და შეიწყალოს უფალმან იაკობი, და გამოარჩიოს მერმე ისრაჱლი. და განისუენებდენ ქუეყანასა მათსა, და ქუეყანისა საზღვარნი შეეძინნენ მათ, და შეერთნენ სახლსა იაკობისსა.
და მოიყვანნენ იგინი წარმართთა, და შეიყვანნენ იგინი ადგილსავე თჳსსა. დაიმკჳდრონ იგი და განმრავლდენ ქუეყანასა ზედა ღმრთისასა მონებად და მჴევლებად. და იყვნენ წარტ<ყ>უენულ წარმტყუენველნი მათნი. და ეუფლნენ მათ, რომელნი იგი უფლებენ მათ ზედა.
და იყოს მას დღესა შინა განგისუენოს შენ უფალმან, სალმობისაგან შენისა, და გულის-წყრომისაგან და მონებისაგან ფიცხლისა, რომელსა ჰმონებთ მათ.
მოიღო გოდებაჲ ესე მეფესა ზედა ბაბილონისასა. და სთქუა მას დღესა შინა ვითარმედ დაცხრომილ არს მიმჴდელი იგი, და დადუმებულ არს მასწრაფებელი იგი.
Page of ms. J: A47v შემუსრა უფალმან უღელი იგი ცოდვილთაჲ,/ და უღელი იგი მთავართაჲ, და მოსრნეს ნათესავნი წყლულებითა უკურნებელითა,
მოსრვად წარმართთა გულის-წყრომითა, და წყლვად და არა ერიდა.
განისუენა ქუეყანამან ყოველმან სასოებით და ღაღადებს სიხარულით.
და ხენი ლიბანისანი იხარებდეს შენდამი, და ნაძუთა ლიბანისათა გრქუან შენ, ვინაჲთგან შენ დაიძინე, არა ვინ აღმოვიდეს კაფად ჩუენდა.
ჯოჯოხეთი ქუეშჱ კერძო განმწარდა შემთხუევასა შენსა. მო-რაჲ-ხჳდოდე შენ, აღადგინნა შენ ზედა გმირნი, რომელნი ჰმთავრობდეს ქუეყანასა, რომელნი აღდგენ საყდართაგან მათთა ყოველნი მეფენი წარმართთანი,
ყოველთა მოგიგონ და გრქუან შენ, და შენცა შე-ვე-იპყარ ვითარცა ჩუენ, და ჩუენ თანა შერაცხილ ხარ.
შთაჴდა ჯოჯოხეთა დიდებაჲ შენი და მრავალი მხიარულებაჲ შენი. ქუეშჱ შენსა დაგირეცონ დალპოლვაჲ, და დასაფარველ შენდა მატლი.
ვითარ გარდამოვარდა ზეცით მთიები იგი, რომელი განთიად აღმოვალს, შეიმუსრა ქუეყანასა რომელი წარავლინებდა ყოველთა მიმართ წარმართთა.
შენ სთქუ გონებასა შენსა, ზეცად აღვიდე, და ზედა ვარსკულავთა ცისათა: და დავიდგნე საყდარნი ჩემნი, და დავჯდე მთასა მაღალსა, მთათა ზედა მაღალთა ჩრდილოჲთ.
აღვიდე ზედა ღრუბელთა და ვიყო მე მსგავს მაღლისა,
ხოლო აწ ჯოჯოხეთამდე შთაჰჴდე საფუძველთა ქუეყანისათა .
რომელთა გიცოდეს შენ უკჳრდეს შენ ზედა და თქუან: ესე იგი კაცი არს რომელი განარისხებდა ქუეყანასა, რომელი აღსძრვიდა მეფეთა:
რომელმან დადვა ყოველი სოფელი ოჴრად, და ქალაქნი მისნი დაარღჳნა. წარტყუენულნი იგი არა განუტევნა სახიდ მათა,
ყოველთა მეფეთა წარმართთა Page of ms. J: A48r დაიძინეს პატივით კაცი სახლსა შინა თჳსსა./
ხოლო შენ განჰვარდე მთათა ზედა ვითარცა მკუდარი საძაგელი, მრავალთა თანა მომკუდართა, განგუმერილთა თანა მახჳლითა შთამავალთა ჯოჯოხეთა, ვითარცა სამოსელი შესუარული სისხლითა არა იყოს წმიდა <. . .>.
ქუეყანაჲ ჩემი წარსწყმიდე, და ერი ჩემი მოჰსარ, არა დაადგრე უკუნისამდე ჭამთა, ნათესა<ვ>ო ბოროტო.
განმზადენ შვილნი შენნი კლვად ცოდვისათჳს მამისა შენისა, რაჲთა არა აღდგენ და დაიმკჳდრონ ქუეყანაჲ, და აღავსონ ქუეყანაჲ ბრძოლითა.
და აღვდგე მათ ზედა, იტყჳს უფალი საბაოთ. და წარვწყმიდო სახ<ე>ლი მისი ნეშტი და ნათესავი. ამას იტყჳს უფალი საბაოთ:
დავდვა ბაბილონი ოჴრად, რაჲთა დაიმკჳდრონ მას შინა გრძღაბთა და იყოს არა რაჲ: და დავდვა იგი თიჴისა უყად და წარსაწყმედელად.
ამას იტყჳს უფალი საბაოთ: ვითარცა ვიტყოდე ეგრეცა იყოს: და ვითარცა მიზრახავს ეგრეცა ეგოს:
წარწყმედად ასურასტანელნი იგი ქუეყანით ჩემით, და მთათაგან ჩემთა, და იყვნენ დასათრგუნველ: და მოიღოს მათგან უღელი მათი, და საჴივი მათი ქედთაგან მათთა მოეღოს.
ესე ზრახვაჲ არს რომელ უზრახავს უფალსა ყოველსა ზედა სოფელსა. და ესე არს ჴელი მაღალი ყოველთა ზედა წარმართთა.
რამეთუ რაჲ იგი ღმერთსა წმიდასა უზრახავს ვინ განაქარვოს. და ჴელი მისი მაღალი ვინ მოაქციოს.
ხილვაჲ მეექუსჱ ფილისტიმელთა ზედა. წელსა მას, რომელსა მოკუდა აქაზ მეფჱ, იყო სიტყუაჲ ესე.
ნუ გიხარინ ყოველთა უცხოთესლთა, რამეთუ შეიმუსრა უღელი მტანჯველისა მის თქუენისაჲ. რამეთუ თესლისაგან გუელთაჲსა გამოჴდენ ნაშობნი ასპიტთანი. და ნაშობთა მათთაგან, გამოვიდენ გუელნი Page of ms. J: A48v მფრინვალენი.
დასრულდენ გლახაკნი უფლისა მიერ, და/ დავრდომილნი კაცნი მშჳდობით განისუენებდენ. ხოლო მოსრას სიყმილმან ნათესავი შენი, და ნაშტი შენი მოესრას.
ღაღადებდით ბჭენი ქალაქისანი, ვალალაებდით ქალაქნი შეძრწუნებულნი, დაწესებულთა შორის მისთა.
და რაჲ მიუგონ მეფეთა წარმართთა, რამეთუ უფალმან დააფუძნა სიონი, და მის მიერ ცხოვნდენ მდაბალნი ერისანი.
