Me äšurxoxun oša Isus šähärmoġoq̇a ayizmoġo tarapsane burqi. Šoṭin Buxaʒ́uġoy Padčaġluġa karoozbsun Mu͑q Xavarane yäymišbsay. P̣acce šagird Šoṭoxun sagalaney.
Haketäräl šär urufxoxunq̇a azarxoxun q̇olaybaki bäzi čupux, ičuxun vüġ ǯin č̣eri Magdalinaxun bakala Mariya,
Irodi ḳožin äšurxo be͑ġala Xuzin čuux Yoxanna, Susanna, q̇eräzäl gele čupux Isusaxunṭuniy. Me čupuġon Isusaq̇a Iz šaġirdxo ičoġoy xususi malaxun kömäyṭunbsay.
Gele ǯamaat giregaṭan, amdarxo här šähärexun Isusi ṭo͑ġo͑l eġaṭan, Isusen šoṭoġoynaḳ sa mäsäläne exläṭṗi:
"Sa äkinči č̣ere iz cilä carṗsa, carḳaṭan bäziyo bineti yaq̇e ṭo͑ġo͑l, turnoq̇a ćaxćuxeci, göye q̇ušurxonal käyṭun šoṭoġo.
Bäziyo źeluġane biti, göyunbaki q̇arinebaki, šoṭaynaḳ ki xesuze mandi.
Bäziyo cacluġane biti. Cacurxo cilaxun sagala kalabaki šoṭo haq̇lainšṭunbi.
Bäziyorox isä bäräkätlu oćalane biti, kalabaki sabać q̇at avuzin bare tadi". Koṭo piṭuxun oša pine: "Ši ibakala u͑mu͑x bunesa ibakeq̇an!"
Izi šagirdxon isä xavarṭun haq̇i Ičuxun: "Ke mäsäli mäna hiḳä?"
Šoṭin pine: "Vä͑x Buxaʒ́uġoy Padčaġluġi sirurxo avabaksune tadece. Ṭi͑yämiṭoġoynaḳ isä täk mäsälxonez exlätbsa ki, "Aḳsunen maq̇aṭun aḳi, ibaki-maq̇aṭun q̇amišaki".
Me mäsäli mäna mone: cil Buxaʒ́uġoy äyite.
Yaq̇e ṭo͑ġo͑l bitiyorox äyitä ibakalxone. Oša iblisen hari äyitä ičoġoy üḳexun exṭi tanešṭa ki, ve͑ baki čarḳeces maq̇aṭun baki.
J̌eluġa bitiṭoġon isä äyitä ibaki mu͑qluġen q̇abulbaloroxe. Ama ičoġosṭa tum nu baksunaxun sa hema vaxṭ ve͑ṭunbaksa, sinäinšaksuni vaxṭ eġaṭan isä ve͑baksunaxun taraṭunne.
Cacluġa bitiyorox moroxe: äyitä iṭunbaksa, ama taysun me yäšäyinši därdürxon, varluluġen, kefurxon ćaxene ičoġo, šaaṭ bar tateṭunsṭa.
Bäräkätlu oćala bitiyorox isä moroxe: metär amdarxon äyitä ibaki ičoġoy xeyir tadala ve͑bakala üḳe boš eṭunfsa. Moṭoġon yavaš-yavaš xeyirṭun tasṭa.
Šuḳḳalen šama bäč̣üḳṭi q̇aven buṭteneksa, näälki taxṭe oq̇a latenexsa. Tärsinä, šame q̇ave loxole laxsa ki, baġalṭoġon išiġa aḳaṭun.
Šoṭaynaḳ ki, ṭetär sa č̣äṗḳin äš teno ki, qavuna č̣eġalatene, ṭetär sa but äšäl teno ki, avabaki qayeġalatene.
Moṭaynaḳal ef hetär u͑mu͑x laxsuna fikir tadanan. Šoṭaynaḳ ki, ši bunesa šoṭo samalal gele tadeġale. Ama ši tenosa, izi baksuna zändbi šeyal iz kiyexun č̣eġale".
