Ṭe ġimxosṭa imṗeraṭor Avgusṭen bütüm Rime oćalxoynaḳ amdarxoy c̣iya camsuni barada buyruġe tadi.
Me samǯi c̣i camsun Ḳirini Siriin kaloo bakaṭane č̣ovakey.
Bito c̣i campesṭeynaḳ iz šähäräne yaq̇a bafṭi.
Iosifal Davidi äsil-näsiläxun baksuna görä Galileyin Nazareṭ šähärexun č̣eri Iudeyina, Davidi šähär bakala Beṭ-Lexemane taci.
Šo ṭeṭiya äylin loxol bakala iz niśanlu Mariyaxun sagala c̣i camṗesṭeynaḳe taci.
Šorox ṭiya bakala vädine Mariyay äyel bakala vaxṭ ṗaneṗi.
Šoṭin iz samǯi Ġarane ečeri. Körpinä q̇ondaġbi nä͑vä͑ lanexi, šoṭaynaḳ ki, q̇onaġi ḳoya šoṭoġoynaḳ ga tene bä͑ġä͑yeci.
Ṭe oćala sürün ṭo͑ġo͑l üše navad zaṗḳala eġel be͑ġalxonoy. Šoṭoġon čölöṭun käybsay.
Bürdän Q̣onʒ́uġoy sa angel šoṭoġoy be͑ś č̣ere, Q̣onʒ́uġoy tamtaraġen šoṭoġoy ćoyel išiġe saki. Eġel beġalxo kala q̇i͑yene haq̇i.
Angelen šoṭoġo pine: "Ma q̇i͑banan! Zu vä͑ynaḳ bütüm amdarxo mu͑q̇ṭala sa Xavarez ečere.
Ġe Davidi šähäre vä͑ynaḳ Čarḳesṭale nanaxun baki. Mo Q̣onʒ́ux Xrisṭose.
Vä͑ynaḳ niśan mo bakale: nä͑ve boš basḳi q̇ondaġbaki Körpä bä͑ġä͑balnan".
Bürdän angeli ṭo͑ġo͑l Buxaʒ́uġo alxəšbala göye kala q̇ošune aḳeci. Šoṭoġon metärṭunney:
"Än alloyluġxo Buxaʒ́uġo alxəš, Oćalin ćoyel Šoṭay iräzi bakala amdarxoynaḳ šiṗluġq̇an baki!"
Angelxon eġel be͑ġalxoxun ǯöybaki göynul e͑qeciṭuxun oša šoṭoġon sun-suna piṭun: "Ekinan Beṭ-Lexema taġen, Q̣onʒ́uġon yax avabakesṭi me baki äšlä aḳen".
Šorox kap taṭunci. Mariya, Iosifa saal nä͑ve boš basḳi Körpä bä͑ġä͑ṭunbi.
Eġel be͑ġalxon Körpinä aḳaṭan Šoṭay barada ičoġo piṭoġo avabakesṭundi.
Moṭo ibakala bitoṭin eġel be͑ġalxoy äyitmoġo määṭṭäl manṭundi.
Mariyan isä bütüm me äšurxo bä͑ġä͑loy fikirbsun iz üḳe boš enefsay.
Eġel be͑ġalxon bütüm ičoġoy aḳi saal ibakiṭoġo görä Buxaʒ́uġo alxəšbi tärifläyinšbsun qošṭun qaybaki. Šoṭaynaḳ ki, här šey ičoġo exläṭbi ḳinäḳe bakey.
Muġumǯi ġine Körpinä sünnät bala vaxṭ eġaṭan Iz c̣iya Isusṭun laxi. Me c̣i Šoṭo hälä nanay tapane bafṭalṭuxun be͑ś angeli täräfäxun tadeceney.
Moiseyi Ḳanuna görä tämiz bakala vaxṭ čarḳiṭuxun oša Iosifq̇a Mariya Körpina Q̣onʒ́uġoy be͑ś č̣evḳseynaḳ Yerusalimaṭun ečeri,
hetär ki Q̣onʒ́uġoy Ḳanuna camecene: "Nanaxun samǯi bakala bütüm ġarmux Q̣onʒ́uġoynaḳ i͑velq̇an hesab baki".
Hamal šoṭoġon q̇urbanṭun ečeri, hetär ki Q̣onʒ́uġoy Ḳanunen ämir bakene: "P̣ä͑ giyär, nääl ṗä goyärčini bala".
Ṭe vädä Yerusalima Simeon c̣ila sa amdarebuy. Šo düzgün saal Buxaʒ́uġo ve͑ amdarey. Israila üḳ tadesunane yaq̇be͑ġsay, ω͑vel Urufal iz loxoley.
ω͑vel Urufen iču saturbe͑ś avabakesṭeney ki, Q̣onʒ́uġoy Xrisṭosa aḳinuṭ biyalatene.
