Isusen Iz pac̣c̣e šagirdä Iz ṭo͑ġo͑l ḳalpi bito ǯinurxoy loxol saal azarxo q̇olaybseynak šoṭoġo zor saal exṭiyäre tadi.
Šoṭoġo yaq̇anebi ki, Buxaʒ́uġoy Padčaġluġa karoozbi azariṭoġo q̇olaybaṭun.
Šoṭoġo pine: "Yaq̇eynaḳ hiḳḳal- nä čombaġ, nä toray, nä śum, nä tängä, näälki ṗä͑ guraṭ ma exṭanan.
Mani ḳoya baġaynan, ṭeṭiya mandanan, ṭeṭinal yaq̇a baftanan.
Vä͑x maya q̇abul nubayṭun, ṭe šähärexun č̣eġaṭan šoṭoġoy äleynä baksuna aḳesṭeynaḳ ef turmoġoxun tozal capṭanan".
Šoroxal yaq̇a bafṭi här gala Mu͑q Xavara yäymišbsun saal azar q̇olaybsun ayizba-ayiz taraṭunpi.
Galileyin kalo Iroden bakala me äšurxo ibaki määṭṭäl manedi. Šoṭaynaḳ ki bäziṭoġon nexey ki, mo Ioane ṗuriṭoġoy aranexun dirilmišake.
Bäziṭoġon nexey ki, Ilyane hare, ṭiyä͑miṭoġon nexey ki, mo bisi xavartašalxoxun soġone be͑yin bake.
Iroden isä pine: "Ioani bula zu boṭesṭezu, ṗoy iz barada me xavara zu ibakala Amdar šuva?" Šoṭo aḳseynaḳ iču besebsay.
Aṗosṭolxo Isusi ṭo͑ġo͑l qaybaki ičoġoy aḳi äšurxoy barada Šoṭo exläṭṭunbi. Oša Isusen sayč̣ä ičoġo Ičuxun exṭi Beṭ-Sayd uḳala sa šähärene tašeri.
Ama ǯamaaten me barada xavar avabaki Šoṭay qošṭane bafṭi. Isusen šoṭoġo šaaṭe q̇abulbi, šoṭoġoynaḳ Buxaʒ́uġoy Padčaġluġaxune exläṭbi, q̇olaybaksuna ehṭiyeǯ bakalṭoġoval q̇olayebi.
Ene be͑ġ bateksay. P̣ac̣c̣e šagird Isusi ṭo͑ġo͑l hari Šoṭo piṭun: "Ǯamaata tärba, barta härrämoġo bakala ganxo saal ayizmoġo taci käybeq̇aṭun, saal sa šey haq̇i käyeq̇aṭun. Axər yan miya čöl ganuyan".
Ama Isusen pine šoṭoġo: "Koṭoġo ukun vä͑n tadanan". Šagirdxon Šoṭo ǯoġabṭun tadi: "Q̣o śumaxunq̇a ṗä͑ čälinaxun bašq̇al sa šey buteyax. Bärkä yan taci bütüm me ǯamaateynaḳ sa šey haq̇en?"
Ṭeṭiya qo hazara iśa išq̇arebuy. Isusen Iz šagirdxo pine: "Šoṭoġo däsṭä-däsṭä, älli-älli arcevḳanan".
Šagirdxonal haketär bi bitova arcevṭunki.
Isusen qo śuma saal ṗä͑ čälina exṭi göynul be͑ġsun šükür bala afərənane pi. Oša šoṭoġo ǯöybi Iz šagirdxone tadi ki, ǯamaata paybeq̇aṭun.
Bitoṭin käyi- boneci. Avuzin mandala ḳoṭorxo ṗac̣c̣e zänbüläne gireci.
Sa ġi Isusen täk afərənney. Šagirdxoval Iz ṭo͑ġo͑ley. Isusen šoṭoġoxun xavare haq̇i: "Ǯamaati upsuna görä Zu šuzu?"
Šoṭoġon metärṭun ǯoġab tadi: "Bäziṭoġon Xačzaṗḳal Ioan, ṭi͑yämiṭoġon -Ilya, ṭesoġoṭoġon isä nexṭun ki, bisi xavartašalxoxun soġone be͑yin bake".
Ičinal xavare haq̇i: "P̣oy vä͑n šunan hesabsa Za?" P̣yoṭren ǯoġabe tadi: "Hun Buxaʒ́uġoy Xrisṭosnu".
Isusen Iz šagirdxo osṭaar q̇adaġanbi ämirebi ki, koṭo šuḳḳala nu uḳaṭun.
Šoṭin pine: Insani Ġaren gele äzyät zaṗḳalane, aġsaq̇q̇alxoy, kala be͑inšxoy saal ḳanun camḳalxoy täräfaxun irad bakalane, besbakalane saal xibimǯi ġine be͑yin bakalane".
Oša bitoṭu exlätebi: "Ägär sa tan Bez bać̣anexun eysun čuresa isä, ičuxun kul haq̇eq̇an, här ġiyal iz xača exṭi Bez bać̣anexun hareq̇an.
Šin iz elmoġo efsun čureġayin, aćesṗale, ama šin iz elmoġo Bez därden aćesṗain šoṭo efale.
Šin bütüm dünyänä q̇azainši elmoġo äfčinebsa, nä'äl ki aćesebsa, koṭay ḳä xeyirabu?
Šin Zaxun saal Bez äyitmoġoxun oṭṗayin, šoṭoxun Insani Ġarenal Izi, Iz Bavay, saal i͑vel angelxoy arane tamtaraġen eġaṭan, oṭṗale.
Ama vä͑x düzinäz nex: memiya čurpiṭoġoy bäziṭoġon Buxaʒ́uġoy Padčaġluġa aḳinuṭ biyalateṭun".
Me äyitmoġoxun oša, sa mu͑ġ ġi č̣ovaneki, Isusen Ičuxun P̣yoṭra, Ioana saal Iaḳova exṭi afərəṗseynaḳ buruġone laci.
Isusen afəriḳaṭan Izi ćoye aḳesun badalebaki, Izi paltari irängäl map-mac̣i, c̣aldalane baki.
Haṭe vädine Isusaxun ṗä͑ išq̇aren exläṭbsane burqi. Morox soġo Moisey, soġo Ilyaney.
Morox tamtaraġi bošṭun aḳeci, Isusi Yerusalima bex ṗaṗesṗi, me dünyänexun ǯöybaksunaxunṭun exlätbsay.
P̣yoṭra saal ičuxun bakalṭoġo bä͑ġä͑loy neṗen ćaxṗeney. Muġur baki, šoṭoġon Isusi tamtaraġa saal Ičuxun čurpi ṗä͑ išq̇araṭun aḳi.
Šorox Isusaxun ǯöybakaṭan P̣yoṭren Isusa pine: "Määlim! Yan memiya baksun šaaṭe, xib dänä čadər biq̇en: soġo Vaynaḳ, soġo Moiseyeynaḳ, soġoval Ilyaynak". Äslindä šoṭin tene avay ḳä nex.
P̣yoṭen me äyitmoġo uḳaṭan, sa asoy hari, šoṭoġoy loxol xožine saki. Xožina baġaṭan šoṭoġoy üḳ dähšäṭäne bafṭi.
Asoyi bošṭan sa säse hari: "Mo Bez Ġare! Bez č̣äḳṗiyone. Koṭo ibakanan".
Säs boṭbakaṭan šoṭoġon Isusa savsaṭun aḳi. Šagirdxon moṭo sir ḳinä efi ṭe ġimxo aḳiṭoġo šuḳḳala exläṭteṭunbi.
Äyč̣inderi šorox buruġoxun ciġaṭan Isusi be͑ś kala sa top ǯamaate č̣eri.
Ǯamaati aranexun sa išq̇aren harayepi: "Määllim, xoyinśe͑sbsa, bez ġara be͑ġa, šo bez täk sa ġare.
Sa urufen iču bineq̇sa, koṭin bürdän osṭaar harayene. Urufen iču iz źomoxun kä͑f baramin inǯiṭmišebsa. Iču äzyät tadi gele čätinluġen ičuxun č̣enesa.
Zu Vi šagirdxoxun šoṭo č̣evḳsuna xaišbezu, ama baǯarteṭunbi".
