Sa U͑qu͑mǯi ġine Isus fariseyxo kalaṭoġoy sunṭay ḳoya śum uksane taci. Bitoṭin Ičune fikir tasṭay.
Ičuxun ćoba-ćo bädänä xe giresuni azar bakala sa amdarebuy.
Isusen fariseyxoxun saal ḳanuni määlimxoxun xavare haq̇i: "U͑qu͑mǯi gine amdarxo q̇olaybsun ḳanunen düzä yoxsa tää?"
Ama šoṭoġon qaqteṭunpi. Isusen ṭe amdara kul duġi šoṭo q̇olaybi yaq̇anebi.
Isusen šoṭoġo pine: "Ägär efi šinesa ġar, näälki öküz U͑qu͑mǯi ġine kärizä bafṭayin, šoṭo haṭe saad č̣evtenanḳo?"
Šoṭoġon Isusi me suala ǯoġab tades teṭun baki.
Isusen fikire tadi ki, ḳaleciṭoġon alin besṭa arsṭeynak gaṭun č̣äke. Šoṭin šoṭoġoynaḳ metär sa mäsäläne exläṭbi:
"Sa amdaren va laśḳoy ḳaleneisä, alin bel ma arca. Bärkä ḳožin q̇onʒ́uġoy vaxunal hörmätlü sa q̇onagebu.
Vä͑x ṗrannal laśḳoy ḳalpiṭin hari va "Me amdara ga tada" uḳain, hun xäǯäläti boš oq̇in bel arcala bakalnu.
Ama ḳaleġaṭan taci än oq̇in bel arca ki, va ḳalṗi amdaren hari va, "Dosṭ! Alin bel č̣ovaka" peq̇an; ṭe vädä vaxun sagala arciṭoġoy bitoṭay be͑ś hörmäten q̇azainšon.
Šoṭaynaḳ ki, här iču ala biq̇alo oq̇a bakale, här iču oq̇a biq̇alo ala baḳale".
Isusen Iču ḳalpiṭu pine: "Berezäre näälki biyäsin ukun tadaṭan vi dosṭurxo, vičimoġo, q̇oomxo, dövlätlü q̇onšiġo ma ḳalpa ki, šoṭoġonal va ḳalpi vi äväzä tadaṭun.
Ama q̇onaxluġ tadaṭan käsibxo, maifxo, aġsaġxo, ḳać̣iġo ḳalpa.
Ṭe vädä šoṭoġon va äväzä tades nubaksuna görä, hun bäxṭävär bakalnu. Šoṭaynaḳ ki, düzgün amdarxo be͑yin bakaṭan va äväz tadeġale".
Sulfin besṭa arciṭoġoy sunṭin moṭo ibaki Isusa pine: "Buxaʒ́uġoy Padčaġluġasṭa śum ukalo he bäxṭävärä!"
Ama Isusen šoṭo pine: "Sa amdaren kala q̇onaxluġe häzzürbi, ṭiyal gele q̇onaġe ḳalpi.
Šum ukala vaxṭ ṗaṗaṭan iz nökärä q̇onaġxoy ṭo͑ġo͑l yaq̇anebi ki, šoṭoġo peq̇an: "Bürüšan, isä här šey häzzüre".
Ama bitoṭin bürdän burṭunqi üzr čuresa. Sunṭin pine: "Zu sa oćalez haq̇e, lazəme taci be͑ġaz šoṭo. Xaišesbsa vaxun, za baġəšlainša".
Ṭi͑yäminṭin pine: "Zu qo čüt öküzez haq̇e, šoṭoġo šinäyinšbsaz taysa, za baġəšlainša".
Xibimǯiṭin pine: "Zu täzäz lašḳoy bake, koṭaynaḳal eyes tez bakon".
Nökär qaybaki bitova aġa exlätebi. Ṭe vädä ḳožin q̇onʒ́ux äǯuġläyinšäki nökärä pine: "Taki usumluġen šähäri küčämoġo saal dönboġo bakala käsibxo, maifxo, aġsaġxo, ḳać̣iġo miya eča".
Nökären isä pine: "Aġa, vi ämir bex ṗaneṗi, hälä avuzin gaal mandene".
Aġan iz nökärä pine: "Taki, bütüm yaq̇moġo, čäpärxo tarapa. Bez ḳož buy bakseynaḳ amdarxo eysuna čaləšaka.
Vä͑x moṭoz nex: süfṭin ḳaleciṭoġoy sayǯäṭin bez ukunaxun iz ṭada tene be͑ġal"".
Isusaxun sagala gele amdare taysay, Isusen Iz ćoya taradi šoṭoġo pine:
"Bez ṭo͑ġo͑l eġalṭin ägär iz bava-nana, čuux-äyloġo, viči-xunčimoġo, lap iz ömüräl Zaxun ala biq̇ain Bez šagird bakez bateneko.
Iz xača xorpi Bez qošṭan nu eġalo, Bez šaġird bakez tene bako.
Ef bošṭan šinesa qüllä biq̇sune čuresa isä, süfṭä arci xašlainšakala tänginä tene bo͑q̇ä͑lḳon ki, be͑yn ṗoyasa šoṭo čarḳesṭeynaḳ?
Šoṭaynaḳ ki, qüllin binorina laxi äšlä čarḳesṭes nu bakain, moṭo aḳala bitoṭin šoṭo laġa haq̇i uḳalṭun:
"Me amdaren tikintina burqi čarḳes tene baki".
Nääl ki, sa padčaġ ṭi͑yämi padčaġaxun davina taġaṭan iz loxol q̇a hazar äsḳären eġalṭay be͑ś vic̣ hazar äsḳären čurpes baki-nu baksuna süfṭinäxun arci fikir tenebo?
Ägär padčaġen moto baǯartenebalsa, ṭi͑yämi padčaġ hälä ä͑xil amaq̇un elčiġo yaq̇abi barišaksune čureġo.
Metärluġen, ef här sunṭin iz bütüm ämläkaxun kul nu haq̇ain, Bez šagird bakes tene bako.
El šaaṭ šeye, ama elen iz ṭada aćesṗain, šoṭo heṭina ṭad tades bako?
Šo nä oćalane yarainšo, nääl peyinä. Šoṭo čölöṭun bosṭa. Ibakseynaḳ u͑mu͑x bakalṭin ibakeq̇an!"
