აჰა ესერა გამოვავლინა ანგელოზი ჩემი, და მოიხილოს გზაჲ წინაშე პირსა ჩემსა, და მეყსეულად მოვიდეს ტაძრად თჳსა უფალი რომელსა თქუენ ეძიებთ, და ანგელოზი აღთქუმისაჲ რომელი თქუენ გნებავს, აჰა ეგერა მოვალს, იტყჳს უფალი ყოვლისა-მპყრობელი.
და ვინ მე დაუთმოს დღესა მას შემოსლვისა მისისასა, ანუ ვინ მე დაუდგეს გამოჩინებასა მისსა, რამეთუ იგი თავადი შემოვალს ვითარცა ცეცხლი გრძმედისაჲ და ვითარცა მდელოჲ მრცხელთაჲ.
და დაჯდეს და გამოადნებდეს და განსწმედდეს, ვითარცა ვეცხლსა და ოქროსა, და განწმიდნეს ძენი ლევისნი, და გამოადნვნეს იგინი ვითარცა ოქროჲ და ვეცხლი, და იყვნენ იგინი შემწირველ უფლისა მსხუერპლისა სიმართლით.
და სათნო ეყოს უფალსა მსხუერპლი იუდაჲსი, და იჱრუსალემი იყოს ვითარცა დღენი საუკუნენი, და ვითარცა წელნი იგი პირველნი.
და მოვიდე თქუენდა საშჯელით, და ვიყო მე მოწამე მწრაფლ მეწამლეთა მათ ზედა, და მემრუშეთა და რომელნი ფუცვენ სახელითა ჩემითა ნაცილად, და რომელნი დააკლებენ სასყიდელსა მორეწისასა, რომელნი ჰმძლავრობენ ქურივთა, და ჰქენჯენ ობოლთა, და რომელთა განდრიკიან საშჯელი მწირისაჲ, და რომელთა არა ეშინის ჩემდა, იტყჳს უფალი ყოვლისა-მპყრობელი.
რამეთუ მე ვარ უფალი ღმერთი თქუენი, და არა ვიცვალე.
და Page of ms. J: A34r თქუენ ძენა იაკობისნო არა განშორებულ ხართ ცოდვათაგან მამათა/ თქუენთასა, გარდააქციეთ შჯული ჩემი, და არა დაიმარხეთ. მოიქეცით ჩემდა, და მე მოვიქცე თქუენდა, იტყჳს უფალი ყოვლისა-მპყრობელი, და სთქუთ; რაჲთა მოვიქცეთ.
უკუეთუ უბრკუმოს კაცმან ღმერთსა, რამეთუ თქუენ მიბრკუმობთ მე, და სთქუთ, რაჲთა გიბრკუმობთ შენ, რამეთუ ათეულნი და პირველ<ნი> ნაყოფნი თქუენ თანა არიან.
და ქუე-განხედევდით თქუენ ქუჱ; განმხედავთ მე, და თქუენ მე მიბრკუმობთ. წელიწადი დაესრულა.
და შეიღეთ ყოველი ნაყოფი საუნჯეთა, და იყოს ტაცებაჲ სახლთა შინა თქუენთა; მოიქეცით ამისგან, იტყჳს უფალი ყოვლისა-მპყრობელი, რაჲთა განგიხუნე თქუენ გარდამოსაქანელნი ცისანი, და მოვჰფინო თქუენ ზედა კურთხევაჲ ჩემი, ვიდრემდე კმა ეყოს.
და გიბრძანო თქუენ საზრდელად, და არა განვრყუნე ნაყოფი ქუეყანისა თქუენისაჲ, და არა მოუძლურდეს ვენაჴი აგარაკისა თქუენისაჲ, იტყჳს უფალი ყოვლისა-მპყრობელი.
და გნატრიდეს თქუენ ყოველი თესლები, რამეთუ იყვნეთ თქუენ ქუეყანა ნებიერ, იტყჳს უფალი ყოვლისა-მპყრობელი.
დაამძიმენით ჩემ ზედა სიტყუანი თქუენნი, იტყჳს უფალი, და სთქუთ; რაჲთა ძჳრსა ვიტყოდეთ შენთჳს.
რამეთუ იტყოდეთ; ამაო არს რომელი ჰმონებდეს ღმერთსა, და რაჲ უმეტჱს, რამეთუ დავიცვნეთ საცავნი მისნი, და რამეთუ ვიდოდეთ ვედრებით წინაშე პირსა უფლისა ყოვლისა-მპყრობელისასა.
და აწ ჩუენ ვჰნატრით უცხოთა, და აღეშჱნებიან ყოველნი რომელნი იქმან უშჯულოებასა, და წინა-აღუდგეს ღმერთსა, და ცხოველ არიან.
ამას ძჳრსა იტყოდეს მოშიშნი უფლისანი კაცად-კაცადი მოყუსისა მიმართ თჳსისა, და მოხედა უფალმან და შეისმინა, და დაწერა წიგნი საჴსენებელისაჲ წინაშე მისსა მოშიშთათჳს უფლისათა, და რომელნი ჰმსახურებენ სახელსა / Page of ms. J: A34v უფლისასა.
და იყვნენ იგინი ჩემდა, იტყჳს უფალი ყოვლისა-მპყრობელი, დღესა, რომელსა ვყო მე შესაწევნელად, და სათნო ვიყვნე იგინი, ვითარცა სათნო იყვის მამაკაცმან ძჱ თჳსი, რომელი ჰმონებნ მას.
და მოიქეცით, და იხილოთ შორის მართლისა მის და უშჯულოჲსა, და შორის რომელი ჰმონებს ღმერთსა, და რომელი არა ჰმონებს.:
