რავდენ რაჲ ნუგეშინის-ცემა არს ქრისტეს მიერ Page of ms. L: 577V და რავდენი ნუგეშინის-ცემაჲ არს სიყუარულისაჲ, რაოდენი რაჲ მოწყალებაჲ და წყალობაჲ,
აღასრულეთ სიხარულით სიხარული ჩემი, რაჲთა მასვე ზრახვიდეთ და იგივე სიყუარული გაქუნდეს ერთსულ და ერთზრახვა იყვენით;
ნურარაჲთ ჴდომით, ნუცა უცნებით, არამედ სიმდაბლით ურთიერთას ერთი-ერთისაჲ უმეტეჲსად შეერაცხენ კაცად-კაცადი თქუენი.
ნუ ხოლო თავისა თუისისათჳს, არამედ მიყუსისათჳსცა.
Page of ms. L: _ Page of ms. P: 187R ესე ზრახვაჲ იზრახებოდენ თქუენ შორის, რომელიცა-იგი ქრისტე იესუს მიერ.
რომელი-იგი ხატი ღმრთისაჲ იყო, ნატაცებად შეირაცხა თავისა თჳსისა სწორებად ღმრთისა,
არამედ თავი თჳსი დაიმდაბლა და ხატი მონებისაჲ მოიღო და მსგავს კაცთა იქმნა და ხატითა იპოვა ვითარცა კაცი.
დაიმდაბლა თავი თჳსი და იქმნა მორჩილ ვიდრე სიკუდილდმდე და სიკუდილითაღა ჯუარისაჲთა.
უმეტჱსად აღამაღლა იგი ღმერთმან და მიანიჭა მას სახელი, რომელი ზეჟთა არს ყოველთა სახელთა,
რაჲთა სახელისა მიმართ იესუ ქრისტჱსისა ყოველი მუჴლი მოდრკეს ზეცისათანი და ქუეყანისათანი და ქუესკნელთა[ნი.
და ყოველმან ენამან] Page of ms. P: 187V აღუაროს ღმერთსა უფალი იესუ ქირტე სადიდებელად ღმრთისა მამისა. ამენ.
Page of ms. P: 352R ხოლო აწ, საყუარელნო ჩემნო, ვითარცა-ეგე ოდესვე მორჩილ ხართ, ნუ ხოლო მისლვასა მას ჩემსა, არამედ უფროჲსღა შორს ყოფასა შიშით და ძწოლით ცხორებისა თქუენისათჳს იქმოდეთ.
რამეთუ ღმერთი არს, რომელი შეიქმს თქუენ თანა ნებასაცა და შეწევნასაცა სათნოებისასა;
რომელსა იქმოდით თჳნიერ დრტჳნვისა და გულისსიტყუათა,
რაჲთა იყვნეთ უბიწო და უმანკო, შვილ ღმრთის, შეუგინებელ შორის ნათესავსა დრკუსა და გულარძნილსა, რაჲთა სჩნდეთ, ვითარცა მთიებნი სოფელსა შინა.
სიტყუაჲ ცხორებისა საუკუნოჲსაჲ გაქუნდინ სიქადულად დღესა მას ქრისტჱსსა, რამეთუ არა ცუდად ვრბიოდე, Page of ms. P: 352V არცა ცუდად დავშუერ.
დაღათუ შევიწირვი მსხუერპლსა ამას და მსახურებასა ამას სარწმუნოებისა თქუენისასა, მიხარის და მიხაროდისცა თქუენ ყოველთა თანა.
ეგრევე თქუენცა გიხაროდენ და ჩემ თანა იხარებდით.
