აღსრულებულ არს, განლეულ არს,
აღმოჴდა აღმობერვაჲ პირსა შენსა განრინებად ჭირისა გან; სტუანევდ გზასა, შეიპყრენ წელნი, განმჴნდი ძალითა ფრიად,
რამეთუ გარე-წარაქცია უფალმან გინებაჲ იაკობისი, ვითარცა გინებაჲ ისრაჱლისაჲ, რამეთუ განყრით განყარნეს იგინი, და მონაგებნი მათნი განრყუნეს.
საჭურველი ძლიერებისა მისისაჲ კაცთაგან კაცთა ძლიერთა, მეკიცხ<ევ>ელნი ცეცხლითა; საწაფელნი ეტლთა მათთანი დღესა განმზადებისა მისისასა, და მჴედარნი შფოთ<ით> იყვნენ
გზასა ზედა, და შეკრბეს ეტლები, და აღერინენ უბანთა ზედა; ხილვაჲ მათი ვითარცა ლამპარნი ცეცხლისანი, და ვითარცა ელვანი რაჲ მიმორბიედ.
მოეჴსენნენ დიდდიდთა მათთა, და ივლტოდიან დღისი, და მოუძლურდენ სლვითა მათითა, და იწრაფონ ზღუდედ კერძო, და განმზადნენ ჴუმილნი მათნი, Page of ms. J: A12r
ბჭენი ქალაქთანი განეხუნეს,/ და სამეუფონი დაეცნეს.
და ძალი განცხადნა, და იგი აღვიდოდა; და მჴევალნი მისნი მოჰყვანდეს ვითარცა ტრედნი მჴმობარენი გულთა შინა მათთა.
და ნინევი ვითარცა საბანელი წყლისაჲ წყალნი მისნი, და იგინი ივლტოდეს, და არა დადგეს, და არა ვინ იყო რომელმანმცა გარემოიხილა.
აღიტაცებდეს ვეცხლსა და ოქროსა, და არა იყო დასასრულ სამკაულისა მისისა, დამძიმებულ არს უფროჲს ყოველთა ჭურჭელთა გულის-სათქუმელთა მათთა.
განყრაჲ და აღყრაჲ, და გამოსხმაჲ და გულისა შეძრწუნებაჲ, და მუჴლთა დაჴსნაჲ, და სალმობანი ყოველთა წელთანი, და პირნი ყოველთანი ვითარცა ცხელსა წინაშე ქოთნისა.
სადა არს საყოფელი ლომთაჲ, და საძოვარი რომელ არნ ლეკუთაჲ; ვიდრე ვიდა ლომი შესლვად, მუნ ლეკჳ ლომისაჲ და არა ვინ იყო მაშინებელ;
ლომმან უტაცა ფრიად ლეკუთა მისთა, და დაუშდვნა ძუვალთა მისთა, და აღავსო ნადირითა ბუდჱ მისი, და საყოფელი მისი ნატაცებითა.
აჰა ესერა მე შენ ზედა, იტყჳს უფალი ყოვლისა-მპყრობელი, და აღვაგზნე კუამლითა სიმრავლჱ შენი, და ლომნი შენნი შეჭამნეს მახჳლმან, და მოვსრა ქუეყანით ნადირი შენი, და არღარა ისმნენ მერმე საქმენი შენნი.:
