Me vaxṭ ṭeṭia bakala bäzi amdarxon Isusa xavarṭun tadi ki, bäzi Galileyluġon q̇urbanxo ečaṭan P̣ilaṭen šoṭoġo besṗi ičoġoy ṗiya šoṭoġon śampi q̇urbanxoy ṗiyane gärbe.
Isusen koṭo metäre ǯoġab tadi: "Vä͑n penanṗoy ičoġoy bel me äšurxo hari Galileyluyox ṭi͑yami bito Galileyluġoxun gele betär günaxkarṭuniy?
Tää, Zu nexsu vä͑x: ägär tooba nubaynan, vä͑nal bito šoṭoġollariḳ äfčibakalnan.
Nääl ki, Siloami q̇ala muġec̣c̣e tane bel biti šoṭoġo besṗaṭan, fikirnanbsa ki, šorox bito ṭi͑yami Yerusalimluġoxun taxsərkärṭuniy?
Tää, Zu nexsu vä͑x: ägär tooba nubaynan, vä͑nal bito šoṭoġollariḳ äfčibakalnan".
Oša Isusen me mäsäläninäne ečeri: "Sa amdari ganu sa inǯili xode biṭecey. Me amdaren hari xodal meyväne qä͑veci, ama tene bä͑ġä͑bi.
Šoṭin baġbana pine: "Maġay beġa, xib usene ki, hari me inǯilnä xodin loxol meyvä bä͑ġä͑tezbsa. Boṭa koṭo, heṭaynaḳ amc̣ω gala ga biq̇ane?"
Baġbanen isä metäre ǯoġab tadi: "Aġa, sa usenal koṭo kul ma duġa, zu iz tuma kaśṗi härräminä peyinez ciḳo.
Eġalsen meyvä baneko, šaaṭe. Nu bakayin bonṭon koṭo"".
Isusen U͑qu͑mǯi ġine sinagogxoy sunṭusṭa zomebsay.
Ṭeṭiya sa čuuxoy, muġec̣c̣e useney murdar urufen iz bać̣ana ḳoc̣ṗeney. Šoṭin iz bać̣ana sal düzbes bateneḳsay.
Isusen me čuġo aḳaṭan ḳalpi pine: "Ay čuux, hun vi azaraxun čarenḳi".
Isusen Iz kula lanexi šoṭay loxol, ëšoval haṭe saad düzbaki bureqi Buxaʒ́ugo alxəšbsa.
Ama sinagogi kalaṭin Isusi U͑qu͑mǯi ġine azar q̇olaybsuna äǯoġon biq̇i ǯamaata metäre pi: "Äšleynaḳ u͑q ġino, haṭe u͑q ġimxoy sunṭusṭal ekinan q̇olaybaksa, U͑qu͑mǯi ġine tää".
Isusen isä ǯoġabe tadi šoṭo: "Ay ṗä͑ ćolorox! U͑qu͑mǯi ġine vä͑n ef öküzä nääl ki elema šadbi xe tasṭa tenan tašṭa?
Avrahami xuyär me čuġo, manu ki muġec̣c̣e usene Šeytanen ġać̣ṗene, U͑qu͑mǯi ġine čarḳesṭun lazəm tene?"
Isusen me äyitmoġo uḳaṭan Izi äleyinä č̣eġalṭoġoynaḳ äyibe baki, bito amdarxoval mu͑qe͑ baki Iz biq̇i šaaṭ äšurxo.
Oša Isusen pine: "Heṭuva ošq̇ar Buxaʒ́uġoy Padčaġluġ? Šoṭo heṭu ošq̇ardaz?
Buxaʒ́uġoy Padčaġluġ sa amdari ganu biṭeci xardali ciläne ošq̇ar. Šo kalabaki xode baksa. Göye q̇ušurxon šoṭay taymoġosṭa mesṭun biq̇sa".
Isusen saal pine: "Heṭu ošq̇ardaz Buxaʒ́uġoy Padčaġluġa?
Šo ä͑yinäne ošq̇ar. Čuġon šoṭo exṭi xib gul xarina gärbi bito boq̇oy ayeġamin enefsa".
Isusen šähärmoġo, ayizmoġo č̣ovaki zombsun Yerusalimane taysay.
Sa amdaren Šoṭoxun xavare haq̇i: "Ay Q̣onʒ́ux, yäni mal amdar čarḳeġale?" Isusen ǯoġabe tadi šoṭoġo:
"Čaləšakanan q̇ač̣ ćomoxun bakinan. Vä͑x nexsu: geleṭin čaləšakale baġane me ćomoxun, ama bayes teṭunbakal.
Ḳožin q̇onʒ́uġon hayzeri ćomo buṭḳaṭan vä͑n č̣öšin täräf čurpi ṭaṗḳalnan ćomo, uḳalnan: "Aġa, qaypa yaynaḳ," ama šoṭin ǯoġab tadale: "Zu efi main eysuna tez ava!"
Ṭe vädä vä͑n metär uḳalnan: "Yan vaxun sagala käyi-u͑yanġe. Hun beš küčämoġosṭa zomembsay".
Ama Šoṭin vä͑x uḳale: "Ay haq̇suzluġ balorox bito, Zu efi main eysuna tez ava, ä͑xilbakanan Zaxun!"
Avrahama, Iaḳova, Isaaḳa saal bütüm xavartašalxo Buxaʒ́uġoy Padčaġluġa, vä͑x isä č̣öš boseci aḳaṭan ef arane o͑neṗsun, uluxxo ġərəč̣esṭun bakale.
Dünyäni biṗ ṭo͑ġo͑lxun Buxaćuġoy Padčaġluġa hari q̇onaxluġi sulfin bać̣ane arcalṭun.
Axərənǯiṭoġoy bäziyorox bakale samǯi, samǯiṭoġoy bäziyorox bakale axərənǯi".
Ṭe vädä Isusi ṭo͑ġo͑l bäzi fariseyxo iśalainšaki piṭun: "Č̣eki taki memiyin, šoṭaynaḳ ki, Iroden čuresa Va besṗane".
Isusen šoṭoġo pine: "Takinan ṭe tülkünä upanan: "Metäre, Zu ġe saal äyč̣ä ǯinurxo č̣evḳi amdarxo q̇olayboz, xibimǯi ġine Bez äšlä čarḳesṭoz".
P̣urumal ġe, äyič̣ä saal ošin ġi Bez yaq̇a davambiz buq̇on. Šoṭaynaḳ ki, xavartašal Yerusalimaxun ä͑xil nu besṗakalane!
Ay Yerusalim, Yerusalim! Xavartašalxo besṗala, ṭiya yaq̇abakiṭoġo źelainšala šähär! Ḳoḳoc̣en c̣iriḳxo iz q̇änädxoy oq̇a girbala ḳinäḳ Zuval sa hema käräm vi ġarmoġo girbsun čurezci, vä͑n isä čurtenanci!
Beġanan, ef ḳož amc̣ine mansṭa. Zu vä͑x moṭoz nex: "Q̣onʒ́uġoy c̣iyen Eġalṭu alxəšq̇an baki!"
