რამეთუ ქრისტე, ვიდრე ჩუენ უძლურღა ვიყვენით, ჟამსა ოდენ უღმრთოთათჳს მოკუდა.
რამეთუ ძნიად ვინმე მართლისათჳს მოკუდის; ხოლო კეთილისათჳს, ვინ უწყის, იკადროს სიკუდილი.
ხოლო გამოაჩინა ღმერთმან თჳსი იგი სიყუარული ჩუენდა მომართ, რამეთუ ვიდრე-იგი უღმრთო ვიყვენით, ქრისტე ჩუენთჳს მოკუდა.
რაოდენ უფროჲს განვმართლდით სისხლითა მისითა, განვერენით ჩუენ მის მიერ რისხვისაგან.
უკუეთუ ვიდრე-იგი მტერღა ვიყვენით და დავეგენით ღმერთსა სიკუდილითა ძისა მისისაჲთა, რაოდენ უფროჲს და-რაჲ-ესე-ვეგენით, ვცხონდით მაცხოვარებითა მისითა.
არა ხოლო ესოდენ, არამედ ვიქა[დითცა ღმრთისა] უფლისა ჩუენისა იესუ ქრისტჱსა, რომლისაგან აწ დაგებაჲ ესე მოვიღეთ.
Page of ms. P: 357V ამისთჳს, ვითარცა-იგი ერთისა მის კაცისათჳს ცოდვაჲ სოფლად შემოჴდა და ცოდვისა ძლით -- სიკუდილი, და ესრეთ ყოველთა კაცთა ზედა სიკუდილი მოიწია, რომლითა ყოველთა შესცოდეს,
რამეთუ შჯულისა მოწევნადმდე ცოდვაჲ იყო სოფელსა შინა და ცოდვაჲ იგი არა შერაცხილ იყო, რამეთუ არღა იყო შჯული.
არამედ სუფევდა სიკუდილი ადამისითგან მოსესადმდე და მათ ზედა, რომელთა-იგი არა ეცოდა მსგავსად გარდამოს[ლ]ვისა მის ადამისა, რამეთუ იგი არს სახჱ მერმეთა მათ ჟამთაჲ.
არამედ არა ვითარ შეცოდებაჲ, ეგრეცა მადლი; უკუეთუ ერთისა მის შეცოდებითა მრავალნი მოწყდეს, რაოდენ უფროჲს მადლითა ღმრთისაჲთაჲ, და ნიჭი იგი მადლითა ერთისა კაცისა იესუ ქრისტჱსითა მრავალთა მიმართ აღემატა!
და არა [ვითარცა ერთისა მის] შეცოდებულისა ნიჭი იგი, რამეთუ სასჯელი იგი ერთისა მისგან დასასჯელად, ხოლო მადლი იგი მრავალთა[გან] შეცოდებულთა განსამართლებლად.
უკუეთუ ერთისა მის შეცოდებითა სიკუდილი სუფევდა ერთისა მისგან, რაოდენ უფროჲს, რომელნი მეტსა მადლისასა და ნიჭსა სიმართლისასა მიიღებენ, ცხორებასა შინა სუფევდენ!
ვითარცა ერთისა მისგან შეცოდებითა ყოველთა კაცთა ზედა Page of ms. P: 358R დასასჯელად, ეგრეცა ერთისა მის სიმართლისათჳს ყოველთა კაცთა ზედა განსამართლებელად ცხორებისა.
ვითარცა ერთისა მის კაცისა ურჩებითა ცოდვილნი შემოჴდეს მრავალნი, ეგრეცა ერთისა კაცისა მორჩილებითა მართალნი შემოვიდეს მრავალნი.
რამეთუ შჯული შორის შემოვიდა, რაჲთა განმრავლდეს ცოდვაჲ და სადა-იგი განმრავლდა ცოდვაჲ, მუნ უფროჲს გარდაემატა მადლი,
რაჲთა ვითარცა-იგი სუფევდა ცოდვაჲ სიკუდილსა შინა, ეგრეცა მადლი სუფევდეს სიმართლითა ცხორებად საუკუნოდ ქრისტე იესუჲს მიერ უფლისა ჩუენისა.