Isusenal šoṭo ǯoġabe tadi: "Ay nu ve͑bakala saal yaq̇a aćesṗi näsil! Mani vaxṭal ciriḳ Zu vä͑xun mandi vä͑x portṗoz? Vi ġara Bez ṭo͑ġo͑l eča".
Äyel Isusa iśalayinšakaṭan ǯinen šoṭo oq̇a saki źəḳepi. Ama Isusen č̣emen urufa q̇adaġanebi, ġara q̇olaybi iz bavane qaydi.
Bito Buxaʒ́uġoy kalaluġa määṭṭälṭun mansṭay.
"Me äyitmoġo u͑mu͑xlaxanan: Insani Ġar insani kiye täslim baksaxe".
Ama šagirdxon me äyitä q̇amiš teṭun baki. Me äyitin mäna šoṭoġoynaḳ buṭ manedi, saal Šoṭoxun me äyiti barada xavar haqsunal q̇i͑ṭunbsay.
Šagirdxon ičoġoy arane än kaloo šu baksuni barada höǯätbsaṭun burqi.
Isusen isä šoṭoġoy üḳe bakala fikirxo avabaki, sa mic̣iḳ äyel exṭi Iz ṭo͑go͑l lanexi.
Oša šoṭoġo pine: "Šin Bez c̣iyen me äylä q̇abulbayin, Za q̇abulebo. Šin Za q̇abulebosa, Za Yaq̇abalṭune q̇abulbo. Ef arane bitoṭuxun mic̣iḳ bakalo än kalone".
Ioanen ǯoġab tadi pine: "Määllim, yan Vi c̣iyen ǯinurxo šäṗeġala sa amdaryan aḳi, ama yaxun sagala nu taysuna görä šoṭo maneyan baki".
Ama Isusen šoṭo pine: "Šoṭo mane ma bakanan! Ef äleyinä nu bakalo ef täräfe".
Dünyänexun ǯöybaksuni ġimxo iśalainšbaksunen Isus Yerusalima taysuna q̇ärärebi.
Isusen Ičuxun be͑ś elčiġone yaq̇abi. Šoṭoġon Isusi eysuni c̣iyen häzürluġ be͑ġseynaḳ taci Samarialuġoy sa ayizeṭun baci.
Ama Samariyaluġon Isusa q̇abul teṭunbi, šoṭaynaḳ ki Šo Yerusalima täräfe taysay.
Iz šagirdxo Iaḳovenq̇a Ioanen moṭo aḳi piṭun: "Q̣onʒ́ux, Ilyan bi ḳinäḳ yanal moṭogo äfčibseynaḳ sa ämiren göynulxun arux cipsuna čurensa?"
Ama Isusen fərəpi šoṭoġo q̇adaġanbi pine: Vä͑n mani urufe q̇onʒ́ux baksuna tenan ava. Šoṭaynaḳ ki, Insani Ġar insanxo äfčibseynaḳ tää, šoṭoġo čarḳesṭeynaḳe hare".
Oša šorox q̇eräz sa ayizeṭun yaq̇a bafṭi.
Šorox yaq̇ taġaṭan sunṭin Isusa pine: "Hun maya taġayin, Vi bać̣anexun taġoz".
Isusen šoṭo pine: "Tülküġoyal meso, göynul purḳala q̇ušurxoyal meso. Ama Insani Ġare bul laxala gaal tenebu".
Sa ṭi͑yäminṭu Isusen pine: "Bez bać̣anexun eki". Šoṭin isä pine: "Ay Q̣onʒ́ux, za iǯaza tada, süfṭä taġaz bez bava oćalaxbaz".
Isusen šoṭo pine: "Barta ṗuriṭoġonq̇an ičoġoy ṗuriṭoġo oćalaxbi. Hun isä taki Buxaʒ́uġoy Padčaġluġa bayanba".
P̣urum q̇eräz sunṭin pine: "Ay Q̣onʒ́ux, zu Vi bać̣anexun ezġon, ama süfṭä iǯaza tada taġaz bez ḳožinṭoġoxun dirisṭoġon baz".
Ama Isusen šoṭo pine: "Xəša äšṗesṭaṭan qoš be͑ġalo Buxaʒ́uġoy Padčaġluġa yarayinš tenebsa".
