და იყო ჩემდა მომართ სიტყუაჲ უფლისაჲ, და თქუა;
ძეო კაცისაო, მიიღე გოდებაჲ სორსა ზედა, და არქუ სორსა, რომელი დამკჳდრებულ არს შესავალსა ზღჳსასა, სავაჭროსა ერთასა ჭალაკთაგან მრავალთა.
ამას იტყჳს ადონაჲ უფალი სორსა, შენ სთქუ, მე შევიმოსე თავით ჩემით სიკეთჰ ჩემი;
Page of ms. J: B86r გულსა ზღჳსასა გეელიმ/ ძეთა შენთა შეგასხეს შენ სიკეთე.
ნაძჳ სანერით გეშენა შენ, პებული ფიცართაჲ საროჲსაჲ ლიბანით მოგართუეს შენ საქმედ ნავის-სახერველთა.
ბასანით გიქმნნეს შენ საჭენი შენნი, ტაძარნი შენნი ქმნნეს პილოჲს-ძუალთაგან; სახლნი სერტყოვანნი ჭალაკთაგან ქეტიმისთა.
ბისონი ეგჳპტით ჭრელებული გიქმნიეს შენ სარეცელად შემოსად შენდა დიდებაჲ, და შემკობად შენდა ჳაკინთჱ და ძოწეული ჭალაკთაგან <ე>ლისეველთა, და გექმნა სამოსელი შენი.
და მთავართა შენთაჲ, რომელნი დამკჳდრებულ იყვნეს სიდონს, და არადიელნი იყვნეს მესაჭე შენდა. ბრძენნი შენნი, სორ, რომელნი იყვნეს შენ შორის, ესენი იყვნეს მენავე შენდა.
მოხუცებულნი ბაბილონისანი და ბრძენნი მათნი, რომელნი იყვნეს შენ შორის, ესენი განაძლიერებდეს ზრახვასა შენსა, და ყოველნი ნავნი ზღჳსანი და საჭის-მხერვალნი მათნი გეყვნეს შე ნმზის-დასავალით მზის-დასავალთაჲთ.
სპარსნი და ლჳდიელნი და ლჳბიელნი იყვნეს ძალად შენდა, კაცთა მბრძოლთა ფარები და ჩაფხუტები დაჰკიდეს შორის შენსა, ამათ მოგცეს დიდებაჲ შენი.
ძენი არადიელთანი <და> ძალი შენი ზღუდეთა შენთა, მც<ვ>ელნი გოდოლთა შენთა იყვნეს, კაბარჭები მათი დაჰკიდეს მთათა შენთა გარემო; ამათ სრულ ქმნეს სიკეთჱ შენი.
კარქედონელნი ვაჭრად შენდა სიმრავლისაგან ყოვლისა ძლიერებისა შენისა. ვეცხლი და ოქროჲ და რკინაჲ და რვალი და ტყჳვი და ბრპენი მოსცეს უბანთა შენთა.
ელადაჲ და ყოვლითურთ და გარემონი, ესენი ვაჭრობდეს შენ შორის სულსა კაცთასა; ჭურჭელი რვალისაჲ მოსცეს სავაჭროსა შენსა.
სახლისაგან თერგამაჲსა ცხენები და მჴედრები მოსცეს Page of ms. J: B86v სავაჭროსა შენსა./
ძენი როდელთანი ვაჭარნი ჭალაკთაგან განამრავლებდეს სავაჭროთა შენთა შუვათაგან პილოჲსათა, და შემართუმელთა მათ მისცემდ სასყიდელსა შენსა.
კაცთა სავაჭროდ შენდა სიმრავლისაგან მწირთა შენთაჲსა, შტახსი და თითოფერი ღებილი თარშით, და ლამოთი და ქორქორი მოსცეს სავაჭროსა შენსა.
ძენი იუდაჲსნი და ისრაჱლი ესენი ვაჭარ შენდა, იფქლისა ფრდითა, ნელსაცხებელი და კასიაჲ და თაფლი რჩეული და ზეთი და რეტინჱ მოსცეს სავაჭროთა შენთა.
