Isus ω͑vel Urufen buybaki Yordan oqaxun qayebaki, Urufen Iču amc̣i oćalane tašeri.
Ṭeṭiya Isus q̇ərx ġi vaxṭesṭa iblisa täräfäxun sinäinšebaki. Me vädinesṭa Isusen hiḳḳal tene käyi. Q̣ərx ġi č̣ovakiṭuxun oša isä Šo busanebaki.
Iblisen Šoṭo pine: "Ägär Hun Buxaʒ́uġoy Ġarnusa, me źena ämirba ki, śumq̇an baki".
Ama Isusen šoṭo metäre ǯoġab tadi: ""Amdar täkč̣ä śumen tene yäšäinšo", pine camece".
Oša iblisen Isusa alloy sa galane lačuvḳi, usum vädinesṭal dünyäni bito padčaġluġxo Šoṭo aḳesedi.
Iblisen Isusa pine: "Zu bito moṭoġoy loxol bakala kalaluġa saal varluga Va tadoz, šoṭaynaḳ ki, morox zane tadece, zuval šu čureġaiz, šoṭo tades baskon.
Be͑ġa, ägär Hun za bul ḳosṗain, morox bito Vi bakale".
Isusen moṭo metäre ǯoġab tadi: ""Šeytan, irad baka bez ṭo͑ġo͑lxun! Buxaʒ́ux Q̣onʒ́uġo bul ḳoc̣ba, täkč̣ä Šoṭoval q̇ulluġba" pine camece".
Oša iblisen Šoṭo Yerusalimane tašeri, Buxaʒ́uġoy Ḳožin bel sa gala efi pine: "Ägär Hun Buxaʒ́uġoy Ġarnusa, va memiin oq̇a bosa.
Axər "Buxaʒ́uġon Va görä Iz angelxo ämirebo ki, Va efeq̇aṭun,
Va ičoġoy kulmoġoy loxol tašaṭun, Vi tur sa źena nu lafṭane" pi camecene".
Ama Isusen šoṭo metäre ǯoġab tadi: ""Buxaʒ́ux Q̣onʒ́uġo sinäinš maba" -- camecene".
Iblisen här sinäinšbsuna čarḳiṭuxun oša sa gädär vaxṭ Šoṭoxun ä͑xile baki.
Isus Urufi zoren Galileyinane qaybaki. Šoṭay barada xavar bito ṭe gala yäymiše baki.
Isusen ṭiyani sinagogxosṭa zombsane burqi. Bitoṭinal Iču tärifläinšebsay.
Isus Iz kalabaki Nazareṭ šähärene hari saal Iz ädäten U͑qu͑mǯi ġine sinagogane taci. Šo ω͑vel Camurxoxun ḳalṗseynaḳ turele hayzeri.
Šoṭo Isaya xavartašali girkäṭun tadi. Isusen girkä qaypi me äyitmox cameci ganune bä͑ġä͑bi:
"Q̣onʒ́uġoy Uruf Bez loxole, Šoṭaynaḳ ki, faġərxo Mu͑q Xavara avabakesṭeynaḳ Šoṭin Za q̇ulluġe tadi, Biq̇eciṭoġo čarḳesun, Ḳać̣iṭoġo ičoġoy pulmoġoy qayesuna bayanbseynaḳ, Čätinluġa bakalṭoġo särbäsṭ tärbsuna bayanbseynaḳ,
Q̣onʒ́uġoy üḳ boḳosṗala usena bayanbseynaḳ Zane yaq̇abi".
Oša Isusen girkä buṭḳi q̇ulluġčina tadi, areci. Sinagoga arciṭoġon bitoṭin Šoṭo diqqäten be͑ṭunġsay.
Isusen šoṭoġoynaḳ exläṭbsane burqi: "Vä͑n ibaki me ω͑vel Cam ġe bex ṗaneṗi".
Biṭoṭin Šoṭay barada šaaṭ äyiṭmoxṭunney saal Šoṭay źomoxun č̣eġala üḳ boḳosṗala äyiṭmoġo haq̇eci manṭunsṭay. Šoṭoġon "Yäni Mo Iosifi Ġar teneki?" nexṭuniy.
Isusen šoṭoġo metäre pi: "Onsuz vä͑n Za "Ay doxṭur, hun va q̇olayba!" mäsälinä eyex badalnan. "Ḳefernauma biṭoġoy barada ibakeynan. Memiya, Vi yurdasṭal, haṭe äšurxo ba!" uḳalnan".
Oša pine: "Vä͑x düzinäz nex: sal sa xavartašal iz yurdnu q̇abul tene baksa.
P̣urumal vä͑x düzinäz nex ki, Ilyay vädinesṭa göy xib usen u͑q xaš vaxt buṭe mandi, bito ölkine kala busaluġ bakaṭan Israilä gele süpür čupuxoy.
Ama Ilya šoṭoġoy sayǯäṭay ṭo͑ġo͑l tä, Sidoni Sarfat šähäre bakala sa süpür čuġoy ṭo͑ġo͑le yaq̇baki.
Yelisey xavartašali vädinesṭa Israila gele ǯuzamlunoy. Ama Aramlu Naamanaxun bašq̇al šoṭoġoxun säyǯo tämiz tene baki".
Sinagoga bakala amdarxo bito me äyitmoġo ibaki äǯuġlainšṭunbaki.
Sorox turelṭun hayzeri, Isusa šähärexun ä͑xil šäṗṭunci. Šoṭo učurumaxun bosṭeynaḳ šähär biq̇eci täpin belṭun ečeri.
Ama Isus šoṭoġoy aranexun č̣eri taneci.
Isus Galileyay Ḳefernaum šähärene hari. U͑qu͑mǯi ġine Šoṭin zombsane burqi šoṭoġo.
Šoṭay zombsuna haqeci manṭunsṭay, šoṭaynaḳ ki, Šoṭin sa kaloo ḳinäne äyitey.
Haṭe vädä sinagoga ǯinla-tortor urufla sa tanebuy. Šoṭin osṭaar harayepi:
"Ḳää bake? Ay Nazareṭlu Isus, yaxun ḳän čuresa? Yax äfčibsan hare? Zu avazu Hun šunu: Buxaʒ́uġoy ω͑velonu!"
Ama Isusen šoṭo q̇adaġanbi pine: "Šiṗ čurpa, me amdaraxunal č̣eki!" Ǯinen me amdara bitoṭay be͑ś oq̇a saki sal sa zäräl tadinut šoṭoxun č̣ere.
Bito matṭun mandi, sun-sunal piṭun: "Me äyit hiḳä? Moṭin tortor urufxo kalaluġenq̇a zorene ämirbsa, šoroxal č̣eṭunsa!"
Isusi barada xavar me oćali här gala yäymišebaki.
Isus sinagogaxun č̣eri Simoni ḳoyane hari. Simoni q̇aynako kala q̇əzdərmin boš baseḳsay. Me čuġoynaḳ Isusaxun kömäyṭun čureśi.
Isus šoṭo iśalayinšaki q̇əzdərmin azara q̇adaġanebi, čuġoyal q̇əzdərma cire. Ǯuux haṭe saad hayzeri ičoġo q̇ulluġbsane burqi.
Be͑ġ batḳaṭan bitoṭin ǯürbäǯür azarxo bakalṭoġo Isusi ṭo͑ġo͑lṭun ečeri. Šoṭin här sunṭay loxol Iz kula laxi šoṭoġo q̇olayebsay.
Sa hemaṭoġoxun isä tortor urufxon "Hun Buxaʒ́uġoy Ġarnu!" uḳa haraypsun č̣eṭunsay. Ičin isä šoṭoġo q̇adaġanebsay, äyitbsuna iǯaza tatenesṭay. Šoṭaynaḳ ki, šoṭoġon Isusi Xrisṭos baksuna avaṭuniy.
Ḳäybakaṭan Isus č̣eri amdar nu bakala sa galane taci. Amdarxon isä Iču qävṭunsay. Šorox Isusi ṭo͑ġo͑l hari ičoġo barti maq̇an taci pi, Šoṭo ičoġoy ṭo͑ġo͑l efsunṭun čureci.
Ama Isusen Šoṭoġo pine: " Zu ṭi͑yämi šähärmoġoval Buxaʒ́uġoy Padčaġluġi Mu͑q Xavara yäymišiz buq̇on, šoṭaynaḳ ki, Zu ḳoṭaynaḳez yaq̇abake".
Metärluġen, Isusen Iudeyani sinagogurxo karoozebsay.
