Page of ms. P: 382R იგავნი სოლომონისნი, ძისა დავითისნი, რომელი მეფობდა ისრაჱლსა ზედა.
ცნობად სიბრძნისა და სწავლულებისა, ცნობად სიტყუათა გონიერებისათა
და შეწყნარებად ქცევითა სიტყუათა, ცნობად ჭეშმარიტებისა და სიმართლისა და სასჯელთა წარმართებად.
რაჲთა მიეცეს უმანკოთა მეცნიერებაჲ და ყრმათა ჩჩჳლთა გულისხმის-ყოფაჲ და მეცნიერებაჲ.
რომელთაჲ ისმინოს ბრძენმან და უბრძნჱს იყოს, ხოლო გულისხმის-მყოფელმანმოღუაწებაჲ მოიგოს.
ცნას იგავნი, დაფარულნი სიტყუანი, თქმულნი ბრძენთანი, და იგავნი.
დასაბამი სიბრძნისაჲ - შიში უფლისაჲ; გულისხმა კეთილ ყოველთა, რომელთა ყონ იგი; და მსახურებაჲ მისი კეთილ ღმრთისა მიმართ; შიში უფლისაჲ - დასაბამი ცნობისაჲ; სიბრძნჱ და სწავლულებაჲ უცებთა შეურაცხ-ყვიან.
ისმინე, შვილო, სწავლაჲ მამისა შენისაჲ და ნუ განეშორები შჯულსა დედისა შენისასა.
რამეთუ გჳრგჳნი მადლისაჲ დაიდგა თავსა შენსა და მანიაკი ოქროჲსაჲ - ყელსა შენსა.
Page of ms. P: 65R შვილო, ნუ გაცთუნებენ შენ კაცნი უღმრთონი. ნუცა ინებებ მათ თანა.
გლოცვიდენ ღათუ და გეტყოდიან: მოვედ ჩუენ თანა და გუეზიარე სისხლთა და დავარწყუათ ქუეყანასა სიცრუვით სისხლი უბრალოჲ.
და შთავთქათ იგი ვითარცა ჯოჯოხეთმან ცხოველი და აღვიღოთ ქუეყანით სახსენებელი მისი
და მონაგები მისი მრავალფერი ჩუენ დავიპყრათ და აღვავსნეთ სახლნი ჩუენნი ნატყუენავითა,
ნაწილი შენი შემოჰრიე ჩუენ თანა და ზოგად პავასიკი მოვიგოთ ყოველთა, ვაშკარანი ერთი იყავნ ჩუენ ყოველთაჲ,
ნუ ხუალ გზასა მათ თანა, მიაქციენ ფერჴნი შენნი ალაგთა მათთაგან.
რამეთუ არა ცუდად დაურწყიან მახჱ მფრინველთ[ა].
რამეთუ იგინი, რომელნი კაცის კლვისა ზიარ არიან, იუნჯებენ თავისა თჳსისა ძჳრსა; ხოლო დაქცევაჲ კაცთა უღმრთოთაჲ ბოროტ არს.
ესე გზანი არიან ყოველთანი, რომელნი აღასრულებენ უსჯულოებასა, რამეთუ უღმრთოებითა მათითა სულნი თჳსნი წარიწყმიდნიან.
Page of ms. P: 71V სიბრძნჱ გამოსავალთა იქებინ და უბანთა ზედა განცხადებულებაჲ მოსცის.
მწუერვალსა ზედა მთათასა იქადაგებინ და ბჭეთა ზედა ქალაქისათა კადნიერად იტყჳნ:
რაოდენ ჟამ უმანკოთა აქუნდეს სიმართლჱ, არა ჰრცხუენოდის? ხოლო უგუნურნი იგი გინებისა არიან გულის-მთქუმელ, უმსახურებელ იქმნნეს და მოიძულეს მეცნიერებაჲ და თანა-მდებ იქმნეს მხილებასა.
აჰა ესერა წინა-გითქუამ თქუენ სულისა ჩემისა თქუმულთა და გასწაო თქუენ სიტყუაჲ ჩემი:
რამეთუ გიწოდე, და არა ისმინეთ; და განვაგრძვენ სიტყუანი ჩემნი, და არა მერჩდით.
არამედ შეურაცხ-ჰყვენით ზრახვანი ჩემნი და მხილებათა ჩემთა არა მომხედეთ.
აწ უკუე მეცა გეცინოდი თქუენსა წარწყმედასა და მომცხრებოდის, რაჟამს მოიწიოს თქუენ ზედა შფოთი მეყსეულად.
ხოლო დაქცევაჲ მსგავსად ნიავ-ქარისა მოგიჴდეს თქუენ, ანუ ოდეს მოგიჴდეს თქუენ ჭირი და გარე-მოდგომაჲ მტერთაჲ.
იყოს, ოდეს მხადოთ, და მე არა ვისმინო თქუენი; მეძიებდეთ მე უკეთურნი და არა მპოოთ.
Page of ms. P: 72R რამეთუ მოიძულეს სიბრძნჱ და შიში ღმრთისაჲ არა გამოიძიეს.
არცა ინებეს ბაგეთა ჩემთა სიტყუათა მორჩილებაჲ და შეურაცხ-ყვნეს მხილებანი ჩემნი.
ამიერითგან ჭამდენ იგინი გზათა თჳსთა ნაყოფსა და თჳსითა უღმრთოებითა განძღენ იგინი.
რამეთუ ავნებდეს ჩჩჳლთა, მოწყდენ და განკითხვამან უღმრთონი მოსრნეს.
ხოლო რომელმან ისმინოს ჩემი, მან დაიმკჳდროს იგი სასოებით და დაადგრეს უშიშად ყოვლისაგან ბოროტისა.
