და ესრჱთ დაამტკიცეს საჴსენებელად უვასტინესთჳს, ვითარ-იგი უყო ასუერ მეფესა.
და მაშინღა აზრახეს მონათა მეფესა: ვიძინეთ ქალწულნი ქმნულკეთილნი.
Page of ms. O: 498r და მიუთუალნეთ იგინი ზედამდგომელსა საჭურისსა, რომელ არს მცველი დედათაჲ.
და მათგანნი კაცნი, რომელ გთნდენ შენ, მეფესა, დაადგინე იგი უვასტინეს წილ. და ეგრეცა ყვეს, ვითარცა-იგი აღუთქუეს.
იყო კაცი ვინმე ჰურიაჲ სუს ქალაქსა, რომელსა ერქუა სახელი მარდოქე, ძჱ იარისი, ძისწული სემიაჲსი, რომელი იყო ძჱ კესაჲსი, ტომისაგან ბენიამენისი
და მას განეზარდა სარწმუნოებასა ზედა ესთერი, რამეთუ ასული იყო იგი მამისძმისა მისისაჲ, და ყრმაჲ იგი კეთილ იყო ქმნულებითა ფრიად და შუენიერ პირითა.
და შეიპყრეს და შეიყვანეს იგი ტაძარსა მას მეფისასა. და ვითარ იხილა იგი გეგეოს საჭურისმან, მცველმან დედათამან, ქალი იგი დასჯერდა უფროჲს სხუათა დედათაჲსა. და პოვა ესთერ მადლი და წყალობაჲ წინაშე მისსა, და იღუაწა მისი უფროჲს სხუათა მათ დედათაჲსა და შეუდგინნა მას შჳდნი ქალწულნი მსახურად.
და ვითარ შეიყვანეს ესთერ წინაშე მეფისა და შესთნდა იგი მას ფრიად. მწუხრი შეიყვანიან და დილეულ გამოუტევიან. და რაჟამს განიცადნა მეფემან ყოველნი იგი ქალწულნი, უკეთჱს გამოუჩნდა ესთერი და პოვა მის წინაშე მადლი და წყალობაჲ და დაადგინა შარავანდნი სადედოფლონი თავსა მისსა.
და ყო მეფემან ქორწილი ესთერისი განცხადებულად, ხოლო სხუათა მათ ბრძანა განტევებაჲ სოფლად თჳსა.
