Isusen Iz šagirdxo hämišä afi͑ri͑ṗsun saal urufaxun nu bisṭun lazəm baksuni barada sa mäsäläne ečeri.
Šoṭin pine: "Sa šähäre Buxaćugoxun nu q̇i͑bala saal amdarxo hörmät nu bala sa divan baloy.
Haṭe šähäre sa süpür čuuxal buney. Čuux šoṭay ṭo͑ġo͑l hari pine: "Bez rägibaxun bakala äšläsṭa bez haqq̇a efa".
Ama divan balen sa heq̇ädär vaxṭ moṭo ämälbsun čurteneci, oša isä ičin ičeynaḳ pine: "Zu ki nä Buxaćuġoxunez q̇i͑bsa, nä amdarxoz hörmätbsa,
me čuġon bez zählinä ciṗsuna görä koṭo haq tadoz ki, hari saal bez u͑mo͑ġo maq̇an tašeri"".
Q̣onʒ́uġon Iz äyitä metäre davambi: "Haqsuz divan bali ḳä upsuna ibakanan.
Yäni Buxaʒ́uġon Iz č̣äḳṗiṭoġo, üše- ġena Ičuxun kömäy čureġalṭoġoy haqq̇a tene efal? Šoṭoġo gele yaq̇ be͑ġesṭale ki?
Vä͑x moṭoz nex ki, šoṭoġo usumluġen haq tadale. P̣oy Insani Ġar eġaṭan oćalin ćoyel Buxaʒ́uġo ve͑luġ bä͑ġä͑bale?"
Ičoġoy düz amdarluġa güväinšäki ṭi͑yämiṭoġo oq̇a sakala bäziṭoġoynaḳal Isusen metär sa mäsäläne ečeri:
"Soġo farisey, ṭi͑yämino isä nalog girbalo bakala ṗä͑ tan afərəbseynaḳ Buxaʒ́uġoy ḳoyaṭun baci.
Farisey turel čurpi ičin ičeynaḳ metäre afərəney: "Ay Buxaʒ́ux, Va šükürezbsa ki, zu ṭiyämiṭogollariḳ amdar fu͑q̇kal, haq̇sus, q̇erṭay čuġoy loxol be͑ġal, nääl me nalog girbalṭullariḳ tezu.
Šamaṭe ṗä͑ käräm ġuruġes efsa, bütüm q̇azanǯi vic̣ paye sunṭu tasṭa"
Nalog girbal isä ä͑xil čurpi, iz pulmoġoval göynul alabsuna qi͑nebsay, ama iz döšä duxsun nexey: "Ay Buxaʒ́ux! Za günaxkara, gorox eki!"
Vä͑x nexsu ki, ṭe farisey tää, nalog girbale iz ḳoya haq q̇azainši tace. Šoṭaynaḳ ki, ičin iču ala hesab balo oq̇a bakale, iču oq̇a efalo ala bakale.
Amdarxon Isusi ṭo͑ġo͑l körpä äyloġoval etunšṭay ki, Šoṭin kul duġane šoṭoġo. Koṭo aḳala šagirdxon isä iśa teṭun barti šoṭoġo.
Ama Isusen äyloġo ḳalpi Iz ṭo͑ġo͑l pine: "Äyloġo tärbanan, bartanan Bez ṭo͑ġo͑lq̇aṭun hari. Šoṭoġo mane ma bakanan! Šoṭaynaḳ ki, Buxaćuġoy Padčaġluġ metärṭoġoynaḳe.
Väx düzünäz nex: Buxaćuġoy Padčaġluġa sa äyel ḳinä q̇abul nu balṭin ṭiya sal bayes tene bakon".
Kalaluġbalṭoġoy sunṭin Isusaxun xavare haq̇i: "Ay šaaṭ Määlim, zu ḳä baz ki, hämišäluġ ömürä näsilluġen haq̇az?"
Isusen šoṭo pine: "Za heṭaynaḳ šaaṭ nexnu? Täk Buxaʒ́uġoxun bašq̇al šaaṭo teno.
