სული უფლისაჲ ჩემ ზედა: ამისთჳსცა მცხო მე უფალმან მახარებელად გლახაკთა. მომავლინა მე განკურნებად შემუსრვილთა გულითა, ქადაგებად ტყუეთა Page of ms. J: A93v განტევებასა, და ბრმათა ახილვად:/
წოდებად წელიწადი უფლისაჲ სათნოჲ. და დღჱ იგი კუალად-გებისა ღმრთისა ჩუენისაჲ, ნუგეშინის-ცემად ყოველთა მგლოვარეთა.
მოცემად მგლოვარეთა სიონისათა დიდებაჲ მათი. ნაცრისა მის წილ საცხებელი სიხარულისაჲ მგლოვარეთა მათ, და სამკაული დიდებისაჲ სულისა მის წილ მოწყინებისაჲსა. და ეწოდოს მათ ნათესავ სიმართლისა, და ნერგ უფლისა სადიდებელად,
და აღეშჱნნენ უდაბნონი საუკუნითგანნი, <და> პირველითგან მოოჴრებულნი იგი აღემართნენ, და განახლდენ ქალაქნი ოჴერნი მოოჴრებულნი ნათესავითი ნათესავითგან.
და მოვიდენ უცხოთა ნაშობნი მწყსად ცხოვართა შენთა, და უცხოთესლნი მჴნველად და ვენაჴის-მოქმედად თქუენდა.
ხოლო თქუენ მღდელ უფლისა გეწოდოს, და მსახურ ღმრთისა თქუენისა გერქუას თქუენ. ძალსა წარმართთასა შჭამდეთ, და სიმდიდრესა მათსა ზედა საკჳრველ იყვნეთ.
ამისთჳსცა ქუეყანაჲ მათი მეორედ დაიმკჳდრონ, და სიხარული საუკუნჱ თავსა ზედა მათსა.
რამეთუ მე ვარ უფალი, რომელსა მიყუარს სიმართლჱ, და მოვიძულე ტაცებაჲ სიცრუვისაჲ, და მივსცე ნაშრომი იგი მათი მართალთა, და აღთქუმაჲ საუკუნოჲ აღუთქუა მათ.
და საცნაურ იყოს წარმართთა შორის ნათესავი მათი, და ნაშობნი მათნი შორის ერთა. ყოველმან რომელმან იხილნეს, იცნნეს იგინი, რამეთუ ესე არიან ნათესავნი კაცთანი კურთხეულნი ღმრთისა მიერ.
და სიხარულით იხარებდენ უფლისა მიმართ. იხარებდინ სული ჩემი უფლისა მიმართ, რამეთუ შემმოსა მე სამოსელი ცხორებისაჲ, და სამკაული სიხარულისაჲ: ვითარცა სიძესა დამადგა მე გჳრგჳნი, და ვითარცა სძალი შემამკო მე სამკაულითა.
და ვითარცა ქუეყანაჲ, რომელმან აღაორძინის ყუავილი მისი, და ვითარცა მტილმან თესული თჳსი აღმოაცენის, ეგრეთ გამოაბრწყინოს უფალმან სიმართლჱ, და მხიარულებაჲ წინაშე ყოველთა თესლთა. ( 94)
