Sa U͑qu͑mǯi ġine Isus taxəli äkini aranexun č̣ovaneḳsay. Iz šagirdġon isä sünbülxo čuki ičoġoy mä͑xine śarpi uṭunḳsay.
Fariseyxoy bäziṭoġon piṭun: "Vä͑n heṭaynaḳ U͑qu͑mǯi ġine q̇adaġan baki äšurxonan biq̇sa?"
Isusen šoṭoġo ǯoġabe tadi: "Davidenq̇a iz ṭo͑ġo͑l bakiṭoġon busa bakaṭan ḳäbsuna ḳaltenanpe?
Šo Buxaʒ́uġoy ḳoyane baci; be͑inśxoxun bašq̇al šuḳḳala uksuna iǯaza nu tadeġala Q̣onʒ́uġoy c̣iyal laxeci śumurxo exṭi käye, iz to͑ġo͑l bakalṭoġoval tanedi".
Oša Isusen šoṭoġo pine: "Insani Ġar U͑qu͑mǯi ġine loxol Q̣onʒ́uxe".
Q̣eräz sa U͑qu͑mǯi ġine Isus ṗurumal sinagoga baci zomebsay. Ṭeṭiya yön kul q̇aribaki sa amdarebuy.
Ḳanun camḳalxon saal fariseyxon Isusa taxsərkärbsuna määnä bä͑ġä͑bseynaḳ Šoṭo pulṭun laxsay ki, aḳaṭun, U͑qu͑mǯi ġine azar q̇olaybala yoxsa tä.
Ama Isusen šoṭoġoy ḳä fikirbsuna avabaki kul q̇aribaki išq̇ara pine: "Turel hayza č̣eki bi͑yex!" Ṭe amdaral turel hayzeri č̣ere bi͑yex.
Oša Isusen šoṭoġo pine: "Vä͑xun xavarez haq̇sa, maṭuva iǯazabu, U͑qu͑mǯi ġine šaaṭluġ, yoxsa pisluġbsuna, šinesa elmoġo čarḳesṭun, yoxsa äfčibsuna?"
Isusen härrämine bakalṭoġoy bitoṭay loxol be͑ġi ṭe amdara pine: "Vi kula boxoda!" Šoṭin ketär bine, iz kulal süfṭin halane qaybaki.
Šorox isä gele äǯuxlainšaki Isusa ḳäbes baksuni barada sunsunaxun mäslääṭbsaṭun burqi.
Ṭe ġimxosṭa Isusen afərəṗseynaḳ buruġone laci. Šoṭin dirisṭ üšena Buxaʒ́uġo afərəḳane č̣ovakesṭi.
Käybakaṭan Iz šagirdxo Iz ṭo͑ġo͑le ḳalpi, šoṭoġoxun ṗasc̣c̣e [siǯ!] tan č̣äḳṗi aṗosṭol c̣ine tadi:
P̣oṭr c̣i tadi Simon, šoṭay viči Andrey, Iaḳov, Ioan, Filiṗ, Varfolomey,
Maṭfey, Foma, Alfeyi ġar Iaḳov, Milläṭči c̣ila Simon,
Iakovi ġar Iuda saal oša xäyanätbal bakala Iuda Isḳarioṭ.
Isus šoṭoġoxun sagala oq̇ane ciri, düzänluġa čurepi. Ṭeṭiya Iz šagirdxoxun bakala gele amdarebuy. Bütüm Iudeyinaxun, Yerusalimaxun, Sur saal Sidoni ṭo͑ġo͑l bakala oćalxoxun gele amdar
Iču u͑mu͑x laxsa saal ičoġoy azarxoxun q̇olaybaksaṭun harey. Tortor urufaxun äzyät zaṗḳaloroxal q̇olayṭunbaki.
Bütüm amdarxon Isusa lafsṭunaṭun čaləšaḳsay. Šoṭaynaḳ ki, Šoṭoxun č̣eġala zoren bütümä q̇olayebsay.
Isusen Iz šagirdxoy loxol be͑ġi pine: "He bäxṭävärnan, ay käsibxo! Šoṭaynaḳ ki, Buxaʒ́uġoy Padčaġluġ efine.
He bäxṭävärnan, ay häysä busaluġ č̣ovakesṭalxo! Šoṭaynaḳ ki, bošalnan. He bäxṭävärnan, ay häysä o͑no͑ḳalxo! Šoṭaynaḳ ki, axśumḳalnan.
Insani Ġara görä amdarxon vä͑x nifräṭ baṭan, vä͑x ičoġoy aranexun šäṗeci tähḳir baṭan, ef c̣iya biyabur baṭan, he bäxṭävärnan!
Ṭe ġi mu͑q bakanan, mu͑qe͑xunal ǯupi-bitanan! Šoṭaynaḳ ki, göynul ef mükafat kalane. Axər šoṭoġoy bava-kalboġonal xavartašalxoxun metärṭun häräkätbe.
Ama vay ef hala, ay varluyorox! Šoṭaynaḳ ki, ene vä͑x lazəm bakalṭoġo haq̇enan.
Vay ef hala, ay häysä boš bakalxo! Šoṭaynaḳ ki, busaluġ zaṗḳalnan. Vay ef hala, häysä axśumḳalorox! Šoṭaynaḳ ki, yas efi o͑no͑ḳalnan.