დამასკჱ ვაჭარ შენდა სიმრავლისაგან ძალისა შენისა, ღჳნოჲ ქელბონით და მატყლი მილეტონით და ღჳნოჲ სავაჭროთა შენთა მოსცეს.
ასაელით რკინაჲ ქმნული და ეტლის-თუალები მწირთა შორის შენთა არს.
დედანი ვაჭარ შენდა ცხენთაგან რჩეულთა ეტლებისათჳს.
არაბიაჲ, მთავარნი კედარისანი, ესენი ვაჭარ <შენდა> ჴელითა შენითა, აქლემებსა და ვერძებსა და ტარიგებსა, რომელსა გვაჭ<რ>ობდეს შენ.
ვაჭარნი საბაისანი და რაბაისანი, ესენი ვაჭარ შენდა სულნელითა რჩეულითა, და ანთრაკი კეთილი და ოქროჲ მოსცეს სავაჭროსა შენსა.
ქარრანი და ქაანანი ვაჭარ შენდა, ასურ და ქარმან, ესენი ვაჭარ შენდა.
მოაქუნდა სავაჭროჲ ჳაკინთჱ და საუნჯენი რჩეულნი შეკრულნი საგლებითა, და საროჲსა ნავებითა.
კარქედონელნი ვაჭარ შენდა, სიმრავლითა მწირთა შენთაჲთა აღივსე; და დაჰმძიმდი ფრიად გულსა ზღჳსასა.
წყალთა მრავალთა მოჰყვანდი შენ საჭეთა-მხერვალთა შენთა; ქარმან სამხრისამან შეგმურსა შენ გულსა ზღჳსასა.
რომლისა ძალი და სასყიდელი Page of ms. J: B87r შენი და / მწირთა შენთაჲ, და საჭით-მხერვალნი შენნი, და ნავის-მთავარნი მოღუაწენი შენნი, თანა-მზრახვალნი შენნი და მწირნი შენნი, და მენავენი შენნი მწირთაგან შენთა, და ყოველნი მბრძოლნი კაცნი შენნი შენ შორის, და ყოველი კრებული შენი შროის შენსა დაეცნენ გულსა ზღჳსასა დღესა მას დაცემისა შენისასა.
ღაღადებისა-ებრ ჴმისა შენისა მენავეთ-მოღუაწეთა შენთა შეეშინა;
და გარდამოჴდენ ნავით მათით ყოველნი საჭით-მხერვალნი და მას შინა მსხდომნი, და ყოველნი <ნავთა> მხერვალნი ზღჳსანი, და ქუეყანასა დადგენ,
ღაღად-ყონ ჴმითა დიდითა შენ ზედა. და ვალალ<ა>ებდენ მწარედ, და გარდაისხან მიწაჲ თავთა მათთა, და ნაცარი დაირიცონ.
და აღიღონ ძეთა მათთა გოდებაჲ, გოდებაჲ სორსა.
რაოდენ ანუ რაჲ ჰპოვე სასყიდელი ზღჳსაგან, აღავსენ ნათესავნი სიმრავლისაგან შენისა, და მწირთაგან შენთა განამდიდრენ ყოველნი მეფენი ქუეყანისანი.
და აწ შეიმუსრე ზღუასა შინა, სიღრმესა წყლისასა მწირი შენი, და ყოველი კრებული შენი, და ყოველნივე შენ შორის დაეცნეს, და ყოველნივე საჭით-მხერვალნი შენნი.
დამკჳდრებულნი ჭალაკთანი შეწუხნეს შენ ზედა, და მეფენი მათნი განკრთომით განჰკრთეს, განუკჳრდა და ცრემლოვოდეს პირნი მათნი.
ვაჭართა წარმართთაგანთა დაისტჳნეს შენ ზედა, წარსაწყმედელ იქმენ, და არღარა იყო უკუნისამდე.,