Šoṭay ämirxo avanu: "Pozġunluġ maba, ma besṗa, ma bašq̇a, äfčidän šuḳḳali ćoyel ma čurpa, nana-bavan hörmät ba"".
Šoṭin isä pine: "Moṭoġo bitova ǯäyilluġaxun maġay ämälezbsa".
Isusen moṭo ibaki šoṭo pine: "Vi sa šey kame: hikḳä buvax toyda, käsibxo payba. Ṭe vädä vi var-dövlät göynul bakale. Oša qaybaka, Bez bać̣anexun eki".
Šoṭin isä me äyitmoġo ibaki pärte baki, šoṭaynaḳ ki, gele dövlätlüney.
Isusen šoṭay pärt baksuna aḳi pine: "Var-dövlät bakalṭoġoynaḳ Buxaʒ́uġoy Padčaġluġa baysun heq̇ädär čätinä!
Serine ki, buše be͑ke͑ dešiyexun č̣ovaḳsun dövlätlü amdari Buxaʒ́uġoy Padčaġluġa baysunaxun hasande".
Moṭoġo ibakalṭoġon piṭun: "Ketäre isä, šuva čarḳeces bakon"?
Šoṭin isä pine: "Insanxoynaḳ mümkün nu bakala äšurxo Buxaʒ́uġoynaḳ mümküne".
P̣yoṭren isä pine: "Be͑ġa, yan här šeya bosi vi bać̣anexunyan hare".
Isusen šoṭoġo pine: "Vä͑x düzinäz nex: Buxaʒ́uġoy Padčaġluġeynaḳ nä iz ḳoža, nä iz čuġo, nä iz vičimoġo, nä iz bava-nana, näl ki iz äyloġoval bosi ṭetär sa amdar tene bake ki,
häysäṭin vaxṭesṭa hema q̇at gele, eġala vaxṭesṭa isä hämišäluġ ömür nu haq̇ane".
Isusen Iz P̣acce šagirdxo ṭo͑o͑x zapi šoṭoġo pine: "Mone, yan Yerusalimayan laysa, Insani Ġareynaḳ xavartašalxoy kömäyen cameciyorox bito iz gala ṗaṗale.
Šoṭaynak ki, Šo q̇eräz millätxoy kiyex tadeġale, šoṭoġonal Iču kiye haq̇i tähkir balṭun, Šoṭay ćoyel ćuḳalṭun.
Šoṭo tatarlainši besṗalṭun, Šo xibimǯi ġine be͑yin bakale".
Ama šagirdxon me äyitmoġoxun hiḳḳal q̇amiš teṭunbaki. Me äyitmox šoṭoġoynaḳ č̣äṗḳin manedi, šoṭoġonal piṭoġo teṭun q̇amišaki.
Isus Yerixoya iśalainšakaṭan sa ḳać̣i amdar yaq̇e ṭo͑ġo͑l arci diläinšebsay.
Iz ṭo͑ġo͑lxun gele amdar č̣ovaksuna ibaki xavare haq̇i: "Ḳää bake?"
Šoṭo xavarṭun tadi: "Nazareṭlu Isuse memiin č̣ovaksa".
Ṭe vädä šoṭin harayepi: "Ay Davidi Ġar Isus, za gorox eki!"
Be͑ś taġalṭoġon šoṭo q̇adaġanbi šip čurpesṭunṭun čuresay, ama šoṭin samalal osṭaare haraypi: "Ay Davidi ġar! Za gorox eki!"
Isusen čurpi ämirebi ki, šoṭo Iz ṭo͑ġo͑lq̇aṭun eč̣eri. Amdar iśalainšakaṭan Isusen šoṭoxun xavare haq̇i:
"Hun zaxun ḳän čuresa"? Šoṭin pine: "Ay Q̣onʒ́ux, bez pulmux qayeceq̇an".
Isusen šoṭo pine: "Barta vi pulmux qayeceq̇an, vi ve͑baksunen va čarḳesedi".
Haṭe vaxṭ me amdari pulmux qayeci, šoṭinal Buxaʒ́uġo alxəšbsun Isusi bać̣anexune taci. Moṭo aḳala bito amdarxonal Buxaʒ́uġo alxəšṭunbi.
