Buxaʒ́uġoy angelxoy be͑ś q̇abul tene bakal.
Insani Ġaren äleyinä sa äyit uḳala amdar baġəšlainšakale, ama ω͑vel Urufa pis uḳalo tene baġəšlainšakal.
Vä͑x sinagogxo, hampoġoy, kalaṭoġoy be͑ś divanbaṭan, vä͑x höndä čarḳesṭuni, nääl ki, ḳä upsuni barada naraat ma bakanan.
ω͑vel Urufen vä͑x ṭe vaxṭasṭa ḳä upsuna zombale".
Amdarxoy bošṭan sunṭin Isusa pine: "Määlim, bez vičä upa ki, bavaxun mandi mirasa zaxun ǯöybeq̇an".
Isusen šoṭo metäre ǯoġab tadi: "Ay išq̇ar, Za šina ef loxol divanbal, nääl ki, mal ǯöybal laxe?"
Oša Isusen šoṭoġo pine: "Diggätlu bakanan, här ǯür tamaxkärluġaxun vä͑x güdmüšanan, šoṭaynaḳ ki, amdari yäšäyinšbsun dövläti geleluġaxun asələ tene".
Isusen šoṭoġo me mäsäläninäne exlätbi: "Sa dövlätluṭay oćalen bol mähsule tadi.
Me amdaren iz üḳin boš fikirebi: "Bez mähsula laxala ga butezax. P̣oy ḳä baz?"
Oša pine: "Metärez bon: ambarxo carpi samalal kaloo biq̇oz. Bez bito taxəla saal mala ṭiyaz baḳon.
Bez elmoġo uzḳon: ay elmux, usenxon za ṗoyeġala var-dövläten girbe. Isä dinǯäinšaka, uka-u͑ġä, kefba".
Ama Buxaʒ́uġon šoṭo pine: "Ay axmaġ, me üše vi elmoġo vaxun haq̇alṭun. P̣oy vi häzzürbiyo šu mandala?"
Ičeynaḳ dövlät topbalṭay, ama Buxaʒ́uġoy be͑ś dövläṭlu nubakalṭay här sa amdari axər metär bakale".
Isusen iz šagirdxo metäre pi: "Koṭaynaḳal Zu vä͑x nexsu: "Ḳä ukalyan?"-pi, ef elmoġoy, "Ḳä laḳalyan?"- pi, ef bädäni fikirä ma zapanan.
Elmux uksunaxun, bädän isä lapsunaxun gele vaǯibe.
Ġäynoġo beġanan: šoṭoġon nä biṭunsṭa, nä exṭunbsa, nä ambarxo teno, nä kururxo. Ama Buxaʒ́uġon šoṭoġo ukesesṭa. Vä͑n q̇ušurxoxun heq̇ädär toyexlunan!
Ef mani sunṭin fikirbsunen ef ömürä malǯäl bakain boxoy besa bakon?
Ägär vä͑n ketär micik šeya bsuna tenan baǯarbsa isä, heṭaynaḳ q̇eräz šeyurxoy fikiränän zaṗe?
Vardurxoy hetär kalabaksuna be͑ġanan! Šoṭoġon nä zähmäṭṭun aḳsa, nä ä͑lṭunsṭa. Ama vä͑x moṭoz nex ki, Solomonenal bito iz var-dövläten me vardurxoy sayǯäṭullariḳ latenepey.
Ay Buxaʒ́uġo mal ve͑bakalxo, Buxaʒ́uġon ġe čöle baki, äyč̣ä aruġo boseġala oya metär lapesesṭa isä, vä͑x lapesṭun he q̇ädär yaġina!
"Ḳä ukalyan?", "Ḳä u͑ġalyan?"uḳa fikirbi naraat ma bakanan.
Šoṭaynaḳ ki, dünyäni q̇eräz azuḳxonal bito me šeymoġo qä͑vṭsuna. Serinaxunal, ef Bavan moṭoġo ef ehtiyaǯ baksuna avane.
Ama vä͑n täk Buxaʒ́uġoy Padčaġluġa qä͑ve͑ynan, ṭe vädä moroxal vä͑x avuzin tadeġale.
Ma q̇iba, ay micik sürül Šoṭaynaḳ ki, ef Bavan Padčaġluġa vä͑x tasṭunane lazəm be͑ġi.
Ef bakalṭu toydanan, näzir paybanan, vä͑ynaḳ nu bisibakala torayxo, göynül nu čarḳala dövlät häzzürbanan. Ṭeṭiya nä oġri tene eġal, nääl ki šoṭo moġmoġen tene ḳasḳal.
Šoṭaynaḳ ki, ef dövlät mayanesa, ef üḳäl ṭeṭiya bakale".
"Barta q̇ainš ef bi͑yex ġać, ef čiraġxo boḳsun mandeq̇an.
