პირველსა წელსა ბალტასარისსა მეფისა ქალდეველთაჲსა ჩუენებაჲ იხილა დანიელ, და ხილვაჲ იგი თავისა თჳსისაჲ საწოლსა თჳსსა ზედა, და ჩუენებაჲ იგი დაწერა.
მე დანიელ ვხედევდ, და აჰა ესერა ოთხნი ქარნი ცისანი მოიწინეს ზღუასა მას დიდსა,
და ოთხნი მჴეცნი გამოვიდოდეს მიერ ზღჳთ ერთი ერთისა უმჯობჱსი ურთიერთას.
პირველი იგი ვითარცა ლომი ძუვი, და ფრთენი ესხნეს მას ვითარცა ორბისანი, და ვხედევდ მას ვიდრემდე მოეფხურნეს ფრთენი იგი მისნი, და აღიღო ქუეყანით და ფერჴთა ზედა კაცისათა დადგა, და გული კაცისაჲ მოეცა მას.
და აჰა ესერა მჴეცი მეორჱ მსგავსი დათჳსაჲ, და ერთ კერძო განდგა, და სამნი ფერცხალნი პირსა მისსა შორის კბილთა მისთა, და ეტყოდეს მას, აღდეგ და ჭამდი ჴორცსა მრავალთასა.
შემდგომად ამისა ვხედევდ, და აჰა ესერა მჴეცი სხუაჲ ვითარცა ვეფხი, და მას ედგნეს ფრთ<ე>ნი ოთხნი მფრინველისანი ზედა კერძო მისა, და ოთხნი თავნი მჴეცისანი მის, და ჴელმწიფებაჲ მოეცა მას.
და შემდგომად ამისა ვიხილე, და აჰა ესერა მჴეცი იგი მეოთხჱ საშინელი <და> ზარის-განსაჴდელი უძლიერესი პირველთა მათ; შუანი მისნი რკინისანი დიდნი. შეშჭამდა ყოველთა, და დაამწულილებდა, და ნეშტსა მას ფერჴითა თჳსითა დასთრგუნვიდა, და ესე Page of ms. J: B129r უმჯობჱს იყო ყოველთა უმეტჱს უფროჲს სხუათა მათ მჴეცთა უწინარჱს/თა მისთა, რქანი ედგნეს მას ათნი.
განვიცდიდ რქათა მათ მისთა, და აჰა ესერა რქაჲ მცირჱ სხუაჲ აღმოვიდოდა შორის მათსა, და სამნი რქანი წინაშე მი<ს>სა განიფხურნეს უწინარჱსნი მისსა, და აჰა ესერა თუალნი ვითარცა კაცისანი რქასა მას, და პირი რომელი იტყოდა დიდდიდსა, და ჰყოფდა ბრძოლასა წმიდათა მიმართ.
ვხედევდ მე ვიდრემდე საყდარნი დაედგნეს, და ძუელი იგი დღეთაჲ დაჯდა; სამოსელი მისი სპეტაკ ვითარცა თოვლი; თმაჲ თავისა მისისაჲ ვითარცა მატყლი წმიდაჲ; საყდარი მისი ვითარცა ალი ცეცხლისაჲ, ეტლის-თუალნი მისნი ცეცხლ-ებრ შემწუველ.
მდინარე ცეცხლისაჲ იძრეოდა წინაშე მისა; ათასნი ათასთანი ჰმსახურებდეს მას, და ბევრნი ბევ<რ>თანი დგეს წინაშე მის<ს>ა. სამშჯავროჲ დაეგო, და წიგნნი განეხუნეს.
ვხედევდ მაშინ ჴმისა მისგან სიტყუათაჲსა დიდდიდსა რომელსა რქაჲ იგი იტყოდა, რომელი მოიკლა მჴეცი იგი და წარწყმდა, და ჴორცნი მისნი მიეცნეს დასაწუველად ცეცხლსა.
და ნეშტთა მათ მჴეცთაჲ მთავრობაჲ გარდადგა, და სიგრძჱ ცხორებისაჲ მოეცა მათ ვიდრე ჟამადმდე.
ვხედევდ ჩუენებასა ღამისასა, და აჰა ესერა ღრუბელთა ზედა ცისათა ვითარცა ძჱ კაცისაჲ მომავალი, და ვიდრე ძუელისა მის დღეთაჲსა მოიწია, და წარდგა წინაშე მის<ს>ა.
