TITUS
Biblia Mcxetica
Part No. 532
Previous part

Chapter: 6 
Verse: 1  Link to sept   დასასრულსა, გალობასა შინა, მერვისათჳს, ფსალმუნი დავითისი

Verse: 2  Link to psa Link to sept   უფალო, ნუ გულისწყრომითა შენითა მამხილებ მე, ნუცა რისხვითა შენითა მსწავლი მე.

Verse: 3  Link to psa Link to sept   მიწყალე მე, უფალო, რამეთუ უძლურ ვარ; განმკურნე მე, უფალო, რამეთუ შემიძრწუნდეს ძუალნი ჩემნი.

Verse: 4  Link to psa Link to sept   და სული ჩემი შეძრწუნდა ფრიად; და შენ, უფალო, ვიდრემდის?

Verse: 5  Link to psa Link to sept   მოიქეც, უფალო, იჴსენ სული ჩემი, მაცხოვნე მე წყალობისა შენისათჳს,

Verse: 6  Link to psa Link to sept   რამეთუ არა არს, ვინ სიკუდილსა შინა მოგიჴსენოს შენ, ანუ ჯოჯოხეთს შინა ვინ აღგიაროს შენ.

Verse: 7  Link to psa Link to sept   დავშუერი მე სულთქმითა ჩემითა, დავბანო მარად ღამე ცხედარი ჩემი, ცრემლითა ჩემითა სარეცელი ჩემი დავალტვო.

Verse: 8  Link to psa Link to sept   განრისხდა გულისწყრომითა თუალი ჩემი, განვჰკფდი მე ყოველთა ზედა მტერთა ჩემთა.

Verse: 9  Link to psa Link to sept   განმეშორენით ჩემგან ყოველნი მოქმედნი უსჯულოებისანი,

Verse: 10  Link to psa Link to sept   რამეთუ შეესმა უფალსა ჴმაჲ ტირილისა ჩემისა; ისმინა უფალმან ვედრებისა ჩემისა, უფალმან ლოცვა ჩემი შეიწყნარა.

Verse: 11  Link to psa Link to sept   ჰრცხუენოდედ და შეძრწუნდედ ყოველნი მტერნი ჩემნი, მართლუკუნიქცედ და ჰრცხუენოდედ ფრიად და მსთუად. დიდება

Next part


This text is part of the TITUS edition of Biblia Mcxetica.

Copyright TITUS Project, Frankfurt a/M, 22.3.2021. No parts of this document may be republished in any form without prior permission by the copyright holder.