Isusi nanaq̇a vičimux Iz ṭo͑ġo͑lṭun hari. Ama amdarxoy geleluġaxun Šoṭo iśalainšakes teṭun baki.
Isusa xavarṭun tadi: "Vi nanaq̇a vičimux č̣öš čurpi Va aḳsunṭun čuresa".
Isusen šoṭoġo ǯoġabe tadi: "Bez nanaq̇a vičimux Buxaʒ́uġoy äyitä ibaki šoṭo bex ṗaṗesṗaloroxe".
Sa ġi Isus Iz šagirdxoxun sa lodḳinane laci, šoṭoġo pine: "Ekinan göle ṭe täräf č̣eġen" Šorox yaq̇aṭun bafṭi.
Šorox lodḳinen taġaṭan Isusa neṗene tašeri. Gölä sa tufane e͑qe͑ci. Lodḳa xenen buybaksa burqaṭan šorox xatalu väzyätäṭun bafṭi.
Šagirdxon iśalainšaki Isusa muġurbi piṭun: "Määlim, Määlim, yan äfčiyan baksa!" Isus hayzeri muša saal e͑qe͑ġala xeyurxo q̇adaġanebi. Tufan čurepi, šiṗluġe baki.
Ṭe vädine Šoṭin Iz šagirdxo pine: "Ef ve͑baksun maya?" Šorox isä q̇i͑ye boš määṭṭäl mandi sun-sunaxun xavarṭun haq̇say: "Me Amdar šuva ki, ham mušurxo, ham xena bürmišebsa, šoroxal tabiṭun baksa?"
Oša šorox Galileyin be͑ś bakala Gadaraluġoy oćalaṭun hari.
Isus lodḳinaxun q̇ariluġa č̣eġaṭan šähärexun bakala sa išq̇are Šoṭoxun iräsṭ hari. Ǯinurxo biq̇eci, gele vaxṭal paltar nu laḳala me amdar ḳoya tä, gärämzäluġxone yäšäuinšbsay.
Šoṭin Isusa aḳala ḳinäḳ haraypi Šoṭay be͑ś diz čöḳṭi osṭaar harayḳa-harayḳa pine: "Ay Isus, Ala Arciṭay Ġar, zaxun ḳän čuresa? Xoyinśesbsa Va, za äzyät ma tada!"
Šoṭaynaḳ ki, Isusen tortor urufa ämr beney ki, me amdaraxun č̣ereq̇an. Me urufen ṭe amdara gele vaxṭaxun biq̇eney. Moṭaynaḳal ṭe amdara güdmüšbseynaḳ šoṭo zinǯiren ġaćṗeṭuniy. Šoṭin isä zinǯirxo ḳac̣eney, ǯinenal iču čölöne šäṗesay.
Isusen šoṭoxun xavare haq̇i: "Vi c̣i hiḳä?" Šoṭin ǯoġabe tadi: "Bez c̣i Q̣ošune". Šoṭaynaḳ ki, šoṭay boš gele ǯine bacey.
Šoṭoġon tum nu bakala bä͑ġä͑loyluġa bafsṭuna nu ämr bane pi, Isusa xoinśṭunbsay.
Ṭeṭiya - buruġoy döšel, kala sa bo͑q̇e sürüne otarišaḳsay. Ǯinurxon Isusa xoinśṭunbi ki, bo͑q̇u͑rxoy boš baysuna iǯaza tadane. Isusenal šoṭoġo iǯaza tanedi.
Ǯinurxo amdaraxun č̣eri bo͑q̇u͑rxoy bošṭun baci. Sürüäl alaxun oq̇a gölä bafṭi q̇ä͑q̇ä͑neci.
Bo͑q̇ otarišalxon moṭoġo aḳi, me xavara šähärmoġoq̇a ayizmoġo yäymišṭunbi.
Ǯamaat ḳä baksuna tamašabsane č̣eri. Šorox Isusi ṭo͑ġo͑lṭun hari, iz bošṭan ǯinurxo č̣eri amdara Isusi turmoġoy ṭo͑ġo͑l paltar lapi saal haq̇ullainšaki arsṭuna aḳi q̇i͑yaṭun bafṭi.
