Page of ms. P: _ Page of ms. L: 324R და იყო ჩემ ზედა ჴელი უფლისაჲ და განმიყვანა მე სულითა ღმრთისაჲთა, დამადგინა მე შორის ველსა; და ესე იყო სავსე ძუალებითა კაცთაჲთა.
და მომიყვანა მე მათ ზედა; და აჰა, ესერა, ფრიად იყო პირსა ზედა მის ველისასა და იგინი განჴმელ იყვნეს ფრიად.
და მრქუა მე: ძეო კაცისაო, წინაწარმეტყუელებდ ძუალებსა მაგას ზედა. Page of ms. L: 324V და ჰრქუა მათ: ძუალებმან მაგან განჴმელმან ისმინეთ სიტყუაჲ უფლისაჲ!
ამას იტყუის უფალი ძუალებსა მაგას ზედა: აჰა, ესერა, მე მოვავლინო თქუენდა სული ცხორებისაჲ.
და მოვსცე თქუენ ზედა ძარღუი და აღმოვაორძინო თქუენ ზედა ჴორცი და გარდავართხა თქუენ ზედა ტყავი; და მოგცე თქუენ ზედა სული ჩემი და სცხონდეთ, და სცნათ, რამეთუ მე ვარ უფალი.
და ვწინაწარმეტყუელებდ, ვითარცა მიბრძანა მე უფალმან. და იყო, წინაწარმეტყუელებასა ოდენ ჩემსა, და [აჰა], ესერა, იყო ძრვა და მოჰყვანდა ძუალები იგი ორკერძოვე ნაწევართა თუისთა,
და ვიხილე: აჰა, ძარღუი მას ზედა აღმოორძნდა, მას ზედა მოედებოდა ტყავი, და სული არღა იყო მათ ზედა.
და მრქუა მე უფალმან: წინაწარმეტყუელებდ, ძეო კაცისაო, და არქუ სულსა მას: ამას იტყუის უფალი: ოთხთა მათ სულთა Page of ms. L: 325R მოედ და შთაებერე მკუდართა მათ და ცხონდენ!
და [ვიწინაწარმეტყუელე], ვითარცა მიბრძანა მე უფალმან. შევიდა მათა სული; და აღდგეს ფერჴთა თუისთა ზედა კრებული მრავალი ფრიად.
მეტყოდა მე უფალი, მრქუა: ძეო კაცისაო, ძუალები ეგე სახლისა ისრაჱლისაჲ არს და მათ ყოველთა თქუეს: განჴმეს ძუალნი ჩუენნი და წარწყმდა ყოველი სასოებაჲ ჩუენი, რამეთუ მოვკუედით.
ამისთუის წინაწარმეტყუელებდ, ძეო კაცისაო, არქუ მათ: ამას იტყუის უფალი: აჰა, ესერა, მე აღვაღებ საფლავებსა თქუენსა და გამოგიყვანნე საფლავთაგან თქუენთა და შეგიყვანნე თქუენ ქუეყანასა ისრაჱლისასა.
და სცნათ, რამეთუ მე ვარ უფალი, რაჟამს აღვაღო საფლავებსა თქუენსა და გამოვიყვანო ერი ჩემი საფლავებისაგან მათისა,
და მოგცე სული ჩემი თქუენ ზედა და შეგიყვანნე თქუენ ქუეყანასა თქუენსა და სცნათ, რამეთუ მე ვარ უფალი, _ იტყუის უფალი ძალთაჲ.
Page of ms. L: _ Page of ms. P: 144v ამას იტყჳს ადონა უფალი: აჰა, ესერა, მე მოვიყვანო ყოველი სახლი ისრაჱისაჲ შორის წარმართთაგან, ვიდრე-იგი შევიდეს მუნ, და შევკრიბნე [იგინი] ყოვვლთაგან გარემოთა მათთა, შევიყვანნე იგინი ქუეყანასა ისრაჱლისასა.
და მივსცნე იგინი ნათესავად ერთად ქუეყანასა ჩემსა და თათა ისრაჱლისათა. და მთავარი ერთი იყოს და არა იყვნენ ნათესავად ორად და არა იყვნენ განყოფილ სამეუფოდ ორად.
რაჲთა არღარა შეიგინებოდიან მერმე კერპებითა მათითა, და ვიჴსნნე იგინი ყოველთაგან ურჩულოებათა მათთა, რომლითა-იგი ცოდვიდეს მათ შინა, და განვწმიდნე იგინი და იყვნენ ერად ჩემდა, და მე უფალი ვიყო ღმრთად მათა.
და მონაჲ ჩემი დავით _ შორის მათსა მთავრად. Page of ms. P: 145r და იყოს მწყემსი ყოველთაჲ ერთი, რამეთუ ბრძანებათა ჩემთა ვიდოდიან და სამართალთა იმარხვიდენ და ჰყოფდენ მათ.
და დაემკჳდრნენ ქუეყანასა მათსა, რომელი მივეც მონასა ჩემსა იაკობს, სადა-იგი მკჳდრ იყვნეს მამანი მათნი, და დაემკჳდრნენ მას ზედა; და დავით, მონაჲ ჩემი, მთავარ მათა იყოს საუკუნოდ.
და აღუთქუა მათ [აღთქუმაჲ მშჳდობისჲ], აღთქუმაჲ საუკუნოჲ იყთს მათ თანა; და დავამტკიცო სიწმიდჱ ჩემი შორის მათსა საუკუნოდ.
