TITUS
Vetus Testamentum iberice: codd. Oshki & Jerusalem
Part No. 95
Previous part

Chapter: 5  
Verse: 1   Link to mcatLink to sept   ხადოდე-ღა შენ, უკუეთუ ვინმე გერჩდეს, გინა თუ ანგელოზთაგანი წმიდათაჲ იხილო.

Verse: 2   Link to mcatLink to sept   
და რამეთუ უგუნური იგი რისხვამან მოკლის, ხოლო შეცთომილი იგი მოაკუდინის შურმან.

Verse: 3   Link to mcatLink to sept   
მე ვიხილენ უგუნურნი, რომელთა ძირნი დაებნეს, არამედ მეყსეულად შეიჭამა როჭიკი მათი.

Verse: 4   Link to mcatLink to sept   
განეშორნეს ძირნი მათნი ცხორებისაგან და იქენჯნებოდეს Page of ms. O: 153v  იგინი კართა ზედა უნაკლულევანჱსთასა და არავინ იყოს განმრინებელ მათა.

Verse: 5   Link to mcatLink to sept   
რამეთუ, რაჲ-იგი მათ შეიკრიბეს, მართალთა შეჭამონ და იგინი ბოროტისაგან ვერ განერნენ, გამოიწოვენ ძალი მათი.

Verse: 6   Link to mcatLink to sept   
რამეთუ არა გამოჴდის ქუეყანით ბნელი, არცა მთათაგან აღმოსცენდის სალმობაჲ,

Verse: 7   Link to mcatLink to sept   
არამედ კაცი იშვების სალმობად, მართუენი ყანჩისანი მაღალსა ფრინვენ.

Verse: 8   Link to mcatLink to sept   
არა ეგრე, არამედ მე უფალსა ღმერთსა ვევედრებოდე და უფალსა ღმერთსა ყოვლისა მპყრობელსა ვხადოდი,

Verse: 9   Link to mcatLink to sept   
რომელმან ქმნნა დიდ-დიდნი და გამოუკლეველნი დიდებულნი და საკჳრველნი, რომელთაჲ არა არს რიცხჳ;

Verse: 10   Link to sept   
რომელმან მოსცის წჳმაჲ ქუეყანასა და მოავლინის წყალი ცასა ქუეშე;

Verse: 11   Link to mcatLink to sept   
რომელმან ქმნნის მდაბალნი მაღლად და წარწყმედულნი აღმართნის,

Verse: 12   Link to mcatLink to sept   
დააგნის ზრახვანი წარმართთანი და არა ქმნის ჴელთა მათთა ჭეშმარიტებაჲ.

Verse: 13   Link to mcatLink to sept   
რამეთუ წარეწიის ბრძენთა გონიერებითა და ზრახვა იგი მრავალმთხზველთა განაქარვის.

Verse: 14   Link to mcatLink to sept   
დღისი შეემთხჳოს მათ ბნელი და შუა სამხრის ეჩქუეფებოდიან, ვითარცა შუა ღამეს

Verse: 15   Link to mcatLink to sept   
წარწყმდედ იგინი ბრძოლასა შინა, უძლური იგი განერეს ჴელისაგან ძლიერისა.

Verse: 16   Link to mcatLink to sept   
იყავნ უძლურისაჲ მის სასოებაჲ და ცრუისაჲ მის პირი დაიყავნ.

Verse: 17   Link to mcatLink to sept   
ხოლო ნეტარ არს კაცი, რომელსა ამხილა უფალმან; სწავლასა ყოვლისა მპყრობელისასა ნუ განეშორები,

Verse: 18   Link to mcatLink to sept   
Page of ms. O: 154r  რამეთუ მან ამხილის და მერმე კუალად მოაგის; დასცა და ჴელთა მისთა განკურნეს.

Verse: 19   Link to mcatLink to sept   
ექუს გზის ბოროტისაგან გიჴსნეს შენ და მეშჳდესა მას არა შეგეხოს შენ ბოროტი.

Verse: 20   Link to mcatLink to sept   
სიყმილსაგან და სიკუდილისა გიჴსნეს შენ, ბრძოლასა შინა ჴელისაგან მახჳლისა განგარინოს შენ.

Verse: 21   Link to mcatLink to sept   
გუემისაგან ენისა დაგიფაროს შენ და არა გეშინოდის შენ ბოროტისაგან მომავალისა.

Verse: 22   Link to mcatLink to sept   
ცრუთა და უსჯულოთა ეკიცხევდე და მჴეცთაგან ველურთა არა გეშინოდის.

Verse: 23   Link to mcatLink to sept   
რამეთუ მჴეცნი ველურნი დაგიმშჳდნენ შენ.

Verse: 24   Link to mcatLink to sept   
მაშინ სცნა, რამეთუ მოღუაწება არს სახლსა შენსა და წესმან სახლისა საყოფლისა შენისამან არა ცოდოს.

Verse: 25   Link to mcatLink to sept   
მაშინ სცნა, რამეთუ მრავალ არს ნათესავი შენი და შვილნი შენნი, ვითარცა ყოველი მწუანვილი ველისაჲ.

Verse: 26   Link to mcatLink to sept   
და მიხჳდე საფლავად, ვითარცა იფქლი ჟამისაჲ ჟამსა თჳსსა მომკილი, ანუ ვითარცა ზჳნი კალოჲსაჲ ჟამად-ჟამად შეკრებული.

Verse: 27   Link to mcatLink to sept   
აჰა-ესერა ესრჱთ გამოვიკულიეთ და ესე არს, რომელი გუასმიეს, ხოლო შენ ცან თავისაჲ შენისაჲ, რაჲ შენ გიქმნიეს.

Next part



This text is part of the TITUS edition of Vetus Testamentum iberice: codd. Oshki & Jerusalem.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.