Bütüm amdarxon ef barada šaaṭ šeymux uḳaṭan, vay ef hala! Axər šoṭoġoy bava kalboġonal äfči xavartašalxoxun metärṭun häräkätbe.
Ama vä͑x nexsu, ay Za ibakalxo: ef düšmänxo čurekinan, vä͑x nifräṭbalṭoġo šaaṭluġ banan,
vä͑x länäṭbalṭoġo xeyir-bäräkät tadanan, vä͑x inǯiṭmišalṭoġoynaḳ afərəpanan.
Sa ćoyel sillä duġiṭayna ṭi͑yämiṭuval fərəda, vi alin paltara tašalṭuxun guraṭal kam maba.
Vaxun sa šey čureġala här tana tada, vi mala tašalṭuxun qaydi mačureki.
Amdarxon vä͑xun mani yöndä räfṭarbsuna čurnansa isä, vä͑nal šoṭoġoxun ṭetär räfṭar banan.
Vä͑x čureġalṭoġo čurnansa isä, mani tärifänan layiġ? Šoṭaynaḳ ki, günaxkarxonal ičoġo čureġalṭoġo čurṭunsa.
Ägär vä͑x šaaṭluġ balṭoġo šaaṭluġ balnansa, mani tärifänan layiġ? Šoṭaynaḳ ki, günaxkarxonal ketärṭunbsa.
Ägär qaydi qoš exsṭuni umudennan amdarxo borǯ tasṭasa, mani tärifä layiġnan? Günaxkarxonal günaxkarxo borǯ taṭunsṭa ki, ṭe borǯa bitova qaydi qoš exṭaṭun.
Ama vä͑n efi düšmänxo čurekinan, šoṭoġo šaaṭluġ banan, borǯ tadanan, šoṭoġoy qaysṭuna ummiš mabanan, efi haqq ṭe vädä kala bakale, vä͑nal Ala Arciṭay ġarmux hesab bakalnan. Šoṭaynaḳ ki, Šo šaaṭluġ nu q̇amišakala, pis amdarxoynaḳal xeyir tadale.
Ef bava üḳ boḳosṗal bakiṭullariḳ, vä͑nal üḳ boḳosṗal bakanan.
Divan ma biq̇anan, vä͑nal divan tenan bakal. Q̣ärär ma č̣evḳanan, vä͑ynaḳal q̇ärär tene č̣eġal. Ṭi͑yämiṭoġo baġəšlainšanan, vä͑nal baġəšlainšakalnan.
Tadanan, vä͑xal tadeġale: źiḳeci ćaxḳa-ćaxḳa buybakala kala sa ölčinen vä͑x q̇uǯaġ-q̇uǯaġ tadeġale. Šoṭaynaḳ ki, mani ölčinen usḳalnan, haṭe ölčinenal vä͑ynaḳ usḳeġale".
Isusen šoṭoġoynaḳ ṗurumal sa mäsäle ečeri: "Ḳaʒ́inen ḳaʒ́ina tašes baneko? Po͑ġä͑l kurnu teṭun bafṭo?
Šagird määlimaxun ala tene, ama tam zombakiṭuxun oša här šagird iz määlim ḳinäḳ bakale.
Hun heṭaynaḳ vi vičey piyel čöpä anḳsa, ama vi piyel bakala duruṭa č̣äḳtenne?
Vi piyel bakala duruṭa isä aḳinuṭ vičä hetären uḳon: "Ay viči! Barta vi piyel bakala čöpä č̣evḳaz!" Ay ṗä͑ ćoloo, süfṭä vi piyel bakala duruṭa čevḳa, oša qay anḳon ki, vičey piyel bakala čöpä hetär č̣evḳesa bakon.
Šaaṭ xoden pis bar etenečo, pis xodenal šaaṭ bar etenečo.
Šoṭaynaḳ ki, här xod iz baraxune čalxesa. Q̣aratikänäxun inǯil hä͑vteṭunq̇o, cacluġaxunal ṭul teṭun hä͑vq̇on.
Šaaṭ amdaren izi üḳe šaaṭluġ ambaraxun šaaṭ šeymuxe č̣evḳsa, pis amdaren izi üḳe pis ambaraxun pis šeymuxe č̣evḳsa. Šoṭaynaḳ ki, u͑ḳe buy baksunaxune źomon äyiṭḳon.
Heṭaynaḳ Za: "Ay Q̣onʒ́ux, ay Q̣onʒ́ux" uḳa ḳalnanne, ama Bez piṭoġo bex ṗaṗestenanbsa?
Bez ṭo͑ġo͑l eġalo, Bez äyitmoġo ibaki šoṭoġo bex ṗaṗesṗala här tani šu ošq̇arsṭuna vä͑x bex bazdon:
šo ḳož biq̇ala amdarane ošq̇ar ki, oćala bä͑ġä͑loy ḳaśṗi binorina źene loxole laxe. Selen ćaxḳaṭan ḳoža zor biyaltayin, šoṭo carpes tene bakon. Šoṭaynaḳ ki, ḳožin binora źene loxole laxece.
Ama Bez äyitmoġo ibaki šoṭoġo bex ṗaṗes nubala amdar oćalin loxol binorasuz ḳož biq̇ala amdarane ošq̇ar. Selen ṭe ḳoža ćaxeḳon, ḳožal haṭe saad baredo. Ṭe ḳože bisṭun sa yase bako".
