Isusen Iz šagirdxo me exlätxone bi: "Dövlätlü sa amdari iz äšurxo kalalugbala sa amdarebuy. Šoṭo xavarṭun tasṭa ki, äšurxo kalalugbalṭin iz var-dövlätä carene.
Dövlätlü amdaren šoṭo iz ṭo͑ġo͑l ḳalpi nexe: "Mo hikä, vi baradan zu ḳäyurxoz ibaksa? Za kalaluġbsuni hesaba tada. Hun ene kalo bakez ten bako".
Äšurxoy kalaṭin ičin ičeynaḳ pine: "Isä zu ḳä booz? Aġan kalaluġbsuna bez kiyexun exesṭa. Oćal kaśṗes tez baksa, diläyinšbsunaxun oṭezbsa.
Za äšluxun č̣evḳiṭuxun oša za ičoġoy ḳožurxo barsṭeynaḳ ḳä bsuna avazu".
Šoṭaynaḳal iz aġa boršlu bakalṭoġo soġo-soġo ḳalpi samǯiṭu pine: "Bez aġa heq̇ädären boršlu?"
Šoṭin pine "sabać bata zeytuni č̣äyin". Äšurxo kalaluġ balṭin šoṭo pine: "Vi q̇äbizä exṭa, arca usum campa: älli". *
Oša ṭi͑yäminṭune pi: "P̣oy vi heq̇ädär borǯvaxbu?" Šoṭin ǯoġabe tadi: "sabać korb arum". Äšurxo kalaluġbalṭin šoṭo pine: "Vi q̇äbizä exṭa campa: säksän". *
Aġan haqsuzluġ bala äšurxo kalalugbalṭu iz yön bä͑ġä͑bsuna go͑rä tärifläyinšebi. Šoṭaynaḳ ki, me dööri ġarmux ičoġoy näsiläxun bakala äšurxosṭa išiġlu dünyäni ġarmoġoxun samalal gele yön bä͑ġä͑balṭun.
Zu vä͑x metärez nex: "Haqsuz q̇azanǯen bakala dövläten vä͑ynaḳ dosṭ q̇azainšanan ki, me dövlät čarḳaṭan hämišäluġ dünyäne q̇abulbakanan".
Miciḳ sa äšläsṭa exṭibärlu bakalo, kala äšläsṭal exṭibärlune. Ama lap miciḳ sa äšläsṭa haqsuz bakalo, kala äšläsṭal haqsuze.
Metärluġen, ägär vä͑n haqsuz var-dövlätäxun isṭifadabsuna exṭibärlu tenansa, äsil var-dövlätä vä͑x šina exṭibärbo?
Ägär q̇erṭay malaxun isṭifadabsuna exṭibärsuznu isä, ef mala vä͑x šina tadon?
Sal sa nökär ṗä͑ q̇onʒ́uġo q̇ulluġbes bateneko. Soṭaynaḳ ki, nä sunṭu nifrätbi ṭi͑yämiṭu čureġale, nääl ki sunṭu ġać mandi ṭi͑yä͑minṭu xor be͑ġale. Vä͑n ham Buxaʒ́uġo hamal var-dövlätä q̇ulluġbes batenanko".
Fariseyxo tängäpäräsṭ baksuna görä bütüm me äyitmoġo ibaki Isusa laġaṭun haq̇i
Isusenal šoṭoġo metäre pi: "Vä͑n amdarxoy be͑ś vä͑x düz amdarnan aḳesṭa, ama Buxaʒ́uġon ef üḳä avane. Šoṭaynaḳ ki, insanxoy arane kala hesabbakala sa šey Buxaʒ́uġoy ṭo͑ġo͑l iriṭṗune.
Ḳanun saal Xavartašalxo Ioan eġaminey. Ṭe vaxṭaxun maġay Buxaʒ́uġoy Padčaġluġi Mu͑q Xavare yäymišaksa, här tanal zoren ṭiya baysunane čaləšaḳsa.
Ama göye saal oćali äfčibaksun Ḳanunaxun sa nöḳṭin bisṭunaxun hasande.
Iz čuġo č̣evḳi q̇eräz čuġoxun laśḳoybakala här išq̇ar pozġune. Išq̇araxun č̣eri čuġoxun laśḳoybakaloval pozġune.
Dövlätlu sa amdarebuy, šoṭin tünd ć̣oć̣a saal ǯügü parčinaxun paltare laḳoy, hamal här ġi q̇äšäng köfeboy.
Bädän dirisṭ yara bakala Lazar c̣ila sa käsibäl buney. Šo dövlätlu amdari ćomoy be͑ś basḳeney.
Lazar dövlätlü amdari sulfinaxun barala q̇ərəxxon tapana boševḳsuni arzunaney. Xä͑yoġonal hari iz yaroġone lamey.
Sa ġi käsib ṗure, angelxonal šoṭo Avrahami q̇uželṭun tašeri. Dövlätlü amdaral ṗure, oćalaxeci.
Dövlätlü amdaren ṗuriġoy ölkinä koruġ aḳaṭan, pulmoġo alabi ä͑xil Avrahama, iz q̇uželal Lazarane aḳi.
Šoṭin alloy säsen pine: "Ay Avraham bava, za gorox eki. Lazara yaq̇aba bez ḳäšin bula xena badi bez muza särinläinšeq̇an, šoṭaynaḳ ki, zu me aruġoy boš gele koruġez aḳsa".
Ama Avrahamen pine: "Bala, vi eyex bada ki, hun vi häyätasṭa šaaṭ šeymoġo, Lazaren isä pis šeymoġone haq̇e. Isääl šoṭin äväzäne č̣eysa, ama hun koruġen aḳsa.
Üstäliḳ, efq̇a beš arane kala sa učurume laxece ki, nä memiin ef täräf č̣ovaksun čureġalo č̣ovakesa baksa, nääl ki ke täräfäxun beš täräfṭun eyes baksa".
Dövlätlü amdaren pine: "Ay bava, ketäre isä xoinśezbsa va, Lazara bez bavay ḳoya yaq̇aba.
Šoṭaynaḳ ki, qo vičizaxbu. Barta šoṭoġo xavar tadeq̇an ki, šoroxal me koruġ aḳala gala maq̇aṭun hari.
Avrahamen šoṭo pine: "Šoṭoġosṭa Moiseyi saal Xavartašalxoy äyito, barta šoṭoġoq̇aṭun u͑mu͑xlaxi".
Dövlätlü amdaren isä pine: "Tää, Avraham bava, ägär ṗuriṭoġoy soġo šoṭay ṭo͑ġo͑l taġain, šoṭoġon toobaṭunbo".
Ṭe vädä Avrahamen šoṭo pine: "Ägär šoṭoġon Moiseya saal Xavartašalxo u͑mu͑xlateṭunxsa isä, ṗuriṭoġoy soġo be͑yin bakainal, ve͑bakalateṭun"".
