Isusen iz bula alabi be͑ġi Buxaʒ́uġoy ḳoya bakala näzir laxala q̇ave ṭo͑ġo͑l näzir tadala dövlätlü amdarxone aḳi.
Sa käsib süpür čuuxal aneḳi. Šoṭin näziri q̇utinä ṗä͑ leṗṭond tängäne laxi. *
Isusen pine: "Vä͑x düzinäz nex: me käsib süpür čuġon bitoṭuxun gele tängäne laxi.
Šoṭaynaḳ ki, šoṭoġoy bitoṭin dövlätin geleluġaxunṭun näzir laxi, me čuġon isä iz käsibluġa be͑ġinuṭ yäšäinšbseynaḳ bakala iz kiye bakalṭu bitova tanedi".
Bäzi amdarxon Buxaʒ́uġoy ḳožin q̇äšäng źeyurxo, Buxaʒ́uġoy c̣iyal laxeci payurxoxun exlätbaṭan Isusen pine:
"Ṭetär ġimxo eġale ki, vä͑n memiya aḳi šeymoġoxun źene loxol źe tene mandal, bito oćalaxun barabar bakale".
Šoṭoxun xavarṭun haq̇i: "Määlim, me Vi piyorox hevaxṭ bakala? Morox burqeġaṭan mani niśanxo bakala?"
Isusen pine: "Ehṭiyatlu bakanan, fereṭ mabakanan! Šoṭaynaḳ ki, Bez c̣iyen gele amdar hari "Zu Šozu" nääl ki, "Vaxṭ iśalainšakene" ukale. Šoṭoġoy bać̣anexun ma bafṭanan.
Davinq̇a üsyanxoy c̣iya ibakaṭan täšvišä ma bafṭanan. Šoṭaynaḳ ki, morox saturbe͑ś bakale. Axər isä usum tene eġal".
Oša šoṭoġo metäre pi: "Millät milläti, padčaġluġ padčaġluġi be͑ś č̣eġale.
Osṭaar oćal galbsun, här gala busaluġ saal pis azar, dähšätxo saal göynuxun kala niśanxo bakale.
Ama bito me äšurxoxun be͑š Bez c̣iya görä vä͑x biq̇alṭun, šäṗeġalṭun, sinagogxoq̇a zindanxo badalṭun, padčaġxoy saal kalaṭoġoy be͑ś tašalṭun.
Morox vä͑ynaḳ Mu͑q Xavara yäymišbseynaḳ sa fürsänt bakale
Moṭaynaḳal ḳä ǯoġab tasṭuna saturbe͑ś nu fikirbsuna ef üḳin boš q̇ärara eynan.
Šoṭaynaḳ ki, Zu vä͑x ṭetär sa exlätbsuni yön saal haq̇əl tadoz ki, ef be͑ś č̣eġalṭoġoy sayǯäṭin šoṭo nä ṗä͑ bes tene bakal, nääl ki šoṭay be͑ś čurpes tene bakal.
Lap efi nanoġon, bavoġon, vičimoġon, q̇oomxon saal dosṭurxon vä͑x biq̇esṭalṭun, saal ef bäziṭoġo besṗesṭalṭun.
Bez c̣iya görä bitoṭin vä͑x nifrät balṭun.
Ama ef belxun sa popal kam tene bakal.
Čurpi portbsunen ef elmoġo čarḳesṭanan.
Q̣ošunxoy Yerusalimi här täräf čurpsuna aḳaṭan avabakanan ki, šoṭay värän baksuni vaxṭ iśalainšakene.
Ṭe vädä Iudeyana bakalorox buruxmoġoq̇an ṭiṭeri, šähäre bakalorox ṭeṭiin č̣ereq̇an, ṭo͑o͑x bakalorox ṭiya maq̇an baci.
Šoṭaynaḳ ki, me ġimxo häyif haq̇ala ġimxone ki, bito cameciyorox bex ṗaṗane.
Ṭe ġimxosṭa bi͑hi čupuġoyq̇a döš tadala čupuġoy vay hala! Šoṭaynaḳ ki, ölkin bel kala bälä eġale, me azuḳi loxolal äǯuġ bakale.
Šorox qələnǯaxun č̣ovakalṭun, bito millätxoy arane sürgünä yaq̇abakalṭun. Ṭi͑yämi millätxoy vaxṭ čarḳamin Yerusalim q̇eräz millätxoy turnoqa ćaxćuxeġale.
Be͑ġasṭa, xašasṭa, muć̣uliġosṭa niśan aḳeġale. Oćalin ćoyel däniziq̇a dalġoġoy gürultinaxun millätxo čäšṗäš mandi koruġ aḳalṭun.
Insanxon qi͑yexun saal oćalin ćoyel eġala bälinä yaq̇ be͑ġsunen susṭ bakalṭun, šoṭaynaḳ ki, göynul bakala ṗlaneṭxo iz ganuxun galḳale.
Ṭe vädä šoṭoġon Insani Ġare asoyxoy arane kala zorenq̇a tamtaraġen eysuna aḳalṭun.
Me äšurxo bex ṗaṗsa burqaṭan ef bula alabanan ala be͑ġanan, šoṭaynaḳ ki, ef toyen čarḳesun iśalainšebaksa".
Isusen šoṭoġoynaḳ sa mäsäläl enečeri: "Inǯili xodaal, bito xodurxoval be͑ġanan:
šoṭoġon xazal qayḳaṭan vä͑nǯä moṭo be͑ġi avananbakon ki, yäy ene iśane.
Haketäräl vä͑n me šeymoġoy bex ṗaṗsuna aḳaṭan avabakanan ki, Buxʒ́uġoy Padčaġluġ iśane.
Vä͑x düzinäz nex: me näsil iz yäšäyinši axəra ṗaṗalṭuxun be͑ś morox bito bex ṗaṗale.
Göyäl, oćalal č̣ovaki taġale, ama Bez äyitmux sal sa vaxṭ č̣ovaki taġalatene.
Vä͑x fikir tadanan! Ef üḳ tarapsuni, finaġoyluġi, me yäšäyänši fikirxon buymaq̇an baki. Ṭe ġi ef ćoyel sa tälä ḳinä bürdän maq̇an hari.
Šoṭaynaḳ ki, ṭe ġi oćalin ćoyel yäšäyinšala bitoṭay loxol eġale.
Šoṭaynaḳal ef loxol eġala bito me bäloxun čarḳi Insani Ġare ćoyel č̣eyes bakseynaḳ här vaxṭ afərəṗsun muġur čurpanan.".
Isusen ġenaxun Buxaʒ́uġoy ḳoya zomebsay, üšena isä ṭeṭiin č̣eri Zeytun burux c̣ila buruġone č̣ovakesṭay.
Savaxṭan üšenen bito amdarxo Isusa ibakseynaḳ Šoṭay ṭo͑ġo͑l, Buxaʒ́uġoy ḳoyaṭun eysay.
