ესრეთ იტყჳს უფალი: ცაჲ საყდარი ჩემი არს, და ქუეყანაჲ კუარცხლბერკი ფერჴთა ჩემთა: რაბამი სახლი მიშჱნოთ მე, თქუა უფალმან, ანუ რაჲ მე ადგილი იყოს განსუენებელისა მის ჩემისაჲ.
რამეთუ ესე ყოველი შექმნა ჴელმან ჩემმან, და ჩემი არს ესე ყოველი, თქუა უფალმან. და მე ვის მე მივხედო, არამედ მდაბალსა მას და მყუდროსა, და რომელი ძრწის სიტყუათათჳს ჩემთა.
ხოლო უშჯულოჲ იგი რომელი შესწირვიდეს ჩემდა ზუარაკსა მსხუერპლად, ეგრეთ არს ჩემდა ვითარცა ვინ ჰგუემნ კაცსა. და რომელი იგი შესწირვიდეს ცხოვარსა ეგრე იყოს, ვითარცა რომელი იგი მოჰკლავნ ძაღლსა. და რომელსა მოაქუნდეს სამინდოჲ, ეგრე იყოს ვითარცა ვინ დასთხიის სისხლი ღორისაჲ, და რომელმან დაასხას საკუმეველი საჴსენებელად, იყოს იგი ვითარცა მგმობარი. რამეთუ მათ გამოირჩინეს გზანი მათნი, და საძაგელებანი მათნი, და იგი ინება სულმან მათმან.
და მე გამოვარჩინე საკიცხევანი მათნი, და ცოდვაჲ მათი მივაგო მათ, რამეთუ უწოდე მათ და არა ისმინეს ჩემი, <. . .> და ქმნეს ბოროტი წინაშე ჩემსა, და რაჲ იგი არა მინდა გამოირჩიეს მათ.
აწ ისმინეთ სიტყუაჲ უფლისაჲ, რომელნი სძრწით სიტყუათა მისთათჳს. არქუთ ძმად თჳსა მოძულეთა მათ თქუენთა, და რომელთა შეურაცხ-უყოფიედ თქუენ, რაჲთა სახელი უფლისაჲ იდიდებოდის, და განცხადნეს სიხარულითა იჱრუსალემს შინა. თქუენ გიხაროდის და მათ ჰრცხუენოდის.
ჴმაჲ ღაღადებისაჲ ქალაქით გამო, და ჴმაჲ ტაძრით გამო, ჴმაჲ უფლისაჲ Page of ms. J: A97v კუალად-საგებელი: მიაგოს მისაგებელი მტერთა მისთა./
ვიდრე არღა მუცელქუმულსა მას ეშვას, და ვიდრე არღა მოწევნულ იყვნეს სალმობანი შობისანი, განერა და შვა წულ ყრმა.
ვის ესმა, ანუ ვინ იხილა ესე-ვითარი საკჳრველებაჲ, ვითარმედ მიუდგა ქუეყანაჲ ერთსა შინა დღესა, და შვა ნათესავი ერთი მრგულიად. რამეთუ მიუდგა, და შვა სიონმან ყრმანი თჳსნი.
ხოლო მე მივეც სასოებაჲ ესე-ვითარი, და შენ არა მომიჴსენე მე, თქუა უფალმან. ანუ არა მშობელი იგი და ბერწი მე შევქმენ.
გიხაროდენ ერთბამად იჱრუსალემ, და შეკერბით ყოველნივე მოყუარენი მისნი მას შინა, და იხარებდეთ მის თანა სიხარულითა ყოველნივე, რომელნი ეგლოვდეს მას,
რაჲთა სწოვდეთ და განსძღეთ ძუძუთაგან ნუგეშინის-ცემისა მისისათა, რაჲთა მაძღრივ იშუებდეთ შემოსლვისაგან დიდებისა მისისა.