Metärluġen, Simeon Uruflainšaki Buxaʒ́uġoy ḳoyane baci. Körpäy bava-nanan Ḳanuna laxeci ädätä ämälbseynaḳ Körpä Isusa Buxaʒ́uġoy ḳoya ečaṭan
Simeonen Körpinä iz q̇užel exṭi Buxaʒ́uġo alxəšbsun metäre pi:
"Ay bitoṭay Q̣onʒ́ux, isä Vi äyitä görä Zu --Vi nökär, arxayin biyes baskon.
Šoṭaynaḳ ki, bütüm azuḳxoy piin be͑ś Vi häzzürbi čarḳesuna, Millätxoynaḳ häzzürbi išiġa, Vi azuḳ Israileynaḳal tamtaraġa Bez piinez aḳi".
Körpäy bava-nana Šoṭay barada uḳala äyiṭmoġo görä määṭṭälṭun baki.
Simeonen šoṭoġo xeyir-bäräkät tadi Körpäy nana Mariya metäre pi: "Me Körpä Israila gele amdari bisṭuniq̇a e͑qesuni säbäbkär saal amdarxon nu q̇abulbi sa niśan bakseynaḳe täyin bake.
Vi üḳe isä q̇ələnǯ ḳinäḳ baġale. Morox bito geleṭay fikirxo qavuna č̣evḳseynaḳ bakale".
Ṭeṭiya Ašer tayfinaxun bakala P̣enueli xuyär Xanna c̣ila čuux xavartašalal buney. Šo gele yäšluney. Ǯäyil yäšṭä išq̇ara taci, išq̇araxun vu͑ġ usen yäšäyinši süpür mandeney.
Mo säksän biṗ yäšṭä süpür čuuxey. Šo Buxaʒ́uġoy ḳoyaxun č̣etenesay, ġurux efi afərəṗsun üše-ġena Q̣onʒ́uġo q̇ulluġebsay.
Xanna me vädine iśalayinšaki Buxaʒ́uġo šükürbsun Yerusalimi čarḳesuna yaq̇ be͑ġala bütüm amdarxoynaḳ Körpä Isusi barada exläṭbsane burqi.
Iosifq̇a Mariya Q̣onʒ́uġoy Ḳanuna bakala bitova bex ṗaṗesṗi čarḳiṭuxun oša Galiyeyina-ičoġoy šähär bakala Nazareṭaṭun qaybaki.
Äyel kalane baksay, zorbane baksay, haq̇əl avuze baksay. Buxaʒ́uġoy üḳ boḳosbsun Iz loxoley.
Här usen Isusi bava-nana P̣asxin axsibayasṭa Yerusalimaṭun taysay.
Isusen ṗac̣c̣e yäš tamam bakaṭan šorox axsibayi ädäten ṗurum ṭiyaṭun taci.
Axsibay čarḳiṭuxun oša šorox ḳoyaṭun yaq̇abafṭi. Ama täzä ṗaṗi ġar Isus Yerusalima manedi, Šoṭay bava-nanay isä moṭoxun xavar buteney.
Šoṭoġon Isusi yaq̇ taġalxoy däsṭinä baksunaṭun fikirbsay. Ama sa ġiluġ yaq̇ taciṭuxun oša Šoṭo dosṭurxoy saal q̇oomxoy arane qä͑vesaṭun burqi.
Šoṭo bä͑ġä͑teṭunbi, qä͑vesun-qä͑vesun Yerusalimaṭun qaybaki.
Xib ġinaxun oša Šoṭo Buxaʒ́uġoy ḳoyaxunṭun bä͑ġä͑bi. Isus määlimxoy ṭo͑ġo͑l arceney, šoṭoġo u͑mu͑xelaxsay, xavare haq̇say.
Šoṭo u͑mu͑xlaxala här tanen Šoṭay haq̇əla saal tadala ǯoġabxo mat manṭunsṭay.
Bava-nanan Šoṭo aḳi määṭṭäl manṭundi. Isusi nanan Šoṭo pine: "Ay bez Ġar, mo hiḳä beš bel enčeri? Vi bavaq̇a zu nigärän mandi vayan qä͑vesay".
Isusen šoṭoġo ǯoġabe tadi: "Za heṭaynaḳnan qä͑vesay? Avatenaniy ki, Zu Bez Bavay ḳoya bakalazu?"
Ama šoṭoġon Isusi ḳä upsun čuresuna q̇amiš teṭun baki.
Oša Isus Iz bava-nanaxun Nazareṭane qaybaki. Šoṭay nanan isä bütüm me äšurxo iz üḳe boš enefsay.
Isus kalane baksay, haq̇əl avuze baksay. Šoṭin Buxaʒ́uġoy saal amdarxoy čuresunane q̇azainšbsay.
