Bito nalog girbalxo saal günaxkarxo Isusa u͑mu͑xlaxseynaḳ Iču iśalainšṭun baksay.
Fariseyxoq̇a ḳanun camḳalxon išä "me amdaren günaxkarxone q̇abulbsa, šoṭoġoxun śume uksa" uḳa ṭoṭoṭunney.
Ama Isusen šoṭoġoynaḳ me mäsäläninäne ečeri:
"Efi sunṭay sabać eġel bakain, šotoġoyal sunṭu aćesṗain, doxsan vuyara čöle tärbi, aći eġala bä͑ġä͑bamim šoṭo qävteneġon?
Bä͑ġä͑baṭan isä šoṭo mu͑q-mu͑q iz ä͑mna bele laxon.
Ḳoya eġaṭan iz dosṭurxo saal q̇onšiġo ḳalpi metäre uḳo: "Zaxun sagala mu͑q bakanan, aćesṗi eġelaz bä͑ġä͑be!"
Vä͑x moṭo uḳaz ki, hametäräl göynul tooba bala sayǯä günaxkara görä toobina ehtiyäǯ nu bakala doxsan vuy du͑zgün amdareynaḳ bakalṭuxun lap gele mu͑qluġ bakale.
Nääl ki, vic̣ dänä gu͑mu͑š tängä bakala mani sa čuġon sunṭu aćespain, šam bäč̣üḳṭi, ḳoža śampi šoṭo bä͑ġä͑bamin yönbäri qävteneġon?
Bä͑ġä͑baṭan iz yoldašxoq̇a q̇onšiġo ḳalpi uneḳon: "Zaxun sagala mu͑q bakanan, axər zu aćesṗi tänginäz bä͑ġä͑bi!"
Vä͑x moṭo uḳaz ki, Buxaʒ́uġoy angelxoy be͑śal tooba bala sa günaxkara görä mu͑qluġ baneksa".
Isusen moṭoval exlätebi: "Sa amdari ṗä͑ ġarebuy.
Ġarmoġoy mic̣iḳṭin iz bava pine: "Ay bava, vi var-dövlätäxun bez paya kofṭalṭu za tada". Bavanal iz var-dövlätä šoṭoġoy arane ǯöyebi.
Sa hema ġi oša mic̣iḳ ġaren iz bakalṭu girbi ä͑xil sa oćalane yaq̇a bafṭi. Ṭeṭiya pozġun yäšäinš č̣ovakesṭω iz var-dövlätä čarḳesedi.
Ġaren här šeya xašlainšiṭuxun oša, ṭe ölkinä kala sa busaluġe baki. Šoṭin čätinluġ aksane burqi.
Moṭaynaḳal ġaren taci ṭe ölkin amdarxoy sunṭay ṭo͑ġo͑l äše bä͑ġä͑bi. Me amdaren šoṭo iz oćalxo bo͑q̇ be͑ġsane yaq̇abi.
Bo͑q̇urxon ukala xode qo͑len tapana boševḳsuna mu͑qe bakoy. Ama šuḳḳalen iču sa šey tene tasṭay.
Ṭe vädä ġar ičul hari pine: "Bez bavay heq̇ädär šärten äyiteci äšṗalabu, bitoṭayal boššamin ukala śum bune. Zu isä memiya busaluġaxun bisaz!
Hayzeri bavay ṭo͑ġo͑l taci šoṭo uḳoz: "Ay bava, zu göye saal vi be͑ś günaxezbe.
Zu ene vi ġar ḳalesuna layiġ tezu. Za vi šärten äyiteci äšṗal ḳinäḳ q̇abulba".
Šo hayzeri iz bavay ṭo͑ġo͑le taci. Ġar hälä ä͑xil amaq̇un iz bavan iču aneḳi. Šoṭo goroxe hari, ṭiṭeri šoṭo q̇užbi mučepi.
Ġaren pine: "Ay bava, zu göye saal vi be͑ś günaxezbe. Zu ene vi ġar ḳalesuna layiġ tez."
Bavan iz nökärxo pine: "Usum bakanan, än gözäl xälät ečanan, iču lapesṭanan. Iz käšine boġoćal, iz turel toroḳal lapesṭanan.
Kökbi mozina ečanan, śampanan: ekinan uken- mu͑qluġben!
Šoṭaynaḳ ki, me ġar ṗureney, be͑yine baki, ko aćeney, bä͑ġä͑neci". Hametär mu͑qluġbsaṭun burqi.
Bavay kala ġar isä čölöney. Qaybakaṭan ḳoya ṗaṗi fare, äčin säsurxone ibaki.
Šoṭin nökärxoy sunṭu iz ṭo͑ġo͑l ḳalpi xavare haq̇i: "Mo hikä?"
Nökären iču pine: "Vi vičine qaybake. Bavanal šoṭay salamat qaybaksuna görä kökbi mozinane śampe".
Kala ġar isä äǯuġlayinšebaki, bona baysunal tene čureci. Bavan čöš č̣eri šoṭo xoinśe͑bi.
Ama šoṭin bava metäre ǯoġab tadi: "Be͑ġa hema usene ki, vaynaḳ nökär ḳinäḳ äšezbsa. Sal sa vaxt vi buyruġaxun tez č̣ere. Ama zaynaḳ sa kečin balal ten q̇imiši ki, bez dosṭurxoxun mu͑qluġbaz.
Me ġaren isä vi bito var-dövlätä taraḳala čupuxxoynaḳ xašlainši čarḳesedi. Ama šo qaybakaṭan hun ičeynaḳ kökbaki mozinan śampi".
Bavan iču pine: "Ay bez ġar, axi͑r hun hämišä zaxunnu, bez bito bakaloval vine.
Ama mu͑qbaksun, mu͑qluġ č̣ovakesṭune lazəm. Šoṭaynaḳ ki, vi me viči ṗureney, yäšäinšane qaybaki. Šo aćeney, bä͑ġä͑neci!"".