რამეთუ ესრჱთ იტყჳს უფალი, აჰა ესერა მე მოვაქციო მათა ვითარცა მდინარჱ მშჳდობაჲ, და ვითარცა ღუარსა მოაქუნდეს დიდებაჲ წარმართთაჲ. ყრმანი მათნი მჴრითა მოაქუნდენ, და მუჴლთა მათთა ზედა ნუგეშინის-ცემულ იყვნენ.
ვითარცა დედაჲ რაჲ ნუგეშინის-სცემნ, ეგრე ნუგეშინის-გცე თქუენ და იჱრუსალემს ნუგეშინის-ცემულ იქმნნეთ.
და იხილოთ, და უხაროდის გულთა თქუენთა, და ძუალნი თქუენნი ვითარცა მწუანვილნი აღმოსცენდენ, და გამოეცხადოს ჴელი უფლისაჲ მოშიშთა მისთა, და უთქუმიდეს ურჩთა მათ.
რამეთუ აჰა ესერა უფალი ვითარცა ცეცხლი მოიწიოს, და ვითარცა ნიავქარი მძაფრი ეტლები მისი, მიგებად გულის-წყრომით შურის-გებაჲ მისი, და შეურაცხებაჲ თჳსი ალითა ცეცხლისაჲთა .
რამეთუ ცეცხლითა მით უფლისაჲთა ისაჯოს ყოველი ქუეყანაჲ, და მახჳლითა მისითა ყოველი ჴორციელი, რამეთუ მრავალნი წყლულნი იყვნენ უფლისა მიერ.
ხოლო რომელნი განმართლდებოდეს, და განწმიდნებოდეს Page of ms. J: A98r მტილებსა შინა./ და კართა წინაშე ჭამდეს ჴორცსა ღორისასა, და საძაგელებანი იგი და თაგჳ ერთბამად მოიჴოცნენ, იტყჳს უფალი.
რამეთუ მე საქმეთა მათთათჳს და ზრახვათა მათთათჳს მოვალ შეკრებად ყოველთა ნათესავთა და ენათა. მოვიდენ და იხილონ დიდებაჲ ჩემი.
და დაუტეო მათ თანა სასწაული, და განვავლინნე მათგანნი ჴსნილნი წარმართთა მიმართ თარშიდ, და ფუდდ, და ლუდდ, და მოსოქდ, და თობელდ, და ელადად <და> ჭალაკთა შორიელთა, რომელთა არა ასმიეს სახელი ჩემი, და არცა უხილავს დიდებაჲ ჩემი, და მიუთხრობდენ დიდებასა ჩემსა წარმართთა შორის.
და მოიყვანნენ ძმანი თქუენნი ყოველთაგან ნათესავთა ძღუნად უფლისა ცხენებითა და ეტლებითა, კარვებითა და ჯორებითა და საგრილობელითა წმიდასა ქალაქსა იჱრუსალემს, თქუა უფალმან, ვითარცა იგი შესწირვიდეს ძენი ისრაჱლისანი მსხუერპლებსა მათსა ჩემდამო გალობითა ტაძარსა შინა უფლისასა.
და მათგანნი მო<ვ>იყვანნე მღდელად და ლევიტელად, იტყჳს უფალი.
რამეთუ ვითარცა იგი ცაჲ ახალი და ქუეყანაჲ ახალი, რომელი ვქმნე მე, რაჲთა ეგოს წინაშე ჩემსა: ამას იტყჳს უფალი, ეგრჱთ ეგოს ნათესავი თქუენი, და სახელი თქუენი.
და იყოს თთუჱ თთუეთაგან, და შაბათი შაბათისა გან: და მოვიდეს ყოველი ჴორციელი თაყუანის-ცემად წინაშე ჩემსა იჱრუსალემდ, თქუა უფალმან.
და განვიდენ და იხილონ ძუალები იგი კაცთაჲ მათ გარდამავალთაჲ ჩემდა მომართ, რამეთუ მატლი მათი არა დაკუდეს, და ცეცხლი მათი არა დაშრტეს, და იყვნენ იგინი სახილველად ყოვლისა ჴორციელისა . . .