Laśḳoyaxun qaybakala q̇onʒ́uġoy yaq̇a be͑ġala amdarxo ošq̇ardanan. Q̣onʒ́uġon hari ćomo ṭaṗḳala ḳinäḳ qaypsuna häzzürṭun baksa.
He bäxṭävärä ṭe nökärxo ki, q̇onʒ́ux q̇aybakaṭan šoṭoġo muġure aḳsa! Vä͑x düzinäz nex: Šoṭin ičin q̇ainša ġaćṗi nökärxo sulfin bać̣ane arcevḳale, hariyal šoṭoġo q̇ulluġ bale.
Q̣onǯuġon nä üšenin yarine, nääl ki šoṭoxun č̣äyi, savaxa iśa hari nökärxo muġur aḳain, me nökärxo he q̇ädär bäxṭävärṭun!
Ama moṭo avabakanan ki, ägär ḳožin q̇onʒ́uġon oġrin mani vädä eysuna avabakiniy, šoṭin kožin füq̇baksuna barteneḳoy.
Hametär, vä͑näl häzzür bakanan, šoṭaynaḳ ki, Insani Ġar vä͑n nu yaq̇beġala vaxṭesṭa eġale".
P̣yoṭren pine: "Ay Qonʒ́ux, me mäsälinä täk yaynaḳen exlätbsa, yoxsa bitoṭaynaḳ"?
Qonʒ́uġon ǯoġabe tadi: "Nökärxo iz vaxṭasṭa šum tasṭeynaḳ aġan iz nökärxoy loxol täyinbi exṭibarlu saal haq̇ullu kalaluġ balo šuva?
He bäxṭävärä te nöker ki, q̇onʒ́ux ḳoya qaybakaṭan iču äšlin bele aḳsa!
Vä͑x düzinäz nex, q̇onʒ́uġon me nökärä iz bito var dövläti loxol kalaluġa tapšurbale.
Ama ägär ṭe nökären iz üḳin boš "bez q̇onʒ́ux č̣äyi eġale" pi, ṭi͑yämi nökärxoq̇a qulluġčiġo ṭaṗsa, käyi-u͑ġsa saal finaġoyluġbsuna burqain,
ṭe nökäri kaloo šoṭin nu yaq̇ beġala ġine saal iz haq̇i͑le nu eġala vaxṭesṭa eġale, šoṭo bi͑hi ǯäza tadale, saal exṭibärsuzṭoġoxun sagala badale.
Iz q̇onʒ́uġoy čureġalṭu avabaki häzzür nu bakala, šoṭay čureġalṭu ämäl nu bala nökär gele ṭaṗeġale.
Ama nu avabaki ṭe ǯäzinä layiġ äš biq̇alo mal ṭaṗeġale! Šu gele tadecene, šoṭoxun geleal haq̇eġale. Šu gele tapšurbakene šoṭoxunal gele täläb bakale.
Zu dünyäne arux ciṗsaz hare. Ḳä bakoy me arux bäč̣üḳeci boḳi bakiniy!
Bez č̣ovakala sa xač zaṗesuno. Me xač zaṗesun bex ṗaṗamin hetär čätinluġi oq̇a bakalazu!
Vä͑n fikirnanbsa ki, Zu oćalin ćoyel šiṗluġ ešṭaz hare? Tää, vä͑x nexsu ki, Zu ǯöybaksun ešṭaz hare!
Šoṭaynaḳ ki, moṭoxun oša sa ḳoya yäšäinšala q̇o tan sun-sunaxun ǯöybaki xib tana q̇arši ṗä tan, ṗä tana q̇arši xib tan bakale.
Šoṭaynaḳ ki, bava ġaraxun, ġar bavaxun, nana xuyäräxun, xuyär nananun, q̇aynako binaxun, bin q̇aynakoxun ǯöybakalṭun".
Isusen amdarxo moṭoval pine: "Vä͑n beġ batḳala täräfäxun eġala asoya aḳaṭan haṭe saad "aġala eġale" nexnan. ketäräl baneksa.
Güney täräfäxun muše fupsuna aḳaṭan "gele gam bakale" nexnan, ketäräl baneksa.
Ay ṗäćolorox, oćalin ćoyin saal göye niśanxo č̣äḳṗes bananksa, ṗoy ṭe vädä heṭaynaḳ häysäṭin vaxṭa č̣äḳṗes tenan baksa?
Heṭaynaḳ düzgün bakalṭu vä͑nǯä q̇amišakes tenan baksa?
Va taxsərkär balṭuxun divan biq̇ali ṭo͑ġo͑l taġaṭan yaq̇aǯä šoṭoxun barəšaksuna čaləšaka. Tenesa, va divan biq̇ali ṭo͑ġo͑l xorḳale, divan biq̇alen isä iz iǯračinäč č̣ovaḳesṭale. Šoṭinal va zindana bosale.
Vä͑x moṭoz nex: tam axərənǯi köpiyä nu tadamin, ṭiyanaxun sal sa vaxṭ č̣eġalatenu".
