Page of ms. P: 158v განიღჳძე, განიღჳძე, სიონ; განიღჳძე და განაღჳძე ძალი შენი სიონმან; და შენცა შეიმოსე დიდებულებაჲ შენი, იერუსალჱმ, ქალაქმან მაგან წმიდამან! ამიერითგან არღარა შესძინოს განსლვად შენ შორის წინადაუცუეთელმან და ბილწმან.
განიყარე მტუერი შენი შენგან; აღდეგ და დაჯედ, იერუსალჱმ! განიჴსნენ საკრველნი ეგე ქედისაგან შენისა ტყუემან მაგან ასულმან სიონისამან!
რამეთუ ამას იტყჳს უფალი: უსასყიდლოდ განიფრდენით თქუენ და არა ვეცხლითა მოიჴსენენით თქუენ აქავე.
ესრე იტყჳს უფალი: ქუეყანად ეგჳპტედ შთავიდა ერი ჩემი პირველსა მას დამკჳდრებად მუნ მსხემობით და ასურასტნად ძლით წარიყვანეს.
და აწ რასა ეძიებთ აქა? ესრე იტყჳს უფალი. რამეთუ წარიყვანა ერი იგი ჩემი მედად, უკუე გოდებდეს. ესრე იტყჳს უფალი: თქუენ შორის სახელი ჩემი გმობილ არს მარადის, წარმართთა შორის.
ამისთჳს ცნას ერმან ჩემმან: მე ვარ თავადი, რომელი ვი\ტყოდე, Page of ms. P: 159r და აწ მოვედ და თქუენ შორის ვდგა.
Page of ms. P: 15r ვითარ შუენიერ არიან Page of ms. P: 15v ფერჴნი მახარებელთა მათ მშჳდობისათანი, რომელნი ახარებენ კეთილსა და რომელნი ახარებენ სიცოცხლესა. რამეთუ სასმენელ ვყო ჴმაჲ მაცხოვარებისა შენისაჲ, რაჟამს ვჰრქუა მე სიონსა, ვითარმედ: სუფევდეს შენ ზედა ღმერთი შენი.
რამეთუ ჴმაჲ მცველთა შენთაჲ ამაღლდა, და მითვე ჴმითა ერთად იხარებდენ; რამეთუ პირსპირ იხილონ ჟამი იგი, რომელსა შეიწყალოს უფალმან სიონი.
მთანი ღაღადებდენ უდაბნოთა ზედა იერუსალჱმისათა სიხარულსა მათსა, რამეთუ შეიწყალა უფალმან ერი თჳსი და იჴსნა იერუსალჱმი.
და გამოაცხადოს უფალმან მკლავი წმიდაჲ თჳსი წინაშე ყოველთა წარმართთა, და იხილონ ყოველთა კიდეთა ქუეყანისათა მაცხოვარებაჲ ღმრთისა ჩუენისაჲ.
Page of ms. P: 188v აჰა, ესერა, გულისხმა-ყოს მონამან ჩემმან და აღმაღლდეს და იდიდოს.
ვითარცა-იგი უკჳრდეს მრავალთა შენ ზედა, ეგრჱთ უდიდებულჱს იყოს კაცთაგან ხილვაჲ შენი და დიდებაჲ შენი ძეთა კაცთაჲსა.
ესრჱთ უკჳრდეს თესლებსა მრავალსა მის ზედა, და დაეყვნენ მეფეთა პირნი მათნი, რამეთუ, რომელთა არა თხრობილ არს მისთჳს, იხილონ, და, რომელთა არა ესმინოს, გულისხმა-ყონ.