Me äšurxo aḳiṭoġon isä ǯina biq̇eci amdari hetär q̇olay baksuna ǯamaata exläṭṭunbi.
Gadarluġoy härrämine bakala bütüm azuḳen Isusaxun xaišebi ki, ṭiyanaxun taceq̇an, šoṭaynaḳ ki, šoṭoġo kala q̇i͑yene haq̇ey. Isusal lodḳina laci qoše qaybaki.
Iz bošṭan ǯinurxo č̣eri išq̇aren Isusi ṭo͑ġo͑l mansṭeynaḳ Šoṭo xoinśe͑bi.
Ama Isusen šoṭo "qaybaka vi ḳoya, Buxaʒ́uġon vaynaḳ bi här äšlä exläṭba" pi, šoṭo tärebi. Me amdarenal taci Isusi ičeynaḳ biṭoġo bütüm šähäre yäymišebi.
Isus qoš qaybakaṭan amdarxon Iču q̇abulṭunbi, šoṭaynaḳ ki, bitoṭin Šoṭay yaq̇ane be͑ġsay.
Me vädä Yair c̣ila sinagogi kaloo bakala sa išq̇ar hari Isusi turmoġo biti Šoṭo xoinśebi ki, iz ḳoyaq̇an hari.
Šoṭaynaḳ ki, iz ṗac̣c̣e yäšṭä sayǯä xuyäroy, šo elmoġoy loxoley. Isus ṭiya taġaṭan amdarxon Iču səxmišebsay.
Ṭeṭiya ṗac̣c̣e usen ičuxun ṗi taysun azara bafṭi sa čuuxoy. Šoṭin bito iz bakalṭu doxṭurxoynaḳ xašlainšeney, ama šoṭoġoy sayǯäṭin iču q̇olaybes tene bakey.
Me čuux Isusi bać̣anexun hari Šoṭay paltari ätäyä lafedi, haṭe saad iz ṗi taysun čurepi.
Isusen pine: "Šuvay Za lafṭiyo?" Ama šuḳḳalen iz ozane nu exṭaṭan P̣yoṭren pine, "Määlim, amdarxon va här sa täräfäxun səxmišebsa".
Ama Isusen pine: "Za šunesa lafedi, šoṭaynaḳ ki, Zaxun zor č̣eysunaz avabaki".
Čuġon aneḳi ki, č̣aṗbakes tene bakal, ṭuṭuṗsun hari Isusi turnoq̇a bineti. Bütüm ǯamaati be͑ś Šoṭo heṭaynaḳ lafsṭuna, haṭe saadal hetär q̇olaybaksuna Isusa exlätebi.
Isusen šoṭo pine: "Bez xuyär, vi ve͑baksunen va čarḳesedi. Arxayin taki".
Isusen me äyiṭmoġo uḳaṭan sinagogi kalaṭay ḳoyaxun sa amdar hari pine: "Vi xuyär purene, Määlimä ene naraat maba".
Ama Isusen moṭo ibaki sinagogi kalaṭu pine: "Ma q̇i͑ba, täk ve͑baka, Vi xuyär čarḳeġale".
Isus šoṭay ḳoya eġaṭan P̣yoṭraxun, Ioanaxun, Iaḳovaxun saal xuyäri bava-nanaxun bašq̇al šuḳḳala Ičuxun ḳoya baysa tene barti.
Bitoṭin xuyäreynaḳ o͑no͑pi šivanṭunbsay. Ama Isusen pine: "O͑no͑mapanan, ko ṗuritene, haṭetä basḳene".
Šoṭoġon isä xuyäri bisuna avabaksuna görä Isusi loxol axśumṭunpi.
Ama Isusen xuyäri kiyexun biq̇i, pine: "Hayza, ay mic̣iḳ xuyär!"
Xuyäri uruf iz bädänä qayebaki, šo haṭe saad turele hayzeri. Isusen pine ki, xuyärä ukunq̇aṭun tadi.
Xuyäri bava-nana mat manṭundi. Ama Isusen šoṭoġo tapšurebi ki, me äšlin barada šuḳḳala maq̇aṭun exläṭbi.
