Isus Yerixoya baci ṭeṭiyn č̣ovaneksay.
Ṭeṭiya nalog girbalxoy kaloo Zakay c̣ila dövlätlü sa išq̇aroy.
Isusi šu baksuna aḳseynaḳ iču besebsay. Ama boyaxun oq̇oloy baksunaxun amdarxoy aranexun šoṭo aḳes bateneksay.
Isusa akseynaḳ be͑ś ṭiṭeri sa inǯilna xodane laci. Šoṭaynaḳ ki, Isus ṭeṭiin č̣ovakalaney.
Isus ṭiya ṗaṗaṭan ala be͑ġi šoṭo aḳi pine: "Ay Zakay, usum oq̇a ciki. Ġe Zu vi ḳoya mandalazu".
Šo usum oq̇a ciri Isusa mu͑qluġen q̇abulebi.
Bito amdarxon moṭo aḳi ṭoṭoṗsun piṭun: "Taci günaxkar sa amdarane q̇onaġ baki".
Zakay isä turel hayzeri Q̣onʒ́uġo metäre pi: "Ay Q̣onʒ́ux, bez var-dövläti qi͑ṭu käsibxoz paybon, šuxunal haqsuz sa šey exṭezsa, bip q̇at qaydoz".
Isusen šoṭo pine: "Ġe me ḳoya čarḳesune hare, šoṭaynaḳ ki, me amdaral Avrahami ġare.
Šoṭaynaḳ ki, Insani Ġar aćiṭoġo qä͑veci čarḳesṭeynaḳe hare".
Šoṭoġon me exlätxo ibakala vaxṭesṭa Isusen sa mäsäläl enečeri, čunki Šo Yerusalima iśalainšakeney, šotoġonal ṭetärṭun fikirbsay ki, Buxaʒ́uġoy Padčaġluġ haṭe saad ćoyel č̣eġale.
Isusen metäre pi: "Čalxeġala amdarxoy sunṭin padčaġluġ haq̇i qoš qaybakseynaḳ ä͑xil sa ölkinä yaq̇ane bafṭi.
Taġalṭuxun be͑ś nökärxoxun vic̣ tan ḳalpi, här sunṭu vic̣ minac tängä tadi pine: "Zu eġamin moṭoġon alver banan". *
Ama ölkin amdarxon šoṭo nifrätṭunbi, iz qošṭan elčiġo yaqabi piṭun: "Yan čurteyansa ki, me amdar beš padčaġ bakane".
Me amdar padčaġluġ haq̇i qaybakaṭan tängä tadeci hate nökärxo iz ṭo͑ġo͑l ḳalpesṭi šoṭoġoy q̇azainšiṭoġo avabaksune čureci.
Samǯiṭin hari pine: "Aġa, vi sa minan vic̣ minane avuzbe".
Aġan šoṭo pine: "Dirbašnu, bez šaaṭ nökär. Än mic̣ik sa äšläsṭa exṭibärlu č̣eysuna görä vic̣ šähärin kalaluġa vi ozane exṭa".
P̣ä͑mǯiṭin hari pine: "Aġa! Vi sa minan qo mina avuzebe."
Aġan šoṭoval "hunal qo šähärin kaloo baka" pine.
Ṭi͑yämi sunṭin hari pine: "Aġa! Mo vi vic̣ mina, koṭo däsmälä bäč̣ürpiz efe.
Šoṭaynaḳ ki, vaxun q̇i͑zbsay, hun gorox nu eġala amdarnu, nu laxiṭun exsṭa saal nu biṭiṭun exbsa".
Aġan šoṭo pine: "Ay pis nökär, va vi źomoxun č̣eġala äyitmoġon biq̇oz. Hun avanuy ki, zu gorox nu eġala amdarzu, bez nu laxiṭu exesṭa, bez nu biṭiṭu exesbsa.
P̣oy ṭe vädä heṭaynaḳ bez tänginä fərəbsa ten barte ki, zu eġaṭan šoṭo avuzen qoš exṭaz?"
Oša ṭo͑o͑x bakalṭoġo pine: "Tänginä iz kiyexun exṭanan, vic̣ mina bakalṭu tadanan!"
Šoṭo piṭun: "Ay aġa, axər šoṭay vic̣ mina bune!"
