და იყო სიტყუაჲ უფლისაჲ იონაჲსა მიმართ ძისა ამათისა, და ჰრქუა;
აღდეგ და წარვედ შენ ნინევედ ქალაქად დიდად, და ქადაგებდ მას შინა, რამეთუ აღმაღლდა და მოიწევის ღაღადებაჲ უკეთურებისა მისისაჲ ჩემდამო.
და აღდგა იონა სივლტოლად და წარსლვად თარშიდ პირისაგან უფლისა. და შთავიდა იოპედ, და პოვა ნავი მიმავალი თარშიდ, და მისცა სანავჱ მისი, და შევიდა იგი მას წარსლვად მათ თანა თარშიდ პირისაგან უფლისა.
და უფალმან აღადგინა ქარი დიდი ზღუასა ზედა, და იყო ღელვაჲ დიდი ზღუასა შინა, და ნავი Page of ms. J: A2r იგი მიახლებულ იყო შემუსრვად.
და შეეშინა მე/ნავეთა მათ, და ღაღადებდა კაცად-კაცადი ღმრთისა მიმართ თჳსისა, და გარდაღურიდეს ჭურჭელსა ნავით ზღუად, რაჲთა აღუმცირონ მათ <გან>, ხოლო იონა შთავიდა უბესა მის ნავისასა, და ეძინა, და ხურინვიდა.
<და> მოუჴდა <მას> ნავის-მხერვალი იგი და ჰრქუა მას; რაჲსა ხურინავ შენ, აღდეგ და ხადოდე ღმერთსა შენსა, გჳჴსნნეს ხოლო თუ ღმერთმან, და არა წარვწყმდეთ.
და ჰრქუა კაცად-კაცაღმან მოყუასსა თჳსსა, მოვედით და განვიგდოთ წილი, და ვცნათ რაჲსათჳს არს ბოროტი ესე ჩუენ ზედა, და განაგდეს წილი, და აღმოუჴდა წილი იგი იონაჲს
და ჰრქუეს მას, მითხარ ჩუენ, რაჲ არს საქმჱ შენი, და ვინაჲ მოხუალ შენ, ანა რომლისა სოფლისაჲ <ანუ რომლისა ერისაჲ> ხარი შენ.
და ჰრქუა მათ იონა, მონაჲ უფლისაჲ ვარი მე, და უფლისა ღმრთისა ცათაჲსა მე მეშინის და ვჰმსახურებ, რომელმან შექმნნა ზღუაჲ და ჴმელი.
და შეეშინა კაცთა მათ შიშითა დიდითა ფრიად, და ჰრქუეს მას, რაჲ ესე ჰყავ, რამეთუ გულის-ჴმა-ყვეს კაცთა მათ, რამეთუ პირისაგან უფლისა ივლტოდა იგი, რამეთუ უთხრა მათ.
და ჰრქუეს მას, რაჲ გიყოთ შენ, და დასცხრეს ზღუაჲ ესე ჩუენ ზედა, რამეთუ ზღუაჲ იგი აღდგებოდა, და აღადგინებდა უფროჲს და ღელვასა;
და ჰრქუა მათ იონა; აღმიღეთ მე და შთამაგდეთ ზღუასა, და დასცხრეს ზღუაჲ თქუენ ზედა, რამეთუ მიცნობიეს მე ვითარმედ ჩემთჳს არს ღელვაჲ ესე დიდი თქუენ ზედა.
და აძლევდეს კაცნი იგი ნავსა მას მოქცევად ქუეყანად კერძო, და ვერ Page of ms. J: A2v უძლეს, რამეთუ ზღუაჲ იგი მოვიდოდა, და აღდგებოდა/ უფროჲს მათ ზედა.
და ღაღად-ყვეს უფლისა მიმართ და თქუეს; ნუ სადა უფალო ნუმცა წარვწყმდებით სულისათჳს ამის კაცისა, და ნუ გუცემ ჩუენ ზედა სისხლსა მართალსა, რამეთუ შენ უფალო ვითარცა გინდა და ჰყავ.
და აღიღეს იონა, და შთააგდეს ზღუასა, და დასცხრა ზღუაჲ ძრვისაგან თჳსისა.
და შეეშინა კაცთა მათ შიშითა დიდითა ფრიად უფლისა <გან>, და შეწირეს მსხუერპლი ღმრთისა და აღუთქუეს აღთქუმაჲ.:
