Page of ms. O: 498v და იყო ამის სიტყჳსა შემდგომად განადიდა ასურ მეფემან ჰამანი, ამადათომის ძჱ ბოგეანი და აღხუმად სცნა და დასხმად სასთაულნი მისთჳს უფროჲს ზეშთა ყოველთა მეგობართა მისთა.
რამეთუ მოდრკებოდეს ყოველნი და თაყუანის-სცემდეს ქუეყანასა და ვითარ ყოველნი თაყუანისსცემდეს მას ბრძანებითა მეფისაჲთა, ხოლო მარდოქე არასადა თაყუანის-სცა მას.
და ვითარ იხილეს მონათა მეფისათა, რამეთუ მარდოქე არა თაყუანის-სცა ჰამანსა, ჰრქუეს მონათა მეფისათა მარდოქეს: რად ურჩ ხარ შენ მეფისა და არა თაყუანის-ეცი ჰამანსა?
მიუგო მან და ჰრქუა, ვითარმედ: მოღმრთე ვარ. და უთხრეს ეგრეთ მისი ჰამანსა.
და ვითარ აგრძნა მისი ჰამანმან, განრისხნა მარდოქესთჳს და რისხვით აღატყდა მისთჳს.
და ჟამსა ეძიებდა, რაჲთამცა მოკლა მარდოქე და ყოველი ერი მისი ერთსა დღესა. ეშურებოდა ჰამანი და უთქუმიდა მას გულისწყრომითა, რამეთუ წუხნ და ეკდემებინ, რაჟამს იქცევინ იგი წინაშე თუალთა მისთა, და გულითა ზაკულითა აზრახებდა მეფესა ძჳრსა ისრაჱლისათჳს.
და ესრე ეტყოდა ჰამანი მეფესა: რამეთუ აღრეულ არს ერი ესე ყოველსა ადგილსა სამეუფოსა, ერი მჴდომი და ურჩი არს და სხუაჲ შჯული აქუს, ხოლო შჯულსა შენსა, მეფე, არა ერჩიან. უწყებულ არს ყოველსა თესლებსა უკეთურებაჲ მათი და ბრძანებაჲ შენი შეურაცხ-უყოფიეს და დამცირება არს Page of ms. O: 499r ესე შენისა დიდებისა.
უკუეთუ ჯერ-გიჩნდეს შენ, მეფესა, და გთნდეს სამართალი ესე გულსა შენსა, მომეც ჴელთა ჩემთა ერი ესე წარსაწყმედელად, და მე დაგიწერო და შევსძინო საფასესა შენსა ბევრი ფასი ჩემი*.
და წარიჴადა მეფემან ბეჭედი ჴელისა თჳსისაგან და მისცა ჰამანსა და ჰრქუა: მიწერე ყოველსა ქალაქსა და სოფლებსა, და დაჰბეჭდე ბეჭდითა ამით სამეუფოჲთა და არავინ არს, რომელმან გარე-მოაქციოს ბეჭედი ეგე.
მაშინ ჰრქუა მას მეფემან: ფასი შენი შენ გეყავნ, ხოლო ნათესავი ეგე წააგე, ვითარცა შენ გინებს. (11) და შევიდა ჰამანი კერპთა მისთა, რაჲთამცა კერპთაგან ცნა დღჱ იგი სიკუდილისა მათისაჲ. და აღმოუჴდა წილი მეათცამეტესა დღესა თუესა იგრიკისასა და ვარდობისასა მოსრვაჲ ყოველთა ჰურიათაჲ წულითგან ვიდრე ქალადმდე და ყრმანი მათნი მიმოდატაცებად.
იწრაფა და მიმოგანსცა დიასპანებითა, რომელ დაეწერა წიგნები იგი ბრძანებული: მეფჱ დიდი ასუეროს ყოველთა ჰინდოეთითგან ეთიოპედმდე ას ოცდაშჳდთა ჴელმწიფეთა მთავართა და ჴრმლოსანთა, რომელ-ესე მივწერე:
ფრიად განძლიერებულ არს ნათესავი ესე და ყოვლად დაუპყრიეს ქუეყანაჲ. ხოლო მე გან-რაჲ-ვიზრახე არა ამბოხებით ჴელმწიფებაჲ იგი განცხადებაჲ, არამედ დაყუდებით და ნელად. და ეგრეთ Page of ms. O: 499v აღასრულეთ ბრძანებული ესე განუმხილებელად ყოლადვე, და მაშინ განგებულად სცხონდებოდით და მშჳდობით იყოს სოფელი ჩუენი, და შესაძინელიცა ჩუენი ჩანდეს და მისაცემელიცა სრულიად, და განეგოს ცხორებაჲ კაცთაჲ და სასურველ იყოს მშჳდობაჲ.
ვითარცა ვჰკითხე მზრახვალთა მათ ჩემთა, ესე ესრეთ განეგებოდა და ვითარ-იგი მოცემულ არს ჩუენდა სიბრძნე და გონიერებაჲ გარდაუცვალებელი და მტკიცედ სარწმუნოებაჲ და მეორედ უფლებისა ჩუენისა ყოფაჲ განგრძობილად,
გჳჩუენა ჩუენ ჰამანმან და მწირობაჲ მაგის ტომისაჲ ყოველსა ქუეყანასა, რამეთუ შერეულ არს საძაგელი და ბილწი ეგე ერი, და შჯულსა ზედაცა მჴდომ არიან ყოვლისა თესლებისა. მაგის გამოცა-მე ვითა მიმოდასაყოფელ იქმნნეს მარადის და საბრძანებელ და ამის გამოცა მეფესა ვერვის დაემორჩილნეს და განიბნია მიმო და ნათესავი ესე.
რამეთუ მჴდომ არიან მარადის და ოდესვე შჯულითა მათითა მბრძოლ არიან კაცთა და უცხოქმნულ არიან, და ვერ ცნიან ჩუენი იგი ბრძანებაჲ და მარადის იქმან ძჳრსა, და არასადა ნებასა მორჩილ არიან ჩუენსა ჴელმწიფებასა.
აწ გჳბრძანებიეს თქუენდა მომართ ესე უწყებაჲ და მოგჳწერია წიგნი ჰამანისაგან, რომელ განვამტკიცე წი/გნითა Page of ms. O: 500r მეორე მამაჲ ჩუენი ჰამანი ყოლად აფხურად და წარწყმედაჲ მათი ცოლით, შვილითურთ მახჳლითა მტერისაჲთა განჩინებულად და უგრძნულად მეათურამეტესა დღესა თუე ადარი, რომელ ითქუმის იგრიკისად,
მოსრვად ყოველთა ჰურიათა და წარმართთა და მოტაცებაჲ ყრმათა მათთა, რომელ-იგი არიან ძუელით უჯერონი, არამედ დღეს ერთად შევიდენ ჯოჯოხეთა. მიერითგან კეთილად განეგოს და არა შეგუემთხჳოს ჩუენ ღუაწლი.
და ესერა სუს შინა დაიდვა ეგეთივე ბრძანებაჲ. მარდოქე ცნა ყოველი ესე საქმჱ, და თჳთ ქალაქიცა სუსე შეძრწუნდა საქმისა მისთჳს. და იყო ჰურიათა ტირილი დიდი და განმწარებაჲ ყოველსა ქუეყანასა.