Mone ki, vä͑x nexsu: "Šusṭa bune, šoṭo samalal gele tadeġale, šusṭa tenosa, iz kiye bakaloval iz kiyexun haq̇eġale.
Bezi ičoġoy loxol padčaġ baksuna nu čureġala bez düšmänxo isä miya ečanan, bez piin be͑ś q̇əli͑nǯlainšanan!""
Isusen me äyitmoġo pi, be͑ś taysun Yerusalima täräfe e͑qe͑ci.
Zeytuni burux cila buruġoy döšel bakala Beṭ-Fagenq̇a Beṭ-Anyaya iśalainšakaṭan, Iz šagirdxoxun ṗä͑ tana yaq̇anebi be͑ś.
Šoṭin pine: "Ef be͑ś bakala ayize takinan. Ṭiya baġaṭan memačaġ šuḳḳal nu laci ġać sa elemi bala bä͑ġä͑balnan. Šoṭo šadbi miya ečanan.
Šiin vä͑xun xavar haq̇ain: "Heṭaynaḳ me elemi balina šadnambsa?" šoṭo metärnan uḳon: "Me elemi bala Q̣onʒ́uġone lazəm"".
Yaq̇abakiṭoġon taci bitova Šoṭin pi ḳinäḳ bä͑ġä͑ṭunbi.
Šoṭoġon elemi balina šadbaṭan šoṭay q̇onʒ́uġon moṭoġo pine: "Me elemi balina heṭaynaḳnan šadbsa?"
Šoṭoġon ǯoġabṭun tadi: "Me elemi bala Q̣onʒ́uġone lazəm".
Elemi balina Isusi ṭo͑ġo͑l eč̣eri ičoġoy paltara šoṭay loxol pasṭi Isusa arcevṭunḳi.
Šo be͑ś taysunen amdarxon ičoġoy paltara yaq̇a pasṭunsṭay.
Isus Zeytun buruġoy oq̇a ciġala yamaǯa iśalainšakaṭan gele šagirdxon aḳi bito möǯüzoġo görä mu͑q baki, alloy säsen Buxaʒ́uġo alxəšbsaṭun burqi.
Šoṭoġon nexṭuniy: "Q̣onćuġoy c̣iyen eġala Padčaġa alxəšq̇an baki! Göynul šiṗluġ, än alloyluġxo tärifq̇an baki!"
Amdarxoy aranexun bäzi fariseyxon Šoṭo piṭun: "Määlim, Vi šagirdxoy säsä boṭa!"
Ama Isusen ǯoġab tadi šoṭoġo pine: "Vä͑x moṭo uḳaz ki, ägär korox šiṗ čurḳayṭun, źeyurxo muzalṭun bako!"
ωsus Yerusalima iśalainšakaṭan šoṭo be͑ġi o͑no͑nepi šähäreynaḳ.
Šoṭin pine: "Äh, ḳä bakiyniy ġe hunal šiṗluġa tašala yaq̇a avabakinuy! Ama me yaq̇ häläki vi piyexun č̣aṗe.
Šoṭaynaḳ ki, va ṭetär ġimxone yaq̇ be͑ġsa ki, vi düšmänxon va q̇andaġxon ǯöybalṭun, bip ṭo͑ġä biq̇alṭun, här täräfäxun səxəšṭərišalṭun.
Vaal, vi q̇užel bakala äyloġoval äfčibalṭun. J̌ena źene loxol teṭun barḳal, šoṭaynaḳ ki, Buxaʒ́uġoy va iśalainšakala vaxṭa ten avabaki".
Isus Buxaʒ́uġoy ḳoya baci ṭeṭiya alverbaltoġo šäṗesane burqi.
Šoṭoġo metäre pi: "Bez ḳož afiriḳala ḳož bakale" pine camece. Ama vä͑n šoṭo fu͑q̇ḳalṭoġoy mesanan č̣urevḳe!"
Isusen här ġi Buxaʒ́uġoy ḳoya zomebsay. Kala be͑inśxon, ḳanun camḳalxon saal hampoġon Šoṭo besbseynaḳ yaq̇ṭun qä͑vesay,
ama moṭo hetär balṭun avateṭuniy. Šoṭaynaḳ ki, bito amdarxon Šoṭo kala diggäten u͑mu͑xṭunlaxsay.
