Page of ms. P: 195v იხილეთ, ვითარ წარწყმდა მართალი იგი, და არავინ მოელის გულითა, და კაცნი მართალნი აღიღებიან, და არავინ განიცადის, რამეთუ პირისაგან სიცრუვისა აღებულ არს სამართალი.
და იყოს მშჳდობით საფლავი მისი, რამეთუ აღებულ არს შორის.
ხოლო თქუენ მოიყვანეთ აქა, ძენო უსჯულონო, ნაშობნო მემრუშეთანო და მეძავთანო.
რომლითა-იგი იშუებდით? ვის ზედა აღაღეთ პირი თქუენი და განსძართ ენაჲ თქუენი და ზრახეთ ძჳრი თქუენი?
Page of ms. P: 93r ამას იტყჳს მაღალი იგი, რომელი მაღალთა შინა დამკჳდრებულ არს _ წმიდაჲ წმიდათა შორის და სახელი მისი უფალ და მაღალ და წმიდათა შორის განსუენებულ, და სულმოკლეთა მოსცეს სულგრძელებაჲ და მოსცის ცხორებაჲ დამდაბლებულთა გულითა.
და არა უკუნისამდე გულმანკიერ ვიქმნე შურის-გებად, არა მარადის განგირისხნე თქუენ, რამეთუ სული ჩემ მიერ გამოვიდეს, და ცხორებაჲ მე შევქმენ.
ცოდვისათჳს მცირედ რაჲ მე შევაწუხე იგი, ვტანჯე და გარემივიქციე პირი ჩემი მისგან, შეწუხნა და ვიდოდა გზათა მისთა მწუხარჱ.
და გზანი მისნი ვიხილენ და განვკურნენ და მივეც მას ნუგეშინის-ცემაჲ ჭეშმარიტი,
მშჳდობაჲ მშჳდობასა ზედა და რომელნი მახლობელ არიან ...
