Sa ġi Isus Ginnesar göle ṭo͑ġo͑l ćurpeney. Ǯamaat Šoṭay härrämine ćurpi, Buxaʒ́uġoy äyitä u͑mu͑xṭunlaxsay.
Isusen göle ṭo͑ġo͑l čurpi ṗä͑ dänä lodḳane aḳi. Čälibiq̇alxo isä lodḳinaxun č̣eri ičoġoy torurxoṭun oc̣ksay.
Isus ṗä͑ lodḳin sunṭu - Simoni lodḳina arci šoṭoxun göle ṭo͑ġo͑lxun samal ä͑xilbaksunane xahišbi. Oša Isus arci ǯamaata lodḳinaxun zombsane burqi.
Šoṭin Iz äyitä čarḳaṭan Simona pine: "Lodḳina bä͑ġäloyluġa tašanan, ef torurxoval čäli biq̇seynaḳ xena bosanan".
Simonen ǯoġabe tadi: "Määlim, yan üše käybakamin äšyanbe, ama hiḳḳal biq̇es teyan baki. Vi äyiten saal torurxo bosson".
Metärbi ṭe q̇ädäräl čäliṭun biq̇i ki, ičoġoy torurxoval zəġbaksane burqi.
Šoṭoġon ṭi͑yämi lodḳina bakala yoldašxo ḳalṭunpi ki, hari ičoġo kömäybaṭun. Šoṭoġon hari lodḳoġoy ṗrannal čälinen buyṭunbi. Lodḳoxal batksane burqi.
Simon P̣yoṭeren moṭo aḳi Isusi turmoġo biti metäre pi: "Ay Q̣onʒ́ux, zaxun ä͑xil baka, axər zu günaxkar sa amdarzu".
Šoṭaynaḳ ki, šo ičal, iz ṭo͑ġo͑l bakaloroxal ičoġoy biq̇i čälin gele baksunaxun mat mandeṭuniy.
Simonaxun ortaġ bakala Iakov saal Iona c̣ila Zevedeyi ġarmuxal hametär hissurxoy bošṭuniy. Ama ωsusen Simona metäre pi: "Ma q̇i͑ba, moṭoxun oša čälin gala amdar biq̇alnu".
Šoṭoġon lodḳoġo göle ṭo͑ġo͑l č̣evḳi bitova bosi Isusi bać̣anexunṭun taci.
Sa ġi Isus šähärmoġoy sunṭusṭa bakaṭan bädän dirisṭ ǯuzama biq̇eci sa amdarane iräst hari. Me amdaren Isusa aḳi, ćooq̇a pasṭeci xoinśebi: "Ay Q̣onʒ́u͑x, čureġayin za tämizbes banko".
Isusen Iz kula boxodi šoṭo lafṭesedi, oša pine: "Čurezsa, tämizbaka!" Haṭe saad me amdar ǯuzamaxun tämize baki.
Isusen šoṭo tapšurebi ki, šuḳḳala sa äyit maq̇an pi, saal pine: "Ama taki, va be͑inśa aḳesṭa. Amdarxoval avabakesṭeynaḳ, vi ǯuzamaxun tämizbaksuna görä Moiseyi buyruġxo be͑ġi q̇urbanxo eča".
Ama Izi baradan exläṭ samalal här gala yäymiše baksay. Ġele amdarxo Isusi ṭo͑ġo͑le eysay ki, Šoṭo u͑mu͑xlaxaṭun, saal azaraxun q̇olaybakaṭun.
Ama Isus täkluġa zaṗeci afərənney.
Sa ġi Isusen zomnebsay. Galileyayq̇a Iudeyay bito ayizmoġoxun saal Yerusalimaxun eġala fariseyxoq̇a ḳanuni määlimxo Iz ṭo͑ġo͑l arceṭuniy. Azariṭoġo q̇olaybseynaḳ Isusasṭa Q̣onʒ́uġoy zorebuy.
Me vädä sa hema tanen gane boš basḳi sa ṗaraličen duġi amdaraṭun ečeri. Šoṭoġon me amdara bona ečeri Isusi be͑ś laxsunaṭun čaləšaksay.
Ama gele amdar topbaksunaxun ṗaraličen duġi amdara Isusi ṭo͑ġo͑l ečes bateṭunḳsay. Šoṭaynaḳal ḳožin ḳirämiṭä ṭaṭapi qayṭunpi, azaruna döšäyi boš bi͑yex, Isusi be͑ś laṭunxi.
Isusen šoṭoġoy ve͑baksuna aḳi pine: "Dosṭ, vi günaxxo baġəšlainšebaki".
Ḳanun camḳalxon saal fariseyxon ičoġoy üḳe boš metär fikirbšaṭun burqi: "Buxaʒ́uġoy tärsinä äyiṭḳala me amdar šuva ki? Buxaʒ́uġoxun bašq̇al šina günaxxo baġəšlainšes bakon?"
Isusen šoṭoġoy ḳä fikirbsuna q̇amišaki ǯoġabe tadi: "Heṭaynaḳ ef üḳe boš metärnan fikirbsa?
Manu samal hasanda? "Vi günaxxo baġəšlainšebaki" upsun, yoxsa "hayza, tarapa?"
Ama vä͑n avabakanan ki, Insani Ġare oćalin ćoye günaxxo baġəšlainšala exṭiyär bune". Oša ṗaraličen duġi amdara pine: "Va nexsu hayza, vi döšäyä exṭa, vi ḳoya taki!"
Azaru haṭe saad bitoṭay piin be͑ś turele hayzeri, iz döšäyä exedi, Buxaʒ́uġo šükürbsun iz ḳoyane taci.
Bitoṭay üḳe q̇i͑ne bafṭi, Buxaʒ́uġo šükürbsun kala q̇iye boš piṭun: "Ġe nu aḳeci äšurxoyan aḳi!"
Moṭoxun oša Isus č̣öše č̣eri, nalog gireġala gala arci Levi c̣ila naloggirbala aḳi šoṭo pine: "Bez bać̣anexun eki".
Šoṭinal hayzeri, biṭova bosi, Isusi bać̣anexune taci.
Oša Levinen iz ḳoya Isusa kala sa q̇onaxluġe tadi. Sulfin bać̣ane šoṭoġoxun sagala gele naloggirbalxo saal q̇eräz amdarxoval buney.
Fariseyxonq̇a ičoġoy girk camḳalxon nairäziluġbsaṭun burq̇i. Šoṭoġon Isusi šagirdxo piṭun: "Heṭaynaḳ naloggirbalxoxunq̇a günaxkarxoxun sagala käyi-u͑nanxsa?"
Ama Isusen šoṭoġo metäre ǯoġab tadi: "Azarsuzṭoġoy tene, azaruṭoġoy doxṭura ehṭiyäǯo.
Zu düzgün amdarxo tää, günaxkarxo toobabsuna ḳalpsaz hare".
Šoṭoġon isä Isusa piṭun: "Ioani šagirdxon usum-usum ġurux efi afərəṭunne, fariseyxoy šagirdxonal metärṭunbsa. Ama Viṭoġon käyi-u͑ṭunġsa".
Isusen šoṭoġo ǯoġabe tadi: "Laśḳoybakala bäye ṭo͑ġo͑l arci yoldašxo ġurux efsuna mäǯburbes bananko?
Ama sa ġi eġale, laśḳoybakala bäyä ičoġoy aranexun tašalṭun, ṭe vädä šoṭoġonal ġurux efalṭun".
Isusen šoṭoġoynaḳ sa mäsäläl enečeri: "Šuḳḳalen täzä paltaraxun sa ḳoṭor čuki bisi paltara yamaluq̇ tene duq̇on, yoxsa täzä paltar ham zəġebakon, hamal täzä paltaraxun čukeci ḳoṭor bisi paltara yarayinš tenebon.
Šuḳḳalen täzä finä bisi tuluġxo bateneḳon. Yoxsa täzä finen tuluġxo to͑pe͑ve͑kon, ham fine baro, hamal tuluġxone xarab bako.
Täzä fi täzä tuluġxone bayeġo.
Šuḳḳalen bisi fi u͑ġiṭuxun oša täzäṭu čurteneġo. Šoṭaynaḳ ki, uneḳo: "Bisiyo samalal šaat"".