და მას მოეცა მთავრობაჲ და პატივი და სუფევაჲ, და ყოველნი ერნი ტომნი და ენანი ჰმონებდეს მას, ჴელმწიფებაჲ მისი ჴელმწიფება საუკუნო, რომელი არა წარჴდეს, და მეუფებაჲ მისი არა განირყუნეს.
შეძრწუნდა გული ჩემი გუამსა ჩემსა, და მე დანიელს ხილვაჲ თავისა ჩემისაჲ შემაძრწუნებდა.
და მოუჴედ ერთსა მდგომარეთა მათგანსა, და განჩინებულად ვეძიებდ სწავლად მისგან ამის ყოვლისათჳს, და მითხრა მე განცხადებულად, შეტყუებაჲ Page of ms. J: B129v იგი სიტყუათაჲ/ მათ მაუწყა მე და თქუა.
ესე მჴეცნი ოთხნი ოთხნი მეფენი აღდგენ ქუეყანასა ზედა, რომელი აღიხუნენ,
და წარმოიღონ მეუფებაჲ წმიდათა მაღლისათა, და დაიპყრან იგი ვიდრე საუკუნოდ და ვიდრე საუკუნეთა საუკუნეთასა.
და ვეძიებდ გამოჭეშმარიტებულად მჴეცისა მისთჳს მეოთხისა, რამეთუ იყო იგი უმჯობჱს და საშინელად უმეტჱსად. კბილნი მისნი რკინისანი და ფრცხილნი მისნი რვალისანი, ჭამდა <და> დაამწულილებდა, <და> ნეშტსა მას ფერჴითა თჳსითა დასთრგუნვიდა.
და რქათა მათთჳს ათთა რომელნი იყვნეს თავსა მისსა <და> ერთისა მისთჳს რქისა, რომელი აღმოჴდა უკუანაჲსკნელ <და> განჰფხურნა პირველნი იგი სამნი, რომლისა იგი თუალნი და პირი იტყოდა დიდდიდსა, და ხილვაჲ მის მჴეცისაჲ უფროჲს ყოველთა მათ მჴეცთაჲ სხუათა.
ვხედევდ, და რქაჲ იგი ჰყოფდა ბრძოლასა წმიდათა თანა, და განძლიერდა მათა მიმართ,
ვიდრემდე მოვიდა ძუელი იგი დღეთაჲ, და საშჯელი მიეცა წმიდათა მაღლისათა, <და> ჟამი მოიწია, და მეფობაჲ დაიპყრეს წმიდათა.
და თქუა; მჴეცი იგი მეოთხჱ მეუფებაჲ მეოთხჱ იყოს ქუეყანასა ზედა, რომელი წარემატოს ყოველთა მეუფებათა, და შეჭამოს ყოველი ქუეყანაჲ, <და> დათრგუნოს იგი, და მოსრას.
და ათნი იგი რქანი მისნი, ათნი მეფენი <აღ>დგენ, და შემდგომად მათსა აღდგეს სხუაჲ, რომელმან გარდაჰმატოს სიბოროტითა ყოველთა უწინარჱსთა მისთა, და სამნი მეფენი დაამდაბლნეს.
და სიტყუასა მაღლისა მიმართ იტყოდის, და წმიდათა მაღლისათა ჰბრძოდის, და ჰგონებდეს ცვალებად ჟამთა და შჯულსა, და მიეცეს ჴელთა მისთა ჟამთა და ჟამთა და კერძოდ ჟამისაჲ.
და ზრახვაჲ იზრახეს და გულის-ჴმა-ყვეს, რაჲთა მთავრობაჲ Page of ms. J: B130r გარდაადგინონ განრყუნად/ და წარწყმედად ვიდრე სრულიადმდე.
და სუფევაჲ და ჴელმწიფებაჲ და სიმდიდრე მეუფებათაჲ ქუეშჱ ყოველსა ცასა მიეცა წმიდათა მაღლისათა, და სუფევაჲ მისი სუფევა საუკუნე, და ყოველნი მთავრობანი და ჴელმწიფებანი მას ჰმონებდენ, აქამომდე დასასრული სიტყუათაჲ.
მე დანიელს გულის-სიტყუანი ჩემნი უფროჲსად შემაძრწუნებდეს, და ფერი პირისა ჩემისაჲ იცვალა, და სიტყუაჲ იგი გულსა ჩემსა დამემარხა.
