Page of ms. P: _ Page of ms. L: 340V და ვითარცა გარდაჴდა შაბათი იგი, მარიამ მაგდანელმან, მარიამ იაკობისმან და სალომე იყიდეს ნელსაცხებელი, რაჲთა მივიდენ და სცხონ მას.
და ნიად განთიადსა ერთშაბათისასა მოვიდეს საფლავსა მას ზედა მერმე აღმოსლვასა ოდენ მზისასა,
იტყოდეს ურთიერთას: ვინ გარდაგუიგორვოს ჩუენ ლოდი იგი კარისა მისგან საფლავისა?
მიხედეს და იხილეს, რამეთუ გარდაგორვებულ იყო ლოდი იგი, რომელ იყო დიდ ფრიად.
Page of ms. L: 341R შე-რაჲ-ვიდეს საფლავსა მას, იხილეს ჭაბუკი, მჯდომარეჲ მარჯუენით კერძო, შემოსილი სამოსლითა სპეტაკითა, და განკრთეს.
ხოლო მან ჰრქუა მათ: ნუ განჰკრთებით! იესუს ეძიებთ ნაზარეველსა, ჯუარცმულსა; არა არს [აქა], არამედ აღდგა. აჰა, ადგილი, სადა დადვეს იგი.
არამედ წარვედით და უთხართ მოწაფეთა მისთა და პეტრეს, ვითარმედ: აღდგა; აჰა, ეგერა, წინაგიძღუის თქუენ გალილეას, მუნ იხილოთ იგი, ვითარცა გრქუა თქუენ.
და მათ ვითარცა ესმა ესე, გამოვიდეს და ივლტოდეს მიერ საფლავით, რამეთუ შეძრწუნებულ იყვნეს და დაკუირვებულ და არარაჲ ვის უთხრეს, რამეთუ ეშინოდა